ۇلتتىق ستاتيستيكا بيۋروسىنىڭ مالىمەتىنشە، وتكەن جىلى شامامەن 2,6 مىڭ قىتاي ازاماتى ەلگە تۇراقتى تۇرۋ ءۇشىن قونىس اۋدارعان. بۇل 2024 -جىلمەن سالىستىرعاندا 29 پايىزعا كوپ جانە سوڭعى جىلدارداعى ەڭ جوعارى ناتيجە بولىپ وتىر.
ايتا كەتۋ كەرەك، قىتايدان كەلەتىن كوشى-قون اعىنى 2021 -جىلى ەڭ تومەن دەڭگەيگە دەيىن ءتۇسىپ، نەبارى 249 ادامدى قۇراعان ەدى. الايدا كەيىنگى جىلدارى بۇل كورسەتكىش بىرتىندەپ ءوسىپ كەلەدى. قونىس اۋدارۋشىلاردىڭ باسىم بولىگى الماتى مەن استانا قالالارىنا، سونداي-اق وسى وڭىرلەرگە جاقىن ايماقتارعا تۇراقتاعان.
جالپى العاندا، 2025 -جىلى قازاقستانعا 23,7 مىڭ ادام كەلىپ، 7,6 مىڭ ادام ەلدەن كەتكەن. ناتيجەسىندە كوشى-قوننىڭ وڭ سالدوسى 16 مىڭنان استام ادامدى قۇرادى. بۇل ەلدەگى دەموگرافيالىق جانە كوشى-قون ۇردىستەرىنىڭ وڭ باعىتتا دامىپ جاتقانىن كورسەتەدى.
ساراپشىلاردىڭ پىكىرىنشە، قازاقستانعا شەتەل ازاماتتارىنىڭ، اسىرەسە قىتايدان كەلۋشىلەردىڭ ارتۋى الداعى ۋاقىتتا دا جالعاسۋى مۇمكىن. بۇل ءوز كەزەگىندە ەل ەكونوميكاسى مەن ەڭبەك نارىعىنا اسەر ەتەتىن ماڭىزدى فاكتورلاردىڭ ءبىرى بولماق.