قازاقستانعا قارسى ويناعان فۋتبولشى ءوز ۇيىندە ءولى تابىلدى

استانا. قازاقپارات - فۋتبولدان گرەكيا قۇراماسىنىڭ قورعاۋشىسى دجوردج بولدوك ءوز ۇيىندەگى باسسەيندە ءولى تابىلدى، - دەپ حابارلايدى «شەففيلد يۋنايتەد» كومانداسىنىڭ باسپا ءسوز قىزمەتى.

اعىلشىندىق كلۋب الەۋمەتتىك جەلىدەگى پاراقشاسىندا فۋتبولشىنىڭ وتباسىنا كوڭىل ايتۋ حابارىن جاريالادى. ال قازىر ويناپ جۇرگەن «پاناتينايكوس» كلۋبى دا دجوردج بەلدوكتىڭ قازاسىن راستادى.

فۋتبولشى 9-قازان كۇنى گليفادتاعى (گرەكيا) ۇيىندەگى باسسەيندە كوز جۇمعان. دەنەسىنەن زورلىق-زومبىلىق بەلگىلەرى انىقتالماعان.

گرەكيا قۇراماسى الداعى ەكى ويىندا ويىنشىنى ەسكە الۋ ماقساتىندا قارالى شۇبەرەك تاعىپ شىعۋ جايلى ەۋروپالىق فۋتبول قاۋىمداستىقتارى وداعىنا (UEFA) ۇسىنىس جىبەرگەن.

دجوردج بولدوك 31 جاسىندا كوز جۇمدى. مانسابىندا انگليانىڭ «شەففيلد يۋنايتەد»، «وكسفورد»، «تامۋورت»، «نورتگەمپتون»، «ميلتون-كينس دونس» كلۋبتارىندا، يسلانديانىڭ «ۆەستمانناەيار» كومانداسىندا دوپ تەپتى. سوڭعى رەت «پاناتينايكوس» كومانداسىنا اۋىسىپ كەلگەن.

گرەكيا قۇراماسى ساپىندا 12 ماتچقا قاتىستى. ناۋرىز ايىندا قازاقستانعا قارسى ويىنعا شىققان بولاتىن.