قازاقستانعا كەلگەن تۋريستەر قاي ايماققا كوبىرەك بارادى

 ۇلتتىق ستاتيستيكا بيۋروسى 2023 -جىلدىڭ قاڭتار، شىلدە ايلارىندا تۋريستەر اراسىندا ىرىكتەمەلى زەرتتەۋ جۇرگىزدى. وعان 22,4 مىڭ شەتەلدىك قاتىستى، ونىڭ 16,9 مىڭى - قازاقستانعا جەكە ماقساتپەن كەلگەندەر، قالعان 5,4 مىڭى - ءىسساپارعا كەلگەن، دەپ حابارلايدى Kazinform. 

ساپارلاعان وڭىرلەر بويىنشا ءتىزىم باسىندا استانا، الماتى قالالارى جانە ماڭعىستاۋ وبلىسى تۇر.

«تۋريستەردىڭ 31 پايىز كۋرورتتىق ايماقتارعا بارعا، ونىڭ ىشىندە تۋريستەردىڭ نەگىزگى ۇلەسى الماتى تاۋ كلاستەرىن تاڭداعان - 57,7 پايىز، تاعى 14,7 پايىز ماڭعىستاۋ وڭىرىنە بارعان.

كەلۋشىلەر نەگىزىنەن پويىزبەن (31,5 پايىز)، ۇشاقپەن (30,4 پايىز) جانە حالىقارالىق اۆتوبۋسپەن (22,8 پايىز) ساياحاتتاپ، تۋىستارىنا نەمەسە تانىستارىنا توقتاعان (52,3 پايىز)، سونداي-اق، قوناقۇيلەرگە (24,9 پايىز) ، جالدامالى پاتەرلەر مەن ۇيلەرگە (18,4 پايىز) جانە باسقا ورنالاستىرۋ ورىندارىنا (4,4 پايىز) ورنالاسقان.

تۋريستەردىڭ ورتاشا العانداعى ساياحات ۇزاقتىعى - 4 كۇن»، - دەپ جازدى ستاتيستيكا بيۋروسىنان.

كەلۋشىلەردىڭ جالپى شىعىنى 3,6 ميلليارد تەڭگەنى قۇرادى. ونىڭ ىشىندە جەكە ماقساتتار بويىنشا 2,4 ميلليارد تەڭگە، ىسكەرلىك ماقساتتا 1,1 ميلليارد تەڭگە جۇمسالعان.

كەلۋشىلەر شىعىستارىنىڭ نەگىزگى ۇلەسى حالىقارالىق جانە قازاقستان ىشىندەگى جول شىعىنى (53,8 پايىز) مەن تاماقتانۋ (15,3 پايىز) بولدى. شىعىنداردىڭ از بولىگى ورنالاستىرۋ ورىندارىندا تۇرۋعا - 13 پايىز، تاۋارلاردى ساتىپ الۋعا - 13,7 پايىز تيەسىلى.

«زەرتتەۋگە 66 ەلدەن كەلگەن تۋريستەر قاتىستى، كەلۋشىلەردىڭ ەڭ كوپ ۇلەسى رەسەي، وزبەكستان جانە قىرعىزستان ەلدەرىنەن بولدى»، - دەلىنگەن جازبادا.

اۆتور

اسحات رايقۇل