قازاقستانعا ەڭبەك ميگرانتتارى قاي ەلدەردەن كوپ كەلەدى

الماتى. KAZINFORM - ەڭبەك جانە حالىقتى الەۋمەتتىك قورعاۋ مينيسترلىگى جىل سايىن جۇمىس بەرۋشىلەردىڭ قاجەتتىلىگى بويىنشا قازاقستانعا شەتەلدىك جۇمىس كۇشىن تارتۋعا كۆوتا مولشەرىن بەكىتىپ، بولەدى.

ءناپاقاسىن قازاقستاننان تاۋىپ جۇرگەندەردىڭ ءبىرى - ماكسەت كۋليمبەتوۆ. جاسى 60 قا تاياپ قالعان وزبەكستاندىق قونايەۆ قالاسىنداعى قوعامدىق اسحانانىڭ بىرىندە كۇزەتشى بولىپ جۇمىس ىستەيدى.

ايتۋىنشا، قازاقستاندا ءبىر ايدا تاپقان تابىسىن ءوز ەلىندە جارتى جىل جۇمىس ىستەپ قانا الادى.

- العاش رەت قازاقستانعا وسىدان بەس جىل بۇرىن كەلدىم. اتىراۋ، اقتاۋ قالالارىندا جۇمىس ىستەدىم. كەيىن قونايەۆقا اۋىستىم. قازىر ادام بالاسىنىڭ اقشاسىز كۇنى قاراڭ، تىرشىلىگى، وتباسى، دەنساۋلىعىنا دەيىن سوعان بايلانىستى بولدى عوي. سوندىقتان كەلىپ جۇمىس ىستەپ جاتىرمىن. ارينە، قاراپايىم كۇزەتشى جۇمىسىن وزبەكستاننان دا تابۋعا بولادى. ءبىراق ول جاقتا جالاقى از. قازاقستاندا ءبىر ايدا تاپقان تابىسىمدى ءوز ەلىمدە التى اي ىستەپ الامىن. مىسالى، قازىر مەنىڭ ەڭبەكاقىم - 300 مىڭ تەڭگە، - دەيدى ول.

سونداي-اق ميگرانت زاڭدى تۇردە جۇمىس ىستەپ جاتقانىن جەتكىزدى.

- قازاقستاندا جۇمىس ىستەۋ ءۇشىن سايكەس رۇقسات الۋ كەرەك. بۇل ەرەجەلەردى ساقتاۋ ماڭىزدى، ايتپەسە ايىپپۇل ارقالاپ، ەلدەن قۋىلامىز. سوندىقتان، ەڭ الدىمەن قۇجاتتاردى جوندەيمىز. ماعان جانە ەكى قولعا ءبىر كۇرەك ىزدەپ كەلگەن وتانداستارىما وسى جاقتاعى جازيرا دەگەن قارىنداسىم كومەكتەسەدى. مەنىڭ قونايەۆتا جۇمىس ىستەپ جۇرگەنىمە 10 ايدان استى. الداعى ايدا ەلگە قايتام. سوسىن قايتىپ ورالامىن. ءتارتىپ سولاي. وعان باعىنۋعا ءتيىسپىز، - دەيدى ماكسەت كۋليمبەتوۆ.

شەتەلدىك ميگرانتتارعا قۇجات جاعىنان كومەكتەسىپ جۇرگەن جازيرا ەسىمدى كەلىنشەكتى سوزگە تارتىپ كوردىك.

ايتۋىنشا، ولارعا جۇمىس تاۋىپ، قۇجاتتارىن راسىمدەپ بەرەدى.

- قازىر ءبارى ەلەكتروندى تۇردە جۇزەگە اسادى. ءال بىزدىڭ ەلگە جۇمىس ىزدەپ كەلگەندەردىڭ باسىم بولىگى ونى قولدانا المايدى. سوندىقتان ءوز قىزمەتىمدى ۇسىنام. ياعني، تەك قۇجاتتارمەن جۇمىس ىستەيمىن. EGov.kz پورتالىنا ورنالاستىرۋعا كومەكتەسەم. كەيدە جۇمىس بەرۋشىلەردى تاۋىپ بەرەم. ماعان كوبىنە وزبەكستان مەن قاراقالپاقستان ازاماتتارى جۇگىنەدى، - دەپ ءتۇسىندىردى جازيرا اليپوۆا.

قازاقستانعا ەڭبەك ميگرانتتارى قاي ەلدەردەن كوپ كەلەدى

ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، ءبىزدىڭ ەلگە ەڭبەكشى ميگرانتتار كوبىنە قىتاي، تۇركيا، وزبەكستان، ءۇندىستان، ۇلى بريتانيا، ماجارستان، سەربيا، ۋكراينا جانە يتاليادان كەلەدى.

ايتا كەتەيىك، ىشكى ەڭبەك نارىعىن قورعاۋ ماقساتىندا مينيسترلىك شەتەل ماماندارىن تارتۋعا جىل سايىن كۆوتا بەلگىلەيدى جانە بولەدى.

شەتەلدىك جۇمىس كۇشىن تارتۋعا ارنالعان رۇقسات مىنا ساناتتار بويىنشا بەرىلەدى:

ءبىرىنشى سانات - باسشىلار مەن ولاردىڭ ورىنباسارلارى؛

ەكىنشى سانات - قۇرىلىمدىق بولىمشەلەردىڭ باسشىلارى؛

ءۇشىنشى سانات - ماماندار؛

ءتورتىنشى سانات - بىلىكتى جۇمىسشىلار.

- بيىل ءبىرىنشى سانات بويىنشا 649 رۇقسات (باسشىلار جانە ولاردىڭ ورىنباسارلارى)، ەكىنشى سانات - 3254 رۇقسات (قۇرىلىمدىق بولىمشەلەردىڭ باسشىلارى). رۇقساتتاردىڭ نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى - تيىسىنشە 5718 جانە 1161 بىرلىك. سونداي-اق ماۋسىمدىق جۇمىستارعا 4097 ادامعا دەيىن جۇمىس كۇشى تارتىلۋى مۇمكىن. 2025-جىلى قازاقستانداعى شەتەلدەن جۇمىسكەر تارتۋعا كۆوتا جۇمىس كۇشىنىڭ %0,2 ىن قۇرايدى، - دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگىنەن.

ەلدە شەتەل جۇمىس كۇشىن پايدالاناتىن 1710 ۇيىم بار.

- ەڭبەك ميگرانتتارى قۇرىلىس، اكىمشىلىك جانە كومەكشى سالاسىندا، تاۋ -كەن ونەركاسىبى، كارەرلەردى قازۋ، وڭدەۋ ونەركاسىبى، اۋىل، ورمان جانە بالىق شارۋاشىلىعىندا جۇمىس ىستەيدى. سونداي-اق قۇرىلىس، ءۇي، اۋلا تازالاۋ جۇمىستارىنا تارتىلعان، - دەپ اتاپ ءوتتى مينيسترلىكتەن.

قازىر قازاقستان اۋماعىندا جەرگىلىكتى اتقارۋشى ورگانداردىڭ رۇقساتى بويىنشا 13233 شەتەل ازاماتى جۇمىس ىستەيدى.

قازاقستاننىڭ كوشى-قون زاڭىن بۇزعان شەتەلدىكتەر

ىشكى ىستەر مينيسترلىگىنىڭ دەرەگىنشە، بىلتىر قازاقستاننىڭ كوشى-قون زاڭىن بۇزعان 14124 شەتەلدىك ەلدەن شىعارىلدى.

اكىمشىلىك قۇقىق بۇزۋ كودەكسىنىڭ 517-بابىنىڭ 3-4-تارماقتارىنا سايكەس، شەتەلدىكتىڭ نەمەسە ازاماتتىعى جوق تۇلعا قازاقستان زاڭناماسىندا بەلگىلەنگەن مەرزىم وتكەننەن كەيىن ەل اۋماعىنان شىقپاسا جاۋاپقا تارتىلادى. ياعني، 10-25 ايلىق ەسەپتىك كورسەتكىش مولشەرىندە ايىپپۇل سالىنادى نەمەسە ەلدەن قۋىلادى.

- زاڭسىز جۇرگەن ەڭبەك ميگرانتتارى «زاڭسىز كەلۋشى»، «قۇقىق ءتارتىپ»، «ميگرانت»، «ۋچاسكە» جانە تاعى باسقا رەيد اياسىندا انىقتالادى، - دەپ حابارلادى ءى ءى م باسپا ءسوز قىزمەتى.

الماتى پروكۋراتۋراسى ەلىمىزدە 4 مىڭنان استام شەتەلدىك تاكسي قىزمەتىمەن زاڭسىز اينالىسقانىن انىقتادى.

قۇزىرلى مەكەمە 400 دەن استام تاكسوپاركتى انىقتادى. باسىم بولىگى الماتىدا تىركەلگەن. قازىرگى ۋاقىتتا كوشى-قون قىزمەتى كوميتەتى پروكۋراتۋرانىڭ قاداعالاۋ اكتىسىن قاراپ جاتىر.

ەلدە زاڭسىز قىزمەتتى جۇزەگە اسىرعان تاكسوپاركتەر مەن شەتەل ازاماتتارىنا قاتىستى ءتيىستى شارالار قابىلداندى.

اكىمشىلىك كودەكستىڭ 517-بابى بويىنشا 346 شەتەلدىك تاكسيست جانە 519-بابىنا ساي 148 ادام شەتەلدىك جۇمىس كۇشىن تارتقانى ءۇشىن اكىمشىلىك جاۋاپقا تارتىلدى، 112 ءسى قامالدى، ال 156 شەتەلدىك ەلدەن شىعارىلدى.

ەسكە سالايىق، بۇعان دەيىن پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا قازاقستانعا كورشى ەلدەردەن ءجۇز مىڭداعان ەڭبەك ميگرانتى جۇمىس ىزدەپ كەلىپ جاتقانىن ايتقان بولاتىن.