قازاقستان يسلام دامۋ بانكىنەن $1,1 ميلليارد قارجى تارتپاق
استانا. KAZINFORM - دجيددا قالاسىندا قازاقستان رەسپۋبليكاسى ۇكىمەتىنىڭ وكىلى – ق ر پرەمەر-ءمينيسترىنىڭ كەڭەسشىسى نۇرلان بايبازاروۆتىڭ يسلام دامۋ بانكىنىڭ (ي د ب) پرەزيدەنتى مۇحاممەد سۇلەيمان ءال-دجاسسەرمەن ەكىجاقتى كەزدەسۋى ءوتتى، دەپ حابارلايدى ۇكىمەتتىڭ باسپا ءسوز قىزمەتى.
كەلىسسوزدەر بارىسىندا تاراپتار قازاقستانداعى باسىم ينفراقۇرىلىمدىق جوبالاردى قارجىلاندىرۋ سالاسىنداعى ىنتىماقتاستىقتى تەرەڭدەتۋ مۇمكىندىكتەرىن تالقىلادى. ارنايى ەكونوميكالىق جانە يندۋستريالىق ايماقتاردا ينجەنەرلىك جانە كولىك ينفراقۇرىلىمىن دامىتۋعا ەرەكشە نازار اۋدارىلدى. كەزدەسۋدىڭ نەگىزگى قورىتىندىسى وسى ماقساتتاردى جۇزەگە اسىرۋ ءۇشىن يسلام دامۋ بانكىنەن $1,1 ميللياردقا دەيىنگى سوماعا قارجى تارتۋ تۋرالى ۋاعدالاستىق بولدى.
قول جەتكىزىلگەن ۋاعدالاستىقتارعا قوسىمشا قازاقستان رەسپۋبليكاسىنىڭ ۇكىمەتى مەن يسلام دامۋ بانكى اراسىندا نيەتتەر تۋرالى حاتتاماعا قول قويىلدى. قۇجات تاراپتاردىڭ ارنايى ەكونوميكالىق جانە يندۋستريالىق ايماقتاردى دامىتۋ شەڭبەرىندە يسلامدىق قارجىلاندىرۋ قۇرالدارىن قولدانا وتىرىپ، جوبالاردى قارجىلاندىرۋ تەتىكتەرىن تاجىريبە جۇزىندە پىسىقتاۋعا ءوزارا دايىندىعىن كورسەتەدى.
اتالعان ىنتىماقتاستىقتى جۇزەگە اسىرۋ ەلدىڭ ينفراقۇرىلىمدىق دامۋىنا قۋاتتى سەرپىن بەرەدى، 1,6 تريلليون تەڭگەدەن استام ينۆەستيتسيالار اعىنىن قامتاماسىز ەتەدى جانە 16 مىڭنان استام جۇمىس ورنىن اشادى دەپ كۇتىلۋدە، بۇل ءوز كەزەگىندە قازاقستاننىڭ جەدەل يندۋستريالاندىرىلۋىنا جانە ەكونوميكالىق ءارتاراپتاندىرىلۋىنا ىقپال ەتەتىن بولادى.
بۇل باستاما 2024-جىلعى 25-ماۋسىمدا قول قويىلعان قازاقستان رەسپۋبليكاسىنىڭ ۇكىمەتى مەن يسلام دامۋ بانكى اراسىنداعى ستراتەگيالىق ءوزارا ءىس-قيمىل تۋرالى نەگىزدەمەلىك باعدارلامالىق كەلىسىمدە ايقىندالعان باعىتتى جالعاستىرادى. وسى كەلىسىم اياسىندا تاراپتار جالپى سوماسى $8 ميللياردتان اساتىن ينۆەستيتسيالىق جوبالاردى ىسكە اسىرۋ نيەتىن راستادى.
جۇزەگە اسىرۋدىڭ ءبىرىنشى كەزەڭى كليماتقا تۇراقتى سۋ رەسۋرستارىن دامىتۋ جوباسى بولدى، ول ءۇشىن يسلام دامۋ بانكى ءوز تاريحىنداعى ەڭ ءىرى قارىز - $1,15 ملرد سوماسىنا نەسيە بەردى. قاراجات جالپى ۇزىندىعى 3618 شاقىرىم بولاتىن 8 سۋ قويماسىن سالۋعا جانە رەكونسترۋكتسيالاۋعا، سونداي-اق 115 سۋارۋ كانالىن جاڭعىرتۋعا باعىتتالعان. جوبا ەلدىڭ سۋ جانە ەكولوگيالىق قاۋىپسىزدىگىن ارتتىرۋعا باعىتتالعان جانە اۋىل شارۋاشىلىعىن تۇراقتى دامىتۋ ءۇشىن نەگىز قالىپتاستىرادى.
كەزدەسۋ بارىسىندا «قازاقستاننىڭ دامۋ بانكى» ا ق - «بايتەرەك» ۇ ب ح» ا ق ەنشىلەس ۇيىمىنىڭ قاتىسۋىمەن يسلامدىق ينۆەستيتسيالاردى تارتۋ ماسەلەلەرىن قوسا العاندا، يسلامدىق قارجىلاندىرۋ سالاسىنداعى ىنتىماقتاستىقتىڭ نەگىزگى باعىتتارى بەلگىلەندى.
وسىعان دەيىن ۇكىمەتتىڭ گالليگە ەكسپورتتىق كەدەندىك باجدى الىپ تاستاعانى تۋرالى جازدىق.