قازاقستان يرانداعى قايعىلى وقيعالارعا بايلانىستى كوڭىل ايتتى

استانا. KAZINFORM - قازاقستان سىرتقى ىستەر مينيسترلىگىنىڭ رەسمي وكىلى ەرلان جەتىبايەۆ يرانداعى قايعىلى وقيعالارعا بايلانىستى يران حالقىنا كوڭىل ايتتى.

- كەيىنگى قايعىلى وقيعالار سالدارىنان بەيبىت تۇرعىنداردىڭ، ونىڭ ىشىندە بالالاردىڭ، سونداي-اق يسلام رەسپۋبليكاسىنىڭ جوعارى باسشىلىعى وكىلدەرىنىڭ قازا بولۋىنا بايلانىستى يران حالقىنا قايعىرىپ كوڭىل ايتامىز. قازاقستان دوستىق پەن جان-جاقتى ىنتىماقتاستىق قاتىناستارىن دايەكتى تۇردە دامىتىپ كەلە جاتقان جانە يرانعا قارسى سوعىسقا قاتىسپايتىن اراب مەملەكەتتەرىنىڭ ازاماتتىق نىساندارىنا جاسالعان سوققىلارعا بايلانىستى وكىنىش بىلدىرەدى.

حالىقارالىق گۋمانيتارلىق قۇقىق نورمالارىن ساقتاۋ قارۋلى قاقتىعىستار كەزىندە ازاماتتىق نىساندار مەن بەيبىت حالىقتى ەرەكشە قورعاۋدى تالاپ ەتەدى. قازاقستان حالىقارالىق گۋمانيتارلىق قۇقىققا ساياسي بەيىلدىلىكتى كۇشەيتۋ جونىندەگى جاھاندىق باستامانى ۇسىنۋشىلاردىڭ ءبىرى رەتىندە قارۋلى قاقتىعىستار جاعدايىندا ادامگەرشىلىكتى ساقتاۋدىڭ ماڭىزدىلىعىن اتاپ وتەدى. قازاقستان حالىقارالىق داۋلار مەن قاقتىعىستاردى حالىقارالىق قۇقىق نورمالارى مەن ب ۇ ۇ جارعىسىن قاتاڭ ساقتاي وتىرىپ، تەك ساياسي- ديپلوماتيالىق جولمەن رەتتەۋ قاجەتتىگى جونىندەگى ءوزىنىڭ قاعيداتتى ۇستانىمىنىڭ وزگەرمەيتىنىن راستايدى.

وڭىردەگى زورلىق-زومبىلىقتىڭ ودان ءارى ۋشىعۋىنا جول بەرمەۋ ماقساتىندا بارلىق تاراپتى بارىنشا ۇستامدىلىق پەن جاۋاپكەرشىلىك تانىتۋعا شاقىرامىز، - دەدى قازاقستان سىرتقى ىستەر مينيسترلىگىنىڭ رەسمي وكىلى ەرلان جەتىبايەۆ.

ەسكە سالا كەتەيىك، بۇعان دەيىن تاياۋ شىعىستاعى قازاقستاندىقتارعا ارنالعان بايلانىس پاكەتتەرى ىسكە قوسىلعانىن جازعان ەدىك.