قازاقستان ينتەرنەت ترافيكتى قىتاي مەن رەسەيدەن عانا ەمەس، ەۋروپادان تارتۋى مۇمكىن

ەۋروپالىق وداق قازاقستانداعى ينتەرنەت كوزدەرىن ءارتاراپتاندىرۋعا اتسالىسپاقشى. بۇل تۋرالى ەۋروپالىق وداقتىڭ قازاقستانداعى وكىلدىگى ىنتىماقتاستىق ءبولىمىنىڭ باسشىسى يوحاننەس باۋر ورتالىق ازيانىڭ ەۋرازيالىق قورى ۇيىمداستىرعان جيىندا ءمالىم ەتتى، دەپ حابارلايدى Kazinform.

«قازاقستانعا قازىر ينتەرنەت ترافيك رەسەيدەن جانە قىتايدان كەلەدى. ءبىزدىڭ جوبا قازاقستانعا ەۋروپالىق سپۋتنيك بايلانىسىن پايدالانۋ مۇمكىندىگىن ۇسىنعىسى كەلەدى. بۇل - ەۋروپالىق SES كومپانياسىنىڭ ءونىمى. مىسالى، Starlink جەردى تومەن وربيتامەن اينالسا، SES سپۋتنيكتەرى ورتا وربيتامەن اينالادى. ورتا وربيتاداعى سپۋتنيكتەر بۇكىل قازاقستاندى قامتي الادى. ارتىقشىلىعى سوندا. ءتىپتى بۇكىل ورتالىق ازيانى قامتيدى»، - دەيدى يوحاننەس باۋر.

ونىڭ سوزىنشە، اتالمىش جوبانى ەۋروكوميسسيا ماقۇلداپ وتىر.

«بۇل جوبانى ءبىز 2024 -جىلى وتەتىن «ورتالىق ازيا - ەۋروپالىق وداق» سامميتىندە تانىستىرعىمىز كەلەدى. جوبانىڭ ءبىرىنشى كەزەگىندە ەۋروپالىق وداق 20 ميلليون ەۋرو بولەدى. ءبىراق بۇل - بۇكىل ورتالىق ازياعا بولىنگەن سوما. ول قاراجاتتىڭ ۇلكەن بولىگى قازاقستان، قىرعىزستان مەن وزبەكستان ەلدەرىنە باعىتتالادى دەپ ويلايمىن. ەكىنشى كەزەكتە قاي ەلگە ناقتى قانشا بولىنەتىنى ازىرگە بەلگىسىز. ءبىراق بۇل ەۋروپا ينۆەستيتسيالىق بانكىنىڭ ۇلكەن كولەمدەگى نەسيەسى بولادى»، - دەدى ەۋروپالىق وداقتىڭ قازاقستانداعى وكىلدىگى ىنتىماقتاستىق ءبولىمىنىڭ باسشىسى يوحاننەس باۋر.