قازاقستان ورتالىق ازياداعى ەڭ قارقىندى دامىپ كەلە جاتقان ەكونوميكاعا يە - جوزەپ بوررەل

استانا. KAZINFORM - ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل Kazinform تىلشىسىنە قازاقستان رەسپۋبليكاسى كولىك مينيسترلىگى مەن ەۋروپالىق ينۆەستيتسيالىق بانك اراسىندا 500 ميلليون ەۋرو سوماسىنا ءوزارا تۇسىنىستىك تۋرالى مەموراندۋمعا قول قويۋ تۋرالى پىكىرىمەن ءبولىستى.

ونىڭ ايتۋىنشا، بۇل قازاقستان مەن ەۋرووداقتىڭ ەكونوميكالىق جاقىنداسۋىنا ىقپال ەتەدى. ەۋروپالىق ديپلوماتيا باسشىسى ورتالىق ازيا مەن ەۋرووداق اراسىندا ءوزارا كولىك بايلانىسى بويىنشا ينۆەستورلار فورۋمىنىڭ اشىلۋىنا قاتىستى.

«بۇگىن بريۋسسەلدە ورتالىق ازيا مەن ەۋرووداق اراسىندا ءوزارا كولىك بايلانىسى بويىنشا ينۆەستورلارىنىڭ «Global Gateway» اتتى ءبىرىنشى فورۋمى اياسىندا قازاقستان رەسپۋبليكاسىنىڭ كولىك مينيسترلىگى مەن ەۋروپالىق ينۆەستيتسيالار بانك اراسىندا 500 ميلليون ەۋرو سوماسىنا ءوزارا تۇسىنىستىك تۋرالى مەموراندۋمعا قول قويىلعانىنا قۋانىشتىمىن»، - دەدى جوزەپ بوررەل.

«بۇل قازاقستان مەن ەۋرووداقتىڭ ەكونوميكالىق جاقىنداسۋىنا ىقپال ەتەدى»، - دەپ اتاپ ءوتتى ول.

ول ەۋروپا استاناسىندا قول قويىلعان مەموراندۋم ترانسكاسپي حالىقارالىق كولىك باعىتىن ودان ءارى دامىتۋعا باعىتتالعانىن، بۇل ە و ەلدەرى مەن ورتالىق ازيا اراسىنداعى ترانزيتتىك الەۋەتتى ارتتىرۋعا مۇمكىندىك بەرەتىنىن باسا ايتتى.

قۇجات قازاقستان رەسپۋبليكاسىندا ەۋروپا مەن ورتالىق ازيا اراسىنداعى تۇراقتى كولىك بايلانىسى ماقساتتارىنا قول جەتكىزۋگە ىقپال ەتەتىن جوبالاردى قارجىلاندىرۋ مۇمكىندىگىن قاراستىرادى.

سونىمەن قاتار، بريۋسسەلدە قازاقستاننىڭ دامۋ بانكى مەن ەۋروپالىق ينۆەستيتسيالىق بانك اراسىندا 320 ميلليون ەۋرو سوماسىنا ءوزارا تۇسىنىستىك تۋرالى مەموراندۋمعا قول قويىلدى.

ەسكە سالا كەتسەك، بريۋسسەلدە ەۋروپا مەن ورتالىق ازيا اراسىنداعى تۇراقتى كولىك دالىزدەرىن دامىتۋ جونىندەگى «Global Gateway» ينۆەستيتسيالىق فورۋمى اياسىندا قازاقستان مەن ەۋروپالىق ارىپتەستەر اراسىندا قۇنى 800 ميلليون ەۋرودان اساتىن ءتورت قۇجاتقا قول قويىلدى.

اۆتور
زارينا تۋعانبايەۆا