قازاقستان وقۋشىلارى ەۋروپا وليمپياداسىندا جەتى مەدال جەڭىپ الدى

استانا. KAZINFORM - ليتۆادا وتكەن گەوگرافيا ءپانى بويىنشا ەۋروپا وليمپياداسىندا (EGeo) قازاقستان قۇراماسى جوعارى ناتيجە كورسەتىپ، جەتى مەدال يەلەندى.

ق ر وقۋ-اعارتۋ مينيسترلىگى مالىمەتىنشە، التىن مەدالدى ەلىمىزدىڭ قورجىنىنا تالدىقورعان قالاسىنداعى №24 مامانداندىرىلعان ليتسەيدىڭ 9-سىنىپ وقۋشىسى دارىن بەكبول سالدى. ول كىشى (جاسوسپىرىمدەر) ساناتىندا (12-15 جاس) ەڭ ۇزدىك اتاندى.

قولا جۇلدەنى شىمكەنت قالاسىنداعى ن ز م- ءنىڭ 9-سىنىپ وقۋشىسى ميكاەل پوچۋكايەۆ جەڭىپ الدى.

نەگىزگى (ۇلكەن) جاس ساناتىندا (16- 19 جاس) قازاقستان قۇراماسىنىڭ قورجىنىنا مەدال سالعاندار:

- قوستاناي قالاسىنداعى ن ز م 10-سىنىپ وقۋشىسى اندرەي ەنباحتوۆ؛

- تالدىقورعان قالاسىنداعى ن ز م 12-سىنىپ وقۋشىسى اقجول بولات؛

- اقتوبە قالاسىنداعى ن ز م 12-سىنىپ وقۋشىسى اليحان كالماگامبەتوۆ؛

- پاۆلودار قالاسىنداعى ن ز م 11-سىنىپ وقۋشىسى مانسۋر تۇرسىنعاليەۆ؛

- تالدىقورعان قالاسىنداعى ن ز م 10-سىنىپ وقۋشىسى راميل يماشيەۆ.

كوماندانىڭ جەتەكشىلەرى مەن جاتتىقتىرۋشىلارى - رەسپۋبليكالىق جانە حالىقارالىق وليمپيادالاردىڭ بىرنەشە دۇركىن جۇلدەگەرلەرى اباي دۇيسەن مەن اقبەرەن ايجارىق.

ايتا كەتەيىك، EGeo وليمپياداسى 2015 -جىلدان بەرى وتكىزىلىپ كەلەدى. باستى ماقسات - گەوگرافيا جانە ەكولوگيا سالاسىنا قىزىعۋشىلىقتى ارتتىرۋ.

بايقاۋ ءۇش كەزەڭنەن تۇرادى: جازباشا تەست، مۋلتيمەديالىق تاپسىرما جانە دالا تۋرى. بارلىق تاپسىرما اعىلشىن تىلىندە ورىندالادى. 2024 -جىلى قازاقستان قۇراماسى التى مەدال ەنشىلەگەن بولاتىن.

قازاقستاندىق وقۋشىلار بالقان ماتەماتيكالىق وليمپياداسىندا ەڭ ۇزدىك اتانعانىن جازعان ەدىك.