قازاقستان ە و- نىڭ ماڭىزدى ەكونوميكالىق سەرىكتەسىنە اينالىپ كەلەدى - ەۋرودەپۋتات
قاراشا ايى ەۋروپارلامەنت دەپۋتاتتارى مەن قازاقستاندىق ارىپتەستەر اراسىندا ساياسي بايلانىستارعا تولى بولدى.
بريۋسسەلدە قازاقستان رەسپۋبليكاسى - ەۋروپالىق وداق پارلامەنتتىك ىنتىماقتاستىق كوميتەتىنىڭ 20-وتىرىسى ءوتتى. سونداي-اق ەۋروپالىق دەپۋتاتتار «ورتالىق ازيا ەلدەرى ايەلدەرىنىڭ ديالوگى» اياسىندا قازاقستان پارلامەنتىنىڭ ءبىر توپ ايەل دەپۋتاتتارىمەن كەزدەستى. وسى ءىس-شارالار بارىسىند Kazinform اگەنتتىگىنىڭ مەنشىكتى ءتىلشىسى ەۋروپارلامەنت دەپۋتاتتارىنىڭ ە و مەن قازاقستان اراسىنداعى قارىم-قاتىناسى تۋرالى پىكىرىن سۇرادى.
«قازىر ەۋروپا قيىن كەزەڭدى باستان وتكەرىپ جاتىر، اتاپ ايتقاندا ۋكرايناداعى وقيعالار مەن تاياۋ شىعىستاعى جاعدايعا بايلانىستى. جالپى دۇنيە جۇزىندە ەكونوميكالىق جاعداي كۇردەلى بولىپ تۇر. ەنەرگيا كوزدەرىنىڭ باعاسى ءوسىپ، جاڭا ەكونوميكالىق بايلانىستار مەن ۇلگىلەر قالىپتاسىپ جاتىر. ەۋروپالىق وداق رەسەيمەن ەكونوميكالىق قارىم-قاتىناسىن ۇزۋگە ءماجبۇر بولدى. بىزگە ءوز ساۋدامىزدى ءارتاراپتاندىرۋعا تۋرا كەلەدى. ەكىنشى جاعىنان، ءبىز قىتاي سياقتى باسقا مەملەكەتتەرگە قاتتى تاۋەلدى بولعىمىز كەلمەيدى. وسىنىڭ اياسىندا ءبىز ورتالىق ازيا مەملەكەتتەرىندە، ەڭ الدىمەن قازاقستاندا ءوزىمىز ءۇشىن ماڭىزدى ساۋدا سەرىكتەستەرىن تابا الامىز دەپ ويلايمىن. الەمدە گەوساياسي جاعدايدىڭ وزگەرىپ جاتقانىن تاعى دا اتاپ وتكىم كەلەدى. بۇل رەتتە قازاقستاننىڭ كوپۆەكتورلى سىرتقى ساياساتتى ۇستاناتىنىن بىلەمىز. ءبىز ە و- دا قازاقستانمەن بايلانىسىمىزدى كەڭەيتۋگە نيەتتىمىز. ەڭ الدىمەن، ساۋدا، ەكونوميكا، ەنەرگيا يمپورتى سالاسىندا»، - دەدى ەۋروپارلامەنت دەپۋتاتى فرانسيسكو حوسە ميللان مون.
ليتۆالىق ەۋروپارلامەنت دەپۋتاتى راسا يۋكنياۆيچەنە قازاقستان گەوگرافيالىق تۇرعىدان ەۋروپاعا جاتپاعانىمەن، ە و- عا جاقىن ەل دەپ ەسەپتەيدى.
«كەڭەس وداعى جاۋلاپ العان ليتۆادا دۇنيەگە كەلگەن ادام رەتىندە مەن قازاقستان حالقى كەيبىر ەۋروپالىق مەملەكەتتەرگە قاراعاندا كەيدە بىزگە، ەۋروپالىقتارعا الدەقايدا جاقىن دەپ ەسەپتەيمىن. ستاليندىك قۋعىن-سۇرگىن كەزىندە قازاقستانعا جەر اۋدارىلعان ادامدارعا وڭ كوزقاراسپەن قارايتىندارى ءۇشىن قازاق حالقىنا دەگەن قۇرمەتىم جوعارى. سول سەبەپتى قازاقستانمەن كوبىرەك بىرگە جۇمىس ىستەۋ كەرەكتىگىن تۇسىنەمىن»، - دەپ اتاپ ءوتتى ەۋروپارلامەنت دەپۋتاتى.