قازاقستان تۋىنىڭ بيىكتە جەلبىرەگەنىن ارماندايمىن - گيمناست اقمارال ەرەكەشيەۆا
استانا. KAZINFORM - قازاقستاندىق جاس گيمناست اقمارال ەرەكەشيەۆا كوركەم گيمناستيكادان جاس وسپىرىمدەر اراسىنداعى الەم چەمپيوناتىندا ەلىمىزگە ەكى التىن مەدال سىيلاپ، تاريحتا العاش رەت چەمپيون اتاندى. ول جەڭىستەن كەيىنگى اسەرىمەن، ارماندارىمەن جانە الداعى سپورتتىق ماقساتتارىمەن Kazinform اگەنتتىگىنىڭ تىلشىسىمەن ءبولىستى.
- اقمارال، ءسىز قازاقستان تاريحىندا تۇڭعىش رەت جاس وسپىرىمدەر اراسىنداعى الەم چەمپيونى اتاندىڭىز. سول ساتتەگى سەزىمىڭىز ەسىڭىزدە مە؟
- ونى سوزبەن جەتكىزۋ قيىن، كەرەمەت سەزىمدەر بولدى. العاشىندا ءبارى ءتۇس سياقتى كورىندى. چەمپيون ەكەنىمدى ەستىگەندە ويىما ەڭ ءبىرىنشى كەلگەنى: «ءبىز مۇنى جاسادىق!» دەگەن وي بولدى. قۋانىش، ماقتانىش، تولقۋ - ءبارى ءبىر ساتتە كەلدى. ەڭ باستىسى - مەن تەك مەدال ۇتىپ قانا قويماي، ەلىم ءۇشىن ماڭىزدى قادام جاساعانىمدى سەزىندىم. بۇل ءسات مەنىڭ جۇرەگىمدە ماڭگى قالادى.
- گيمناستيكاعا قالاي كەلدىڭىز؟
- مەنى ءتورت جاسىمدا انام استاناداعى گيمناستيكا زالىنا الىپ كەلدى. سول كەزدەن بەرى مەنىمەن بىرگە كەلە جاتقان العاشقى جانە قازىرگى جاتتىقتىرۋشىم - بالعىنبايەۆا مەرۋەرت تولەگەن قىزى. ول ماعان العاشقى كۇننەن سەنىم ارتتى، سول سەنىم ەشقاشان سونگەن جوق. ونىڭ ارقاسىندا مەن گيمناستيكانى جان-تانىممەن جاقسى كورىپ، بار كۇشىمدى سالىپ ەڭبەك ەتۋدى ۇيرەندىم. ول - مەنىڭ ۇستازىم، تالىمگەرىم، بارلىق جەتىستىگىم ءۇشىن وعان شەكسىز ريزامىن.
- سوفياداعى الەم چەمپيوناتىنا دايىندىق قالاي ءوتتى؟
- بۇل وتە قيىن كەزەڭ بولدى. كۇن سايىن تىنىمسىز دايىندىق جاساپ، ءار قيمىلدى قايتالاپ جاتتىقتىق. ەلەمەنتتەر، بۇرىلىستار، ءار قيمىلدىڭ سۇلۋلىعىنا ءمان بەردىك. كەيدە قاتتى شارشاپ، كەي نارسە شىقپاي قالىپ ءجۇردى. ءبىراق نە ءۇشىن تىرىسىپ جۇرگەنىمدى جاقسى ءبىلدىم. ەڭ ماڭىزدىسى - قولداۋ. جاتتىقتىرۋشىم ءاردايىم جانىمدا بولىپ، سەنىمىمدى كۇشەيتىپ، دۇرىس كوڭىل-كۇي سىيلاي الدى. سول سەبەپتى جارىسقا سەنىمدىلىكپەن شىقتىم.
- ايتىلماي كەلگەن ارمانىڭىز بار ما؟
- ەندى ايتۋعا بولادى دەپ ويلايمىن. مەن ءاربىر ونەر كورسەتۋىمدە قازاقستان تۋى بيىكتە جەلبىرەي بەرسە ەكەن دەپ ارماندايمىن. ەلىمدى ادەمى، تازا، لايىقتى ونەرىممەن قۋانتقىم كەلەدى. ارينە، بۇل مەنىڭ سوڭعى التىندارىم بولماسا ەكەن دەپ تە ارماندايمىن.
- ءسىزدى گيمناستيكادا كىمدەر شابىتتاندىرادى؟ سۇيىكتى سپورتشىڭىز بار ما؟
- ماعان كوپتەگەن گيمناست قىزدار شابىت سىيلايدى، ءارقايسىسىنىڭ ءوز ەرەكشەلىگى بار. ءبىراق گەرمانيادان داريا ۆارفولومەيەۆ ماعان ەرەكشە جاقىن. ونىڭ تەحنيكاسى، قيمىلدارىنىڭ تازالىعى جانە كىلەمدە ءوز-وزىنە سەنىمدىلىگىنە ءتانتىمىن. ونىڭ ونەرىنەن كۇش، تىنىشتىق پەن سۇلۋلىق سەزىلەدى. مەن دە سول سياقتى تۇراقتى، مىقتى، تازا ونەر كورسەتۋگە ۇمتىلامىن.
- زالدا ەڭ قيىن كۇندى ەسكە ءتۇسىرىڭىزشى. قالاي ەڭسەردىڭىز؟
- مۇنداي ساتتەر ءار گيمناستىڭ باسىنان وتەدى. كەيدە ءبارى قولىڭنان كەلمەي، كۇشىڭ سارقىلعانداي بولادى. وندايدا قاسىڭداعى ادامداردىڭ قولداۋى اسا ماڭىزدى. جاتتىقتىرۋشىم ءاردايىم دۇرىس ءسوز تابا ءبىلدى. ول مەنى جىگەرلەندىرىپ، سەنىمىن كورسەتتى. سول ارقىلى ءوزىمدى جيناپ، ارى قاراي ەڭبەك ەتۋگە كۇش سالدىم. وسىنداي قيىن ساتتەردە كوماندانىڭ، سەنىمنىڭ ماڭىزى ەرەكشە ەكەنىن تۇسىنەسىڭ.
- سپورتتان تىس نەمەن اۋەستەنەسىز؟ قايدان كۇش-قۋات جينايسىز؟
- سۋرەت سالعاندى قاتتى ۇناتامىن. قالام نەمەسە قارىنداشتى قولعا العان ساتتە تىنىشتالىپ، ويىم ءبولىنىپ، ءوزىمدى تابامىن. كەيدە كىلەمدە سەزىنگەنىمدى قاعازعا تۇسىرەمىن نەمەسە ونەرىمە ارنالعان وبرازدار ويلاپ تابامىن.
- وقۋ مەن سپورتتى قاتار الىپ ءجۇرۋ قيىن ەمەس پە؟
- ءيا، ەكەۋىن بىرگە الىپ ءجۇرۋ وڭاي ەمەس. جاتتىعۋدان كەيىن دەمالعىڭ كەلەدى، ءبىراق بارلىعىن الدىن الا جوسپارلاپ، كەيىنگە قالدىرماي جاساۋعا تىرىسامىن. مۇعالىمدەرىم دە تۇسىنىستىكپەن قاراپ، مەنىڭ ماڭىزدى جاتتىعۋلارىم مەن جارىستارىمدى ەسكەرىپ وتىرادى. ەڭ باستىسى - وزىڭە سەنىپ، كۇن سايىن كىشكەنە بولسىن العا قادام جاساۋعا ۇمتىلۋ.
- گيمناستيكاداعى ەڭ سۇيىكتى ەلەمەنتىڭىز قايسى؟
- ەڭ جاقسى كورەتىنىم - بۇرىلىستار. ولار جەڭىل جانە ءدال ورىندالعان كەزدە ەرەكشە راحاتقا بولەيدى. بۇرىلىستا ەركىندىك پەن كۇشتى سەزىنەمىن. جاڭا تۇرلەرىن بايقاپ، كۇردەلەندىرىپ، سودان سۇلۋلىق تابۋعا تىرىسامىن.
ايتا كەتەيىك، اقمارال ەرەكەشيەۆا جاس وسپىرىمدەر اراسىنداعى الەم چەمپيوناتىندا ەكى التىن جانە ءبىر كۇمىس مەدال جەڭىپ الدى. ول الدىمەن دوپپەن جاتتىعۋدا توپ جارىپ، كەيىن لەنتامەن فينالدا دا ۇزدىك اتاندى.