قازاقستان تۇرىكمەنستانعا ەكسپورت كولەمىن 120 ميلليون دوللارعا دەيىن ۇلعايتۋعا دايىن - پرەزيدەنت

استانا. KAZINFORM - مەملەكەت باسشىسى تۇرىكمەنستان پرەزيدەنتىمەن كەڭەيتىلگەن قۇرامدا كەلىسسوز جۇرگىزدى، دەپ حابارلايدى اقوردانىڭ باسپا ءسوز قىزمەتى.

قاسىم-جومارت توقايەۆ بۇل ساپارىن ورتاق ماقساتقا قول جەتكىزۋ، ياعني سانقىرلى مەملەكەتارالىق بايلانىستى مۇلدەم جاڭا دەڭگەيگە كوتەرۋ جولىنداعى ماڭىزدى قادام دەپ اتادى.

- قازاقستان مەن تۇرىكمەنستان عاسىرلار بويى جالعاسقان دوستىققا، تاتۋ كورشىلىك قارىم- قاتىناسقا جانە ورتاق مادەني، تاريحي قۇندىلىقتارعا ارقا سۇيەي وتىرىپ، باۋىرلاس مەملەكەتتەر رەتىندە بەرىك ءارى ۇيلەسىمدى بايلانىس قۇرا ءبىلدى. ءبىزدىڭ وسىناۋ ىنتىماقتاستىعىمىز ستراتەگيالىق سەرىكتەستىك باعىتىندا دامىپ كەلەدى، - دەدى پرەزيدەنت.

مەملەكەت باسشىسىنىڭ ايتۋىنشا، سوڭعى جىلدارى ساۋدا-ەكونوميكالىق ىنتىماقتاستىقتا ايتارلىقتاي ىلگەرىلەۋ بار. سونىمەن قاتار قازاقستان تۇرىكمەنستانعا ەكسپورتتىڭ جالپى كولەمىن 80 تاۋار ءتۇرى بويىنشا 120 ميلليون دوللارعا دەيىن ۇلعايتۋعا دايىن ەكەنىن مالىمدەدى.

پرەزيدەنت ەكى ەلدىڭ ىسكەر توپتارى اراسىنداعى بايلانىسقا قولداۋ كورسەتۋدىڭ ماڭىزىنا توقتالدى.

- ماعان باياندالعان مالىمەتكە سايكەس، شاعىن جانە ورتا بيزنەس ينۆەستيتسيالىق الەۋەتكە يە ەكەنىن كورسەتىپ وتىر. بىلتىر قازاقستان كومپانيالارىنىڭ تۇرىكمەنستانعا بيزنەس تۋرى ۇيىمداستىرىلدى. وسى ورايدا قازاق-تۇرىكمەن ىسكەرلىك كەڭەسى الاڭىندا كاسىپكەرلەردىڭ بەلسەندىلىگىن ىنتالاندىرۋ اسا ماڭىزدى. ىسكەرلىك ورتا نەگىزگى قوزعاۋشى كۇشكە اينالۋى كەرەك. ەكى ەلدىڭ ءىرى كوممەرتسيالىق جانە ۇلتتىق كومپانيالارىنىڭ كۇش-جىگەرىن ونەركاسىپ، قۇرىلىس، لوگيستيكا، بايلانىس جانە ەكونوميكانىڭ باسقا دا سالالارىنداعى ناقتى جوبالاردى ىسكە اسىرۋعا جۇمىلدىرعان ءجون دەپ سانايمىن. بۇگىن قول قويىلاتىن ينۆەستيتسيالاردى ىنتالاندىرۋ جانە ءوزارا قورعاۋ تۋرالى ۇكىمەتارالىق كەلىسىم بۇل ۇدەرىسكە تىڭ سەرپىن بەرەتىنىنە سەنىمدىمىن، - دەدى قاسىم-جومارت توقايەۆ.

قازاقستان پرەزيدەنتى مادەني-گۋمانيتارلىق قارىم-قاتىناستاردىڭ دايەكتى تۇردە دامىپ كەلە جاتقانىن، سونداي-اق جوعارى ءبىلىم سالاسىنداعى ىنتىماقتاستىقتىڭ كەلەشەگى كەمەل ەكەنىن جەتكىزدى.

مەملەكەت باسشىسى ورايلى ءساتتى پايدالانىپ، تۋىسقان تۇرىكمەن حالقىن ايگىلى اقىن ماقتىمق ۇلى پىراعىنىڭ 300 جىلدىق مەرەيتويىمەن قۇتتىقتادى.

سەردار بەردىمۇحامەدوۆ قازاقستان پرەزيدەنتىنىڭ تۇرىكمەنستانعا ساپارى ەكىجاقتى ىقپالداستىقتى كەڭەيتۋ تۇرعىسىنان ماڭىزدى دەپ سانايدى

- قازاقستان پرەزيدەنتىنىڭ رەسمي ساپارى ەلدەرىمىز اراسىنداعى تاتۋ كورشىلىك پەن تىعىز ارىپتەستىك بايلانىستاردى ودان ءارى نىعايتۋعا، سەرىكتەس سالالارداعى ءوزارا ىقپالداستىقتى كەڭەيتۋگە، پەرسپەكتيۆتى باعىتتاردى دامىتۋعا وڭ اسەر ەتەدى. قازاق- تۇرىكمەن قارىم- قاتىناسى عاسىرلار قويناۋىنان تامىر تارتادى. وسى ۋاقىت ىشىندە شىنايى باۋىرلاستىق بايلانىس قالىپتاستى. قوس مەملەكەت پەن حالىقتارىمىزدى گەوگرافيالىق ورنالاسۋى عانا ەمەس، ءبىرتۇتاس تاريحي تاعدىرلاستىقتى سەزىنۋى مەن ءبىر-بىرىنە قاجەت ەكەنىن ءتۇسىنۋى بىرىكتىرەدى. ءبىز ورتاق قۇندىلىقتارىمىزدى قاستەرلەيمىز، بابالاردان مۇراعا قالعان ءداستۇرىمىزدى قۇرمەتتەيمىز ءارى مۇقيات ساقتايمىز، - دەدى سەردار بەردىمۇحامەدوۆ.

كەزدەسۋ بارىسىندا ساۋدا-ەكونوميكالىق ىنتىماقتاستىقتىڭ قازىرگى احۋالى مەن بولاشاعى تالقىلاندى. گاز سالاسىنداعى بىرلەسكەن باستامالاردى جۇزەگە اسىرۋ، ءوزارا ساۋدا مەن ەكى ەلدىڭ اۋماعى ارقىلى تاسىمالداناتىن جۇك كولەمىن جۇيەلى تۇردە ارتتىرۋ، سونداي-اق ءوڭىرارالىق ىقپالداستىقتى جانداندىرۋ ماسەلەلەرىنە ايرىقشا ءمان بەرىلدى.

وسىعان دەيىن قاسىم-جومارت توقايەۆ پەن سەردار بەردىمۇحامەدوۆ شاعىن قۇرامدا كەلىسسوز جۇرگىزگەنىن جازعان ەدىك.