قازاقستان تۇركيانىڭ ب ۇ ۇ-عا جولداعان حاتىنا قول قويدى

استانا. KAZINFORM - تۇركيا ب ۇ ۇ-عا 52 مەملەكەت پەن ەكى حالىقارالىق ۇيىمنىڭ يزرايلگە قارۋ ەمبارگوسىن ەنگىزۋ تۋرالى ۇندەۋى بار حات جولدادى.

Anadolu Ajansi اگەنتتىگىنىڭ حابارلاۋىنشا، بۇعان دەيىن تۇركيا سىرتقى ىستەر ءمينيسترى حاكان فيداننىڭ ۇسىنىسى بويىنشا ب ۇ ۇ-دا يزرايلگە قارۋ-جاراق پەن وق-دارىلەردى ساتۋدى توقتاتۋ ماسەلەسىنە حالىقارالىق قاۋىمداستىقتىڭ نازارىن اۋدارۋ ماقساتىندا بىرلەسكەن ۇندەۋ باستاماسى كوتەرىلگەن بولاتىن.

باستاما يزرايلگە قارۋ-جاراق پەن وق-ءدارى ساتۋدى توقتاتۋ ارقىلى باسىپ الىنعان پالەستينا اۋماقتارىندا، اسىرەسە گازا سەكتورىندا يزرايلدىڭ حالىقارالىق قۇقىقتى، سونىڭ ىشىندە حالىقارالىق گۋمانيتارلىق قۇقىق پەن ادام قۇقىقتارىن بۇزۋىنىڭ الدىن الۋدى كوزدەيدى.

حاتتا گازا سەكتورىن قوسا العاندا، باسىپ الىنعان پالەستينا جەرلەرىندە، سونداي-اق ليۆاندا جانە تاياۋ شىعىستىڭ باسقا ايماقتارىندا زورلىق-زومبىلىق پەن حالىقارالىق قۇقىقتىڭ بۇزىلۋىنىڭ كۇشەيۋىنە تەرەڭ الاڭداۋشىلىق بىلدىرىلگەن.

ۇندەۋدە يزرايل ارەكەتتەرىنىڭ سالدارىنان قۇربان بولعان بەيبىت تۇرعىندار، نەگىزىنەن ايەلدەر مەن بالالار سانى كۇن سايىن ارتىپ وتىرعانى اتاپ ءوتىلدى. بۇل قاۋىپتى تەندەنتسيانى توقتاتۋ ءۇشىن شۇعىل شارالار قابىلداۋ قاجەتتىلىگى كورسەتىلگەن.

حات 1-قاراشادا ب ۇ ۇ-نىڭ باس حاتشىسى انتونيۋ گۋتەرريشكە، قاراشادا ب ۇ ۇ قاۋىپسىزدىك كەڭەسىنە ءتوراعالىق ەتەتىن ۇلىبريتانياعا جانە ب ۇ ۇ باس اسسامبلەياسىنىڭ ءتوراعاسى فيليمون يانگقا جىبەرىلدى.

تۇركيا تەل-اۆيۆتىڭ ايماقتاعى، يزرايلگە وق-دارىلەردى جەتكىزۋدى دەرەۋ توقتاتۋدى حالىقارالىق قاۋىمداستىقتىڭ زاڭدى مىندەتى جانە مورالدىق بورىشى دەپ سانايدى.

حاتقا قول قويعان ەلدەر: تۇركيا، پالەستينا، باحرەين، بانگلادەش، بىرىككەن اراب امىرلىكتەرى، بوليۆيا، برازيليا، برۋنەي-دارۋسسالام، بۋركينا-فاسو، الجير، دجيبۋتي، قىتاي حالىق رەسپۋبليكاسى، يندونەزيا، ماروككو، گامبيا، وڭتۇستىك افريكا رەسپۋبليكاسى، يراك، يران، كاتار، قازاقستان، قىرعىزستان، كولۋمبيا، كومور ارالدارى وداعى، كۋۆەيت، كۋبا، ليۆيا، ليۆان، مالديۆ ارالدارى، مالايزيا، مەكسيكا، مىسىر، ماۆريتانيا، ناميبيا، نيگەريا، نيكاراگۋا، نورۆەگيا، پاكىستان، رەسەي، سەنت-ۆينسەنت جانە گرەنادين ارالدارى، سان-تومە جانە پرينسيپي، سەنەگال، سومالي، سۋدان، ساۋد ارابياسى، چيلي، تۋنيس، ومان، يوردانيا، ۆەنەسۋەلا، ۆەتنام، يەمەن جانە زيمبابۆە.

سونداي- اق قۇجاتقا اراب مەملەكەتتەرى ليگاسى (ا م ل) مەن يسلام ىنتىماقتاستىعى ۇيىمى (ي ى ۇ) قول قويدى.

وسىعان دەيىن وپەك+ سەگىز مۇشەسى مۇناي ءوندىرۋدى ەرىكتى تۇردە قىسقارتۋ مەرزىمىن ءبىر ايعا ۇزارتقانى تۋرالى جازعان ەدىك.

اۆتور

زارينا تۋعانبايەۆا