قازاقستان تەمىرجولى مەن «وپەراتور روپ» - تا ءا. نازاربايەۆانىڭ ۇلەسى قالدى ما - مينيسترلەر جاۋابى
ۇكىمەت وتىرىسىنان كەيىن ءوتىپ جاتقان باسپا ءسوز كونفەرەنسياسىندا كولىك ءمينيسترى مەن ەكولوگيا جانە تابيعي رەسۋرستار مينيسترىنە ءاليا نازاربايەۆانىڭ «قازاقستان تەمىرجولى» جانە «وپەراتور روپ» كاسىپورىندارىنىڭ قۇرىلىمىنداعى قازىرگى مارتەبەسى تۋرالى سۇراق قويىلدى، دەپ حابارلايدى Kazinform.
«ءبىزدىڭ مالىمەتىمىز بويىنشا، ءاليا نازاربايەۆا حانىمنىڭ «ق ت ج» - دا جولاۋشى بيلەتىن ساتىپ الۋ باعدارلاماسى بويىنشا بيزنەس ۇلەسى بولعان. سونداي- اق، قوقىس شىعارۋ جۇيەسىندە بيزنەسى بولعان. وسى كاسىپورىنداعى نازاربايەۆا حانىمنىڭ مارتەبەسى تۋرالى ايتىڭىزدارشى، ءالى دە بيزنەس ۇلەسى بار ما؟» - دەپ سۇرادى ب ا ق وكىلى.
ەكولوگيا جانە تابيعي رەسۋرستار ءمينيسترى ەرلان نىسانبايەۆ قوقىس شىعارۋ قىزمەتىندە ءاليا نازاربايەۆانىڭ ۇلەسى قالماعانىن رەسمي مالىمدەدى.
«روپ» - قازىر 100 پايىز مەملەكەتتىك كاسىپورىن. ءيا، بۇعان دەيىن جەكە مەنشىك كاسىپورىن بولعان. سول ادامنىڭ كاسىپورنى بولعان شىعار، ناقتى بىلمەيمىن. ءبىراق، بۇگىنگى تاڭدا «روپ» مەملەكەتتىك كاسىپورىن رەتىندە جۇمىس ىستەپ تۇر. مەن رەسمي مالىمدەيمىن، قوقىس شىعارۋ كومپانياسى بويىنشا دا، قوقىستى قايتا وڭدەۋ، سۇرىپتاۋ باعىتىندا دا نازاربايەۆانىڭ قاتىسى جوق»، - دەدى مينيستر.
كولىك ءمينيسترى مارات قارابايەۆ ءاليا نازاربايەۆانىڭ «ق ت ج» قىزمەتىنە دە قازىر قاتىسى جوق ەكەنىن ايتتى.
«ءبىز قوسىمشا انىقتادىق. ءسىز اتاعان تۇلعانىڭ «ق ت ج» قىزمەتىنە قازىر ەشقانداي قاتىسى جوق. قۇرىلىمىندا ونىڭ ەشبىر ۇلەسى جوق»، - دەدى كولىك ءمينيسترى.
اۆتور
ەسىمجان ناقتىباي