قازاقستان سيرەك جەر ەلەمەنتتەرى بويىنشا الەمدىك وندىققا كىرۋى مۇمكىن
استانا. قازاقپارات - 2022 -جىلى ەل اۋماعىندا 11 ۋچاسكەدە سيرەك مەتالداردى ىزدەستىرۋ جۇمىسى باستالىپ، بىلتىر اياقتالدى. زەردەلەۋ جۇمىسىنىڭ ناتيجەسى تۋرالى تولىعىراق ونەركاسىپ جانە قۇرىلىس مينيسترلىگى گەولوگيا كوميتەتى ءتوراعاسىنىڭ ورىنباسارى مارعۇلان بايباتىروۆ ايتىپ بەردى.
- بۇگىندە تاۋ-كەن مەتاللۋرگيا سالاسىن ەل ەكونوميكاسىنىڭ قوزعاۋشى كۇشى دەپ ەسەپتەيمىز. مەملەكەتتىك بيۋدجەتكە تۇسەتىن نەگىزگى كىرىستەر تابيعي رەسۋرستار ەسەبىنەن تۇسەدى. بۇل سالا ءبىز ءۇشىن اسا ماڭىزدى. 2018 -جىلى جەر قويناۋى جانە جەر قويناۋىن پايدالانۋ تۋرالى كودەكس ەنگىزىلدى. كودەكس ءبىرقاتار جاڭاشىلدىق الىپ كەلدى، ءقازىر سالاعا جاڭا كومپانيالار كەلىپ جاتىر. ءبىزدىڭ سالاعا حالىقارالىق دەڭگەيدەگى ءىرى ينۆەستورلار تارتىلدى، شامامەن 10 شاقتى ءىرى ينۆەستور قازاقستانعا كەلىپ، بەلسەندى جۇمىس ىستەپ جاتىر، - دەدى مارعۇلان بايباتىروۆ ەلوردادا ءوتىپ جاتقان Ⅲ حالىقارالىق «قازاقستاننىڭ تاۋ-كەن» كونگرەسىندە.
ودان ءارى مامان گەولوگيالىق زەردەلەۋ جۇمىستارىنا توقتالدى.
- 2022 -جىلى ءبىز 11 ۋچاسكەدە سيرەك مەتالداردى ىزدەستىرۋ جۇمىسىن باستادىق، بىلتىر ول جۇمىس اياقتالدى، قازىر بىزدە قۋانتارلىق ناتيجە بار. وتە ءىرى كەن ورنى انىقتالدى، ياعني سيرەك جەر ەلەمەنتتەرىنىڭ كەن ورنى، مۇندا شامامەن 17 كومپونەنت بار. ولاردىڭ قاتارىندا لانتانويدتار، تەللۋريدتەر جانە باسقا دا ەلەمەنتتەر بار. بۇل بولاشاعى زور ۋچاسكە. ەگەر بولجامدى قوردىڭ ءبىر بولىگى راستالسا، ءبىز سيرەك جەر ەلەمەنتتەرىنىڭ ءىرى قورى بويىنشا الەم ەلدەرىنىڭ العاشقى وندىعىنا كىرە الامىز. سيرەك جەر كومپونەنتتەرى نەگىزىنەن ەلەكترونيكا وندىرىسىندە قولدانىلادى. ءقازىر جاڭا تەحنولوگيالار جاقسى دامىپ جاتىر جانە ولار سيرەك جەر ەلەمەنتتەرىن تالاپ ەتەدى. ەلەكتروموبيلدەر دە قارقىندى دامىپ كەلەدى، تيىسىنشە، وسىنداي تەحنولوگيالىق وندىرىستەر ءۇشىن شيكىزات قاجەت، - دەيدى ول.
گەولوگيا كوميتەتى وكىلىنىڭ ايتۋىنشا، سالادا كادر ماسەلەسى - وتە وزەكتى.
- سالاعا رەفورما جۇرگىزىلگەن جىلدارى ءبىز شامامەن 3000 ليتسەنزيا بەردىك. سايكەسىنشە، ولاردى كادرمەن قامتاماسىز ەتۋ قاجەت. قازىر گەولوگيا نارىعىندا، ناقتى بىلىكتى گەولوگتار تاپشى. ءبىزدىڭ مالىمەتتەرىمىز بويىنشا، گەولوگتار دايارلاعان جوعارى وقۋ ورىندارىنىڭ تۇلەكتەرى 0 جۇمىسقا ورنالاسادى. بۇل دەگەنىمىز ستۋدەنت وقۋىن اياقتاعان بويدا جۇمىسقا ورنالاسۋىنىڭ ايقىن كورسەتكىشى. تاۋ-كەن سالاسىنداعى جالاقى وتە جوعارى. بۇل وتە بەدەلدى ماماندىق. ءبىراق، ءبىر كەزدەرى بۇل ماماندىققا سۇرانىس ازايعان بولۋى مۇمكىن. بۇگىندە بىلىكتى گەولوگتار مەن جاڭا بۋىن اراسىنداعى الشاقتىق شامامەن 30 جىل، ياعني 30 جىلدىق ءۇزىلىس بار. بۇل ءۇزىلىس سالدارىن تيگىزىپ وتىر، - دەپ تولىقتىردى م. بايباتىروۆ.
ايتا كەتەيىك، بۇگىن استانادا Ⅲ حالىقارالىق «قازاقستاننىڭ تاۋ-كەن» كونگرەسى ءوتىپ جاتىر. ءىس-شاراعا وتاندىق مامانداردان بولەك، ورتالىق ازيا ەلدەرىنەن كەلگەن گەولوگتار، ساراپشىلار مەن كومپانيا باسشىلارى مەن وكىلدەرى قاتىسىپ جاتىر. سونداي-اق تاۋ-كەن ءوندىرىسى مەن تەحنولوگياسىنا ارنالعان كورمە ۇيىمداستىرىلعان.
تاياۋدا عانا ەكسپورتتىق شەكتەۋدەن سيرەك جەر ەلەمەنتتەرىنىڭ باعاسىن شارىقتاتىپ جىبەرگەنىن جازعان ەدىك.
اۆتور
داۋلەت ىزتىلەۋ