قازاقستان سينگاپۋردىڭ ورتالىق ازيا ەلدەرىمەن ىنتىماقتاستىعىن نىعايتۋعا ىقپال ەتەدى - ۆونگ

استانا. KAZINFORM - پرەزيدەنت قاسىم-جومارت توقايەۆ جاقىندا سينگاپۋردىڭ پرەمەر-ءمينيسترى لاۋازىمىنا تاعايىندالعان لوۋرەنس ۆونگتى قۇتتىقتاپ، ونىڭ جاڭا مەملەكەتتىك قىزمەتىنە تابىس تىلەدى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى سينگاپۋر قازاقستاننىڭ وڭتۇستىك-شىعىس ازياداعى ستراتەگيالىق سەرىكتەسى ەكەنىن اتاپ ءوتىپ، ەكى ەل اراسىنداعى كوپجىلدىق ىقپالداستىققا جوعارى باعا بەردى.

- ءبىز سينگاپۋرمەن اراداعى كوپجاقتى ىنتىماقتاستىقتى دامىتۋعا باسا ءمان بەرەمىز. ەكى ەل اراسىنداعى تىعىز بايلانىستىڭ ۇزاق جىلدار بويى بەرىك ءداستۇرى قالىپتاسقان. مەن سينگاپۋرمەن قارىم- قاتىناس ورناتۋعا تىكەلەي اتسالىستىم. 1970-جىلدارى جاس ديپلومات رەتىندە ماعان سينگاپۋردا قىزمەت ەتۋ باقىتى بۇيىردى. ءوزىم جۇمىس ىستەگەن جەردىڭ مەكەنجايى دا ءالى ەسىمدە - Nassim road 51 ، - دەدى قاسىم-جومارت توقايەۆ.

قازاقستان پرەزيدەنتى سينگاپۋردىڭ وتە قارقىندى دامىپ كەلە جاتقانىن، سونداي-اق بۇل ەلدىڭ الەمدىك ەكونوميكادا جەتەكشى ورىن الاتىنىن ايتتى.

قاسىم-جومارت توقايەۆ ءوزىنىڭ سينگاپۋرعا العاشقى مەملەكەتتىك ساپارى ەكىجاقتى قاتىناستارعا تىڭ سەرپىن بەرەتىنىنە سەنىم ءبىلدىرىپ، ول ءۇشىن قاجەتتى قولداۋ كورسەتۋگە دايىن ەكەنىن جەتكىزدى.

مەملەكەت باسشىسىنىڭ ايتۋىنشا، وسى ساپار اياسىندا جەتەكشى جەرگىلىكتى كومپانيالاردىڭ باسشىلارىمەن كەزدەسىپ، ءوزارا مۇددەنى كوزدەيتىن ناقتى بيزنەس-جوبالاردى تالقىلاۋ جوسپارلانىپ وتىر.

سينگاپۋر پرەمەر-ءمينيسترى ءوزارا ءتيىمدى ىنتىماقتاستىقتى دامىتۋ ءۇشىن مول الەۋەت بار ەكەنىن اتاپ ءوتتى.

لوۋرەنس ۆونگ ەكى ەلدىڭ ەكونوميكاسى ءبىر- ءبىرىن تولىقتىراتىنىن جانە سينگاپۋر اسەان ەلدەرىمەن ىقپالداستىقتى كەڭەيتۋدە قازاقستان ءۇشىن وزىندىك حاب بولا الاتىنىن، ال قازاقستان سينگاپۋردىڭ ورتالىق ازيا ەلدەرىمەن ىنتىماقتاستىعىن نىعايتۋعا ىقپال ەتەتىنىن مالىمدەدى.

كەزدەسۋدە ەكونوميكالىق جانە ينۆەستيتسيالىق ىقپالداستىق پەرسپەكتيۆالارىنا ەرەكشە نازار اۋدارىلدى. تاراپتار جاسىل ەنەرگەتيكا، كولىك جانە لوگيستيكا، سيفرلاندىرۋ، قارجى، اگروونەركاسىپ كەشەنى، كوممۋنيكاتسيا، اسا ماڭىزدى شيكىزاتتى ءوندىرۋ جانە وڭدەۋ، ەلەكتروندى كوممەرتسيا سياقتى سالالارداعى ىنتىماقتاستىقتى نىعايتۋ مۇمكىندىكتەرىن قاراستىردى.

قاسىم-جومارت توقايەۆ پەن لوۋرەنس ۆونگ الماتى وبلىسىندا سينگاپۋرلىق Surbana Jurong كومپانياسىنىڭ قاتىسۋىمەن Alatau City (G4 City) سياقتى اسا ءىرى جوبانى ىسكە اسىرۋدى، سونداي- اق ترانسكاسپي حالىقارالىق كولىك باعىتىنىڭ الەۋەتىن ارتتىرۋعا باعىتتالعان PSA International جانە «قازاقستان تەمىر جولى» ا ق اراسىنداعى سەرىكتەستىكتى قۇپتادى.

كەزدەسۋدە ءبىلىم جانە عىلىم سالاسىنداعى قارىم-قاتىناستى نىعايتۋ، ونىڭ ىشىندە جوعارى وقۋ ورىندارى اراسىنداعى كووپەراتسيانى ارتتىرۋ، ستۋدەنتتەر الماسۋ جانە تاعى باسقا ماسەلەلەرگە ەرەكشە نازار اۋدارىلدى.

تاراپتار قازاقستان مەن سينگاپۋردىڭ ىسكەر توپتارى اراسىنداعى بايلانىستاردى كەڭەيتۋ ءۇشىن كۇش-جىگەر بىرىكتىرۋگە ۋاعدالاستى. مەملەكەت باسشىسى ەكى ەلدىڭ كوپجوسپارلى ارىپتەستىگىن نىعايتۋعا سەپتىگىن تيگىزەتىن ۇكىمەتارالىق كوميسسيا قۇرۋدى ۇسىندى.

كەزدەسۋ سوڭىندا قاسىم-جومارت توقايەۆ لوۋرەنس ۆونگتى قازاقستانعا رەسمي ساپارمەن كەلۋگە شاقىردى.

سودان كەيىن قازاقستان پرەزيدەنتى مەن سينگاپۋر پرەمەر-ءمينيسترى ساپار بارىسىندا قول قويىلعان قۇجاتتاردى الماسۋ راسىمىنە قاتىستى. قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ مەن سينگاپۋردىڭ ورنىقتى دامۋ جانە قورشاعان ورتا ءمينيسترى، ساۋدا بايلانىستارىنا جاۋاپتى مينيستر گرەيس فۋ ءبىر-بىرىمەن سيمۆولدىق تۇرعىدا قۇجات الماستى.

اۆتور

ايدار وسپاناليەۆ