قازاقستان پرەزيدەنتىنىڭ رەسەيگە ەكى كۇندىك جۇمىس ساپارى قالاي ءوتتى
پرەزيدەنت قاسىم-جومارت توقايەۆتىڭ رەسەي فەدەراتسياسىنا ەكى كۇندىك جۇمىس ساپارى اياقتالدى. Kazinform بۇل تۋرالى اقورداعا سىلتەمە جاساپ حابارلايدى.
مەملەكەت باسشىسى 25-جەلتوقسان كۇنى رەسەي پرەزيدەنتى ۆلاديمير پۋتيننىڭ شاقىرۋىمەن سانكت-پەتەربۋرگ قالاسىنا باردى.
جوعارى ەۋرازيالىق ەكونوميكالىق كەڭەس (ج ە ە ك) وتىرىسى وتەتىن ب. ن. ەلتسين اتىنداعى پرەزيدەنتتىك كىتاپحانادا قاسىم-جومارت توقايەۆتى ر ف باسشىسى ۆ. پۋتين قارسى الدى.
ق ر پرەزيدەنتى رەسەي پرەزيدەنتى – ج ە ە ك ءتوراعاسى ۆلاديمير پۋتين، ارمەنيا پرەمەر-ءمينيسترى نيكول پاشينيان، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، سونداي-اق ەۋرازيالىق ەكونوميكالىق كوميسسيا القاسىنىڭ ءتوراعاسى ميحايل مياسنيكوۆيچپەن بىرگە ج ە ە ك-تىڭ شاعىن قۇرامداعى وتىرىسىنا قاتىستى.
كەيىن مەملەكەت باسشىسى ج ە ە ك-تىڭ كەڭەيتىلگەن قۇرامداعى وتىرىسىنا قاتىسىپ، وسى جىلدىڭ وڭاي بولماعانىن، اسىرەسە، جاھاندى جايلاعان تۇراقسىزدىقتىڭ كۇشەيە تۇسكەنىن اتاپ ءوتتى. سونداي-اق مەملەكەت باسشىسى رەسەيدىڭ ۇيىمعا ءتوراعالىعى تابىستى اياقتالۋىمەن ۆلاديمير پۋتيندى قۇتتىقتادى. سونداي-اق نيكول پاشينيانعا ارمەنيانىڭ 2024 -جىلى ەۋرازيالىق ەكونوميكالىق وداق ورگاندارىنا ناتيجەلى ءتوراعالىق ەتۋىنە تىلەكتەستىك ءبىلدىردى.
بۇدان بولەك، قازاقستان پرەزيدەنتى ت م د-عا مۇشە مەملەكەتتەر باسشىلارىنىڭ بەيرەسمي كەزدەسۋىنە قاتىستى. جيىن بارىسىندا ت م د ەلدەرىنىڭ كوشباسشىلارى ۇيىم قىزمەتىنىڭ باسىم باعىتتارىن، ءوزارا ءتيىمدى ىنتىماقتاستىقتى نىعايتۋ جانە ودان ءارى دامىتۋ جوسپارىن تالقىلادى. سونداي-اق ت م د اياسىنداعى ىقپالداستىقتىڭ وزەكتى ماسەلەلەرى جونىندە پىكىر الماستى.
قاسىم-جومارت توقايەۆ رەسەي فەدەراتسياسىنا جۇمىس ساپارى بارىسىندا، سونىمەن قاتار رەسەي پرەزيدەنتى ۆلاديمير پۋتين، ازەربايجان پرەزيدەنتى يلحام اليەۆ، ارمەنيا پرەمەر-ءمينيسترى نيكول پاشينيان، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيەيەۆپەن بىرگە سانكت-پەتەربۋرگ قالاسىنداعى مادەني نىسانداردى ارالاپ كوردى.