قازاقستان قىتايدىڭ ەڭ ءىرى جاسىل تەحنولوگيالار بانكىمەن ارىپتەستىك ورناتتى
استانا. KAZINFORM - حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى (ح ج ت ي ج و) مەن شاڭحاي عىلىمي- تەحنيكالىق الماسۋ ورتالىعى ازياداعى جاسىل تەحنولوگيالار بويىنشا ءىرى پلاتفورمالاردىڭ بىرىنە - Green Technology Bank-پەن تىكەلەي قارىم-قاتىناسقا جول اشاتىن ىنتىماقتاستىق تۋرالى ستراتەگيالىق كەلىسىمگە قول قويدى.
بۇل تۋرالى ەكولوگيا جانە تابيعي رەسۋرستار مينيسترلىگى مالىمدەدى.
كەلىسىم قازاقستان مەن قىتاي اراسىنداعى عىلىمي-تەحنيكالىق ديالوگتى نىعايتۋداعى ماڭىزدى قادام بولدى جانە رەسپۋبليكا ەكونوميكاسىنا وزىق ەكولوگيالىق شەشىمدەردى جەدەل ەنگىزۋ ءۇشىن كەڭ پەرسپەكتيۆالار اشتى. ەندى قازاقستاندىق كاسىپورىندار، زەرتتەۋ ورتالىقتارى مەن ستارتاپتار جاڭارتىلاتىن ەنەرگەتيكا، سۋ رەسۋرستارى، قالدىقتاردى وڭدەۋ، اگروەكولوگيا جانە باسقا دا باعىتتارداعى يننوۆاتسيالاردى قوسا العاندا، قىتايدىڭ دەرەكتەر بازاسىنداعى ازىرلەمەلەردى پايدالانا الادى.
قول جەتكىزىلگەن كەلىسىمگە سايكەس، شاڭحاي عىلىمي-تەحنيكالىق الماسۋ ورتالىعى قازاقستاندىق تاراپتى تەحنولوگيالىق دەرەكقورعا جانە Green Technology Bank ساراپتامالىق جەلىسىنە قولجەتىمدىلىكپەن قامتاماسىز ەتۋ جونىندە مىندەتتەمە الدى. بۇدان باسقا، جىل سايىن قازاقستاندىق كومپانيالاردىڭ قاتىسۋىمەن - روادشوۋلار، فورۋمدار مەن ىسكەرلىك ميسسيالاردى قوسا العاندا - قىتاي تاراپىنان قارجىلىق قولداۋ كورسەتۋ مۇمكىندىگىمەن بىرلەسكەن ءىس- شارالاردى ۇيىمداستىرۋ كوزدەلگەن. تاعى ءبىر جەكەلەگەن باعىت - قازاقستانداعى جيىرما باسىم جاسىل جوبانى جۇيەلى باعالاۋ جانە سۇيەمەلدەۋ: ساراپشىلار جۇمىس جوسپارلارىن ازىرلەۋگە قاتىسادى جانە تەحنولوگيالاردى جەرگىلىكتى نارىقتىڭ شارتتارى مەن تالاپتارىنا بەيىمدەۋ بويىنشا ۇسىنىمدار بەرەدى.
ح ج ت ي ج و باسقارما ءتوراعاسىنىڭ م. ا. ساكەن قالقامانوۆ قول قويىلعان قۇجاتتىڭ ستراتەگيالىق ماڭىزدىلىعىن اتاپ ءوتتى.
- قازاقستان جاسىل تەحنولوگيالار سالاسىنداعى جاھاندىق كوشباسشىلاردىڭ ءبىرىنىڭ تاجىريبەسى مەن شەشىمدەرىن تىكەلەي قولدانا الادى. بۇل ەكولوگيالىق يننوۆاتسيالاردى جەدەل ەنگىزۋ، ينۆەستيتسيالار تارتۋ جانە تەحنولوگيالىق ارىپتەستىكتى دامىتۋ ءۇشىن بەرىك نەگىز جاسايدى. ءبىز مۇنى ەلىمىز ءۇشىن تۇراقتى بولاشاقتى ىلگەرىلەتۋدىڭ ستراتەگيالىق قۇرالى رەتىندە قاراستىرامىز، - دەدى ول.
ەكى تاراپ قول قويىلعان كەلىسىمنىڭ «ءبىر بەلدەۋ، ءبىر جول» سياقتى جاھاندىق باستامالار اياسىنداعى ەكىجاقتى ءوزارا ءىس- قيمىلدى كۇشەيتىپ قانا قويماي، ءبىلىم الماسۋ، جاڭا نارىقتار اشۋ جانە بىرلەسكەن جوبالاردى ىسكە قوسۋ ارقىلى قازاقستاننىڭ حالىقارالىق جاسىل كۇن تارتىبىنە كىرىگۋىنىڭ پراكتيكالىق قۇرالىنا اينالاتىنىنا سەنىم ءبىلدىردى.
ايتا كەتەيىك، استانادا ق ر پرەزيدەنتىنىڭ تەلەراديوكەشەنى مەن قىتاي مەديا كورپوراتسياسى (CMG) «Silk Way Star» حالىقارالىق جوباسى تۋرالى كەلىسىمگە قول قويدى.