قازاقستان قىتايعا ەكسپورتتالاتىن استىق كولەمىن 2 ميلليون تونناعا جەتكىزۋگە دايىن
استانا. KAZINFORM - قازاقستان قىتايعا ەكسپورتتالاتىن استىق كولەمىن 2 ميلليون تونناعا جەتكىزۋگە دايىن. بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
«ءبىز اۋىل شارۋاشىلىعى سالاسىنداعى ىنتىماقتاستىقتى جانداندىرۋ ماسەلەسىن تالقىلادىق. بۇل سالادا تابىستى جۇزەگە اسقان بىرلەسكەن جوبالار بار. ەگىنشىلىكتە سمارت جۇيەسىن قولدانۋعا، سۋ رەسۋرستارىن ۇتىمدى پايدالانۋعا جانە اۋىل شارۋاشىلىعى ونىمدەرىن تەرەڭ وڭدەۋگە ايرىقشا نازار اۋدارىلادى. وسى ورايدا قىتايدىڭ تاجىريبەسى مەن تەحنولوگيالارىن قولدانۋعا، ناقتى ينۆەستيتسيالىق جوبالاردى بىرلەسە جۇزەگە اسىرۋعا مۇددەلىمىز»، - دەدى قاسىم-جومارت توقايەۆ.
مەملەكەت باسشىسى بىلتىر قازاقستاننىڭ قىتايعا ەكسپورتتاعان اۋىل شارۋاشىلىعى تاۋارلارى 2 ەسە ءوسىپ، 1 ميلليارد دوللارعا جەتكەنىن ايتتى.
«قىتاي نارىعىنا ساپالى ءارى تابيعي ەت ونىمدەرىن، مايلى جانە ءداندى داقىلدار ەكسپورتىن ۇلعايتۋعا مۇددەلى ەكەنىمىزدى اتاپ وتتىك. بۇل رەتتە قازاقستان استىعىن 2 ميلليون تونناعا جەتكىزۋگە دايىنبىز. وسى سالاداعى ىقپالداستىقتى كەڭەيتۋ شارالارىن قولداعانىڭىز ءۇشىن ءتوراعا شي جينپيڭ مىرزاعا ريزاشىلىعىمدى بىلدىرەمىن»، - دەدى قازاقستان پرەزيدەنتى.
اۆتور
مارلان جيەمباي