قازاقستان-قىتاي كەلىسىمى: 15 مىڭنان استام جۇمىس ورنى اشىلادى

استانا. KAZINFORM - بۇگىندە قازاقستان مەن قىتاي ىنتىماقتاستىعى اياسىندا 2,7 ميلليارد دوللار بولاتىن 10 جوبا ىسكە اسىرىلۋ ساتىسىندا. سونىمەن قاتار 4,1 ميلليارد دوللار كولەمىندەگى 8 جوبا ازىرلەنىپ جاتىر. بۇل تۋرالى سىرتقى ىستەر ءمينيسترىنىڭ ورىنباسارى الىبەك قۋانتىروۆ ءمالىم ەتتى.

- قازاقستان مەن قىتاي يندۋستريالىق-ينۆەستيتسيالىق ىنتىماقتاستىقتى ەكىجاقتى نەگىزدە دە تىعىز دامىتىپ كەلەدى. سوڭعى 30 جىل ىشىندە قىتاي قازاقستان ءۇشىن ەڭ ءىرى ەكونوميكالىق ارىپتەسكە اينالدى. ەكىجاقتى ەكونوميكالىق قاتىناس اۋىل شارۋاشىلىعىنان باستاپ، مينەرالدىق رەسۋرستار، كولىك سالاسى، جوعارى تەحنولوگيالار مەن ەنەرگەتيكاعا دەيىنگى كەڭ اۋقىمدى سالالاردى قامتيدى، — دەدى الىبەك قۋانتىروۆ «ورتالىق ازيا - قىتاي» ەكىنشى يندۋستريالىق- ينۆەستيتسيالىق ىنتىماقتاستىق فورۋمىندا.

مينيستر ورىنباسارىنىڭ ايتۋىنشا، ءقازىر ۇكىمەت ەكىجاقتى بىرلەسكەن ينۆەستيتسيالىق جوبالار تىزبەسىن كەڭەيتۋ ماسەلەسىن پىسىقتاپ جاتىر.

- قازىر جالپى سوماسى 14,75 ميلليارد ا ق ش دوللار بولاتىن 47 جوبانى قامتيدى. 2015 -جىلدان بەرى جالپى قۇنى 7,9 ميلليارد دوللار بولاتىن 29 جوبا ىسكە قوسىلدى. سونىمەن قاتار جالپى سوماسى 2,7 ميلليارد دوللار بولاتىن 10 جوبا ىسكە اسىرىلۋ ساتىسىندا. ال 4,1 ميلليارد دوللار كولەمىندەگى 8 جوبا ازىرلەنىپ جاتىر، - دەدى ول.

اتالعان ىنتىماقتاستىق تەتىگى 15 مىڭنان استام جۇمىس ورنىن اشۋعا مۇمكىندىك بەرەدى.

بۇعان دەيىن حابارلاعانىمىزداي قازاقستان مەن قىتاي 25 ميلليارد دوللارعا 60 كەلىسىمگە قول قويدى.

ەلوردادا «ورتالىق ازيا - قىتاي» ەكىنشى يندۋستريالىق- ينۆەستيتسيالىق ىنتىماقتاستىق فورۋمى ءوتىپ جاتىر. فورۋمعا قازاقستان رەسپۋبليكاسى پرەمەر- ءمينيسترىنىڭ ءبىرىنشى ورىنباسارى رومان سكليار، ورتالىق جانە جەرگىلىكتى مەملەكەتتىك ورگانداردىڭ باسشىلارى، ورتالىق ازيا ەلدەرىنىڭ دەلەگاتسيالارى، قىتايلىق جانە وڭىرلىك ءىرى كومپانيالاردىڭ، سونداي-اق دامۋ ينستيتۋتتارىنىڭ باسشىلارى قاتىستى. فورۋم اياسىندا جالپى سوماسى 10 ميلليارد اقش دوللارىنان اساتىن 50 دەن استام ەكىجاقتى جانە كوپجاقتى قۇجاتقا قول قويىلدى.