قازاقستان قۇتقارۋشىلارى اۋعانستانداعى جۇمىستاردى اياقتادى

مەملەكەت باسشىسى قاسىم- جومارت توقايەۆتىڭ تاپسىرماسى بويىنشا اۋعانستانعا جىبەرىلگەن قازاقستاندىق 45 قۇتقارۋشى ەلگە ورالۋعا دايىندالۋدا، دەپ حابارلايدى Кazinform.

«بولىنگەن ۋچاسكەدەگى ىزدەستىرۋ- قۇتقارۋ جۇمىستارىنىڭ تولىق كولەمىنىڭ اياقتالۋىنا بايلانىستى جويقىن جەر سىلكىنىسىنىڭ سالدارىن جويۋعا كومەك كورسەتۋ ءۇشىن جىبەرىلگەن قازاقستاندىق قۇتقارۋشىلار جاساعىن قايتارۋ شەشىمى قابىلداندى»، - دەلىگنە توتەنشە جاعدايلار مينيسترلىگىنىڭ اقپاراتىندا.

ءمالىم ەتىلگەندەي، اۋعانستاندا قۇتقارۋ جۇمىستارى باستالعاننان بەرى قازاقستان قۇتقارۋشىلارى قازا تاپقان 1 بالانىڭ دەنەسىن الىپ شىقتى، جەرگىلىكتى 80 تۇرعىنعا مەديتسينالىق كومەك كورسەتتى، 211 ءۇي فراگمەنتىنىڭ ءۇيىندىسىن بولشەكتەدى، نايبروفي ەلدى مەكەنىندەگى قيراعان 700 ءۇيدىڭ ۋچاسكەسىن تەكسەرىپ شىقتى.

«سونىمەن قاتار قۇتقارۋشىلار قاتتى شاڭدى داۋىلدان قيراعان شاتىرلى قالانى تەكسەردى. جەرگىلىكتى بيلىكتىڭ ءوتىنىشى بويىنشا قازاقستاندىق قۇتقارۋشىلار مەن دارىگەرلەردىڭ جەدەل توبى ديپلوماتيالىق كورپۋس وكىلدەرىمەن بىرلەسىپ 9 شاتىرلى قالاشىقتىڭ ورنالاسۋ ورىندارىن تەكسەردى»، - دەپ ناقتىلادى مينيسترلىكتەن.

قازاقستان ت ج م كۇشتەرى مەن قۇرالدارىن قايتارۋ 14 -قازانعا جوسپارلانعان.

ەسكە سالايىق، 10 -قازاندا قازاقستاننىڭ 45 قۇتقارۋشىسى جويقىن جەر سىلكىنىسىنىڭ سالدارىن جويۋعا كومەك كورسەتۋ ءۇشىن اۋعانستانعا اتتانعان بولاتىن. العاشقى تاۋلىك ىشىندە 76 ۋچاسكەدەگى ءۇيىندى بولشەكتەلگەن بولاتىن. كەيىن قۇتقارۋشىلار ۇيىندىلەر استىنان 5-6 جاسار بالانىڭ ءمايىتىن الىپ شىقتى.

سونداي- اق كەشە، 11 -قازان كۇنى قازاقستان حالقىنىڭ اتىنان گۋمانيتارلىق كومەكتىڭ العاشقى لەگى تيەلگەن ارنايى ۇشاق اۋعانستاننىڭ گەرات اۋەجايىنا قونعان بولاتىن. بۇل تۋرالى وقيعا ورنىنان Кazinformءتىلشىسى ەسىمجان ناقتىباي حابارلادى.

7 -قازان كۇنى اۋعانستاننىڭ باتىسىنداعى گەرات پروۆينتسياسىندا 6,3 بالدىق جەر سىلكىنىسىنەن 2053 ادام قازا تاۋىپ، 9 مىڭنان استام ادام جاراقات الدى.

اۆتور

گۇلميرا الياكپاروۆا