قازاقستان قاي ەلدەرگە IT- قىزمەت ەكسپورتتاپ وتىر

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ سەناتتىڭ جالپى وتىرىسىندا وتاندىق IT- كومپانيالاردىڭ ەكسپورتتاعى جەتىستىگىنە توقتالدى.

«قازاقستاننىڭ IT- قىزمەتتەر ەكسپورتى قارقىندى ءوسىپ كەلەدى. 2023-جىلى ەكسپورت كولەمى 529 ميلليون دوللارعا جەتسە، 2024-جىلدىڭ ءبىرىنشى جارتىجىلدىعىندا 306 ميلليون دوللار بولدى. ءبىز حالىقارالىق نارىقتاعى ۇلەسىمىزدى ارتتىرا وتىرىپ، 2026-جىلعا قاراي 1 ميلليارد دوللار دەڭگەيىنە جەتۋگە سەنىمدى قادام جاساپ جاتىرمىز. بۇگىنگى تاڭدا قازاقستاننىڭ IT- قىزمەتتەرى 86 ەلگە ەكسپورتتالادى»، - دەدى ول.

جاسلان ماديەۆتىڭ پايىمىنشا، بۇل ەلدىڭ سيفرلىق شەشىمدەرگە دەگەن جوعارى سۇرانىس بار ەكەنىن كورسەتەدى.

مينيسترلىك ۇسىنعان قوسىمشا مالىمەتكە سۇيەنسەك، بۇل سالاداعى ەكسپورتتىڭ نەگىزگى باعىتتارى رەسەي (34,5 ميلليون دوللار)، يرلانديا (30,3 ميلليون دوللار)، مەكسيكا (26,6 ميلليون دوللار)، ا ق ش (12,6 ميلليون دوللار) جانە سينگاپۋر (12,3 ميلليون دوللار).

بىلتىر جەتەكشى ەكسپورتتاۋشىلاردىڭ كوشىن Netcracker ،PAM ،MX Credit Systems ،Ozon MyTona جانە Playrix كومپانيالارى باستاعان.

وسىعان دەيىن ەلىمىزدە تاعى ءۇش جەر سەرىگى قۇراستىرىلاتىنى تۋرالى جازدىق.