قازاقستان ۇنىن تاياۋ شىعىس پەن افريكا ەلدەرىنە شىعارۋ ماسەلەسى پىسىقتالىپ جاتىر

استانا. KAZINFORM - قازاقستان ۇنىن تاياۋ شىعىس پەن افريكا ەلدەرىنىڭ نارىقتارىنا شىعارۋ ماسەلەسى پىسىقتالىپ جاتىر. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين جاۋابىندا ايتىلعان.

- بۇگىنگى تاڭدا قازاقستاندىق ۇننىڭ نەگىزگى وتكىزۋ نارىقتارى - ورتالىق ازيا ەلدەرى، اۋعانستان، رەسەي. اتالعان باعىتتار بويىنشا جىل سايىن شامامەن 2 ميلليون توننا ۇن ەكسپورتتالادى. 2024-جىلى قىتايعا مال ازىقتىق ۇن ەكسپورتى 5,8 ەسە ءوسىپ، 1,2 ميلليون توننانى قۇرادى. سونىمەن قاتار، تاياۋ شىعىس پەن افريكا ەلدەرىنىڭ نارىقتارىنا شىعۋ ماسەلەسى پىسىقتالۋدا. وسى تۇرعىدا يرانعا، تاياۋ شىعىس ەلدەرىنە (ب ا ءا، ساۋد ارابياسى، كۋۆەيت، ومان جانە ت. ب.)، گرۋزياعا جانە ودان ءارى ەۋروپاعا جونەلتىلە وتىرىپ، ترانسكاسپي حالىقارالىق كولىك مارشرۋتى (بۇدان ءارى – ت ح ك م) بەلسەندى قولدانىلۋدا، - دەدى ۆيتسە-پرەمەر.

ونىڭ اتاپ وتۋىنشە، قازاقستاننىڭ ت ح ك م ۋچاسكەسىندە Digital Trade Corridor مۋلتيمودالدى سيفرلىق پلاتفورماسى جۇمىس ىستەيدى. 2024-جىلى ازەربايجان جانە گرۋزيا تەمىر جولدارىنىڭ IT- جۇيەلەرىمەن ينتەگراتسيا اياقتالدى. تۇركيا تەمىر جولدارىمەن ينتەگراتسيالاۋ جالعاسىپ جاتىر.

- بۇل مارشرۋت بويىنشا جۇكتىڭ جەتكىزىلۋ مەرزىمىن 25 كۇننەن 13 كۇنگە دەيىن قىسقارتۋعا مۇمكىندىك بەردى. 2027-جىلعا دەيىن ءدالىزدىڭ وتكىزۋ قابىلەتىن جىلىنا 6 ميلليون توننادان 10 ميلليون تونناعا دەيىن ۇلعايتۋ جوسپارلانىپ وتىر، - دەدى سەرىك جۇمانعارين.

بۇعان دەيىن ۆيتسە-پرەمەر استىق ەكسپورتىنىڭ جاڭا نارىقتارى تۋرالى مالىمەت بەرگەن ەدى.