«قازاقستان- نورۆەگيا» ماتچىنا بيلەت قانشاعا ساتىلىپ جاتىر
الماتى. KAZINFORM - بۇگىن 19:00-دە الماتى ورتالىق ستاديونىندا ۋەفا ۇلتتار ليگا اياسىندا قازاقستان مەن نورۆەگيا قۇرامالارى اراسىندا ماتچ وتەدى. 20-تامىز كۇنى ساتىلىمعا شىققان بۇل ماتچتىڭ بيلەتتەرى ءبىر تاۋلىك ىشىندە تولىق ءوتىپ كەتكەن.
رەسمي مالىمەتكە سايكەس، ماتچ بيلەتى 2-10 مىڭ ارالىعىندا تەك ونلاين ساتىلعان. سونداي-اق قازاقستان فۋتبول فەدەراتسياسى الىپساتۋدىڭ الدىن الۋ ءۇشىن ساتىپ الىنعان بيلەت ماتچى باستالۋىنا 2 ساعات قالعاندا كورسەتكەن پوشتاعا كەلەتىنىن حابارلادى.
دەگەنمەن، جەلىدە ەرلينگ حولاند پەن مارتين ەدەگور سىندى الەمدىك فۋتبول جۇلدىزدارى قاتىساتىن ويىنعا بيلەتتەردى ساتىپ الۋعا بولادى. عالامتورداعى بيلەت قۇنى 8 مىڭنان باستالىپ 25 مىڭعا دەيىن جەتەدى.
ساتۋشىلاردىڭ ءبىرى ستاديوننىڭ شىعىس بولىگى 44 سەكتورداعى 2 بيلەتتىڭ ءارقايسىسىن 22 مىڭ تەڭگەگە ۇسىنادى. ال بيلەتتى ويىن باستالار الدىندا 1-2 ساعات بۇرىن ستاديون جانىنان بەرەتىنىن ايتادى.
ايتا كەتكەن ءجون، قازاقستان قۇراماسىنىڭ كاپيتانى اسحات تاعىبەرگەن ماتچ الدىنداعى باسپا ءسوز ءماسليحاتىندا دوستارىنىڭ بۇل ويىنعا بيلەت سۇراعانىن ايتقان ەدى.
- مەنەن دوستارىم بيلەت سۇرادى. مەن «سەندەر ۇلتتىق قۇرامانى قولداۋعا كەلەسىڭدەر مە، الدە حولاندى كورۋگە مە» دەيمىن، - دەدى قازاقستاندىق فۋتبولشى.
ەسكە سالايىق، بۇعان دەيىن نورۆەگيا قۇراماسى الماتىداعى ستاديوندا جاتتىعۋ وتكىزگەنىن جازعانبىز.
سونداي-اق الماتى پوليتسياسى كۇشەيتىلگەن رەجيمگە كوشتى.
اۆتور
دوسبول اتاجان