قازاقستان نەمىستىڭ Xerion تراكتورى ءوندىرىسىن كەڭەيتۋگە نيەتتى
استانا. KAZINFORM - قازاقستان نەمىستىڭ Xerion تراكتورى ءوندىرىسىن كەڭەيتۋگە نيەتتى. بۇل تۋرالى اقوردادا ونەركاسىپ جانە قۇرىلىس ءمينيسترى قانات شارلاپايەۆ ايتتى.
ونىڭ دەرەگىنشە، بۇگىندە ەلىمىزدە نەمىس كاپيتالى سالىنعان 21 جوبا جۇزەگە اسىرىلدى.
«گەرمانيامەن ءبىراز ۋاقىتتان بەرى وتە تىعىز قارىم-قاتىناس ورناعان. قازىردىڭ وزىندە بىزدە، قازاقستاندا نەمىس كاپيتالىنىڭ قاتىسۋىمەن 21 جوبا جۇزەگە اسىرىلدى. ينۆەستيتسيانىڭ جالپى كولەمى شامامەن 1 ميلليارد ەۋرو. بۇل ورايدا ءبىز قۇرىلىس ماتەريالدارى، ىلمەكتى ارماتۋرا ءوندىرىسى جايىندا ايتىپ وتىرمىز. قاراعاندىدا بومەر كومپانياسى جۇمىس ىستەپ تۇر. Knauf كومپانياسى قۇرعاق قوسپالار سالاسىنداعى وتە تانىمال برەندتەردىڭ ءبىرى جانە قازاقستان اۋماعىندا كوپ ۋاقىتتان بەرى جۇمىس ىستەيدى»، - دەدى ول.
مينيستر جۇزەگە اسىرۋ ساتىسىندا تۇرعان تاعى 5 جوبانىڭ بار ەكەندىگىن ايتادى.
«ولاردىڭ ءبىرى - Knauf كومپانياسىمەن قازاقستان اۋماعىندا ينستاللياتسيالىق ماتەريالدار وندىرىسىنە قاتىستى جوبا. ەلىمىزدە اۋىل شاراۋشالىعى تەحنيكاسىنا ۇلكەن قاجەتتىلىك بار. وتە تانىمال الەمدىك Claas كومپانياسى قازىرگى ۋاقىتتا پەتروپاۆلدا ءوز تەحنيكالارىن قۇراستىرىپ جاتىر. ءبىز وسى ءوندىرىستى كەڭەيتۋ باعىتىندا جۇمىس ىستەيمىز. كومپانيا قازاقستانعا ءوزىنىڭ ەڭ وزىق تەحنيكاسىن جەتكىزەدى. ول - Xerion تراكتورى، وتە تانىمال مودەل، جاڭا ازىرلەمە. قازىرگى ۋاقىتتا وسى ءوندىرىستى كەڭەيتۋ ءۇشىن كەلىسسوز جۇرگىزۋدەمىز»، - دەدى قانات شارلاپايەۆ.
بۇعان دەيىن اقوردادا مەملەكەت باسشىسى قاسىم-جومارت توقايەۆ استاناعا رەسمي ساپارمەن كەلگەن گەرمانيانىڭ فەدەرالدىق كانتسلەرى ولاف شولتستى قارسى العانىن حابارلاعان ەدىك.