قازاقستان نارىعىنا كوپتەگەن الەمدىك برەند كەلىپ جاتىر - الىبەك قۋانتىروۆ

استانا. KAZINFORM - قازاقستان نارىعىنا كوپتەگەن الەمدىك برەند ەنىپ جاتىر. بۇل تۋرالى ق ر سىرتقى ىستەر ءمينيسترىنىڭ ورىنباسارى الىبەك قۋانتىروۆ ايتتى.

- شىنىندا، كوپتەگەن كومپانيا ەل نارىعىنا ەنۋدى جوسپارلاپ وتىر جانە قازىردىڭ وزىندە جۇمىس ىستەپ جاتقاندارى دا از ەمەس. جۇمىس ءجۇرىپ جاتىر، ءبىراق كەيبىر كومپانيالار ءبىزدىڭ ەلىمىزگە كەلگەلى جاتقانىن اشىق جاريالاعان جوق. ماسەلەن، Mars كومپانياسى ءبىر ۇلكەن جوبانى قولعا الىپ جاتىر. بۇل قاتاردا Pepsi كومپانياسى دا بار، - دەدى ول سەناتتىڭ جالپى وتىرىسىنان كەيىنگى باسپا ءسوز ءماسليحاتىندا.

سپيكەردىڭ ايتۋىنشا، امەريكالىق كومپانيالاردان بولەك اراب تۇبەگىنەن، قىتايدان، تۇركيادان دا كومپانيالار كەلمەك.

- ولاردىڭ ءبارى الەمدىك برەندتەر. قازىردىڭ وزىندە ەلىمىزدە جۇمىس ىستەپ جاتقان جانە ءوز اۋقىمىن ودان دا كەڭەيتۋدى كوزدەيتىندەر دە، سونداي-اق جاڭادان ەنىپ جاتقاندارى دا بار، - دەدى الىبەك قۋانتىروۆ.

سونداي-اق ول جاقىندا ەلىمىزدە ايگىلى بريتاندىق-شۆەدتىك فارماتسەۆتيكالىق كومپانيا جۇمىسىن باستايتىنىن اتاپ ءوتتى.

- جۋىردا، 28-مامىردا الەمدىك AstraZeneca فارماتسەۆتيكالىق كومپانياسىنىڭ وندىرىستىك جەلىسى ىسكە قوسىلادى. ولار قاتەرلى ىسىك جانە باسقا دا اۋرۋلاردى ەمدەيتىن ءدارى-دارمەك شىعارادى. جاقىندا ءبىز بريتانياعا ساپارىمىزدا ولاردىڭ كەمبريدجدەگى كەڭسەسىندە بولدىق. ولار بۇل جوباعا وتە جوعارى ءمان بەرىپ وتىر. سول سەكىلدى Pfizer ،Polpharma كومپانيالارىن اتاپ وتۋگە بولادى. بۇل تەك فارماتسيەۆتيكا سالاسىنداعى كومپانيالار عانا، - دەدى ۆيتسە-مينيستر.

ودان بولەك، ول الەمدىك برەندتەر كەن يگەرۋ، قايتا وڭدەۋ، IT سالالارىنا دا ەنىپ جاتقانىن، ولارعا قازاقستان نارىعى قىزىعۋشىلىق تۋدىرىپ وتىرعانىن اتاپ ءوتتى.

ايتا كەتەيىك، بۇعان دەيىن يسپانيالىق كومپانيا قازاقستاننىڭ سۋ ينفراقۇرىلىمىن جاڭعىرتۋعا اتسالىساتىنىن جازعان ەدىك.