قازاقستان ناشاقورلىققا قارسى كۇرەسكە ايرىقشا ءمان بەرەدى - پرەزيدەنت
استانا. KAZINFORM - پرەزيدەنت قاسىم- جومارت توقايەۆ شىعىس، ورتالىق ەۋروپا جانە ورتالىق ازيا ەلدەرىنىڭ ەسىرتكىگە قارسى ساياساتى جونىندەگى كوميسسياسىنىڭ ءتوراعاسى الەكساندر كۆاسنيەۆسكيدى قابىلدادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
كەزدەسۋ بارىسىندا ناشاقورلىقتىڭ جانە ەسىرتكى بيزنەسىنىڭ بەلەڭ الۋىنا قارسى كۇرەسكە قاتىستى اقپارات الۋ، ۇزدىك تاجىريبەلەردى ناسيحاتتاۋ باعىتىندا كوميسسيامەن قارىم-قاتىناس جاساۋ ماسەلەلەرى تالقىلاندى.
- ءسىزدىڭ ميسسياڭىز وتە ماڭىزدى. ءبىز مۇنى ناشاقورلىققا قارسى كۇرەس جونىندەگى ىقپالداستىقتى دامىتۋ ءۇشىن وتە پايدالى دەپ سانايمىز. ەلىمىزدە بۇل ماسەلەگە ايرىقشا ءمان بەرىلەدى. جۋىردا ۇلتتىق قۇرىلتايدا سويلەگەن سوزىمدە ەسىرتكى وندىرۋمەن جانە ونى حالىق اراسىندا تاراتۋمەن اينالىساتىن ادامدارعا قاتىستى جازانى قاتاڭداتۋ تۇرعىسىنان زاڭنامانى قايتا قاراۋ قاجەت ەكەنىن ايتتىم. ءسىز شىعىس، ورتالىق ەۋروپا جانە ورتالىق ازيا ەلدەرىنىڭ ەسىرتكىگە قارسى ساياساتى جونىندەگى كوميسسياسىنىڭ جەتەكشىسى رەتىندە ادامزات مۇددەسىن كوزدەيتىن ماڭىزدى ميسسيانى اتقارىپ كەلەسىز. قازاقستان كوميسسيامەن بەلسەندى قارىم- قاتىناس جاساۋعا دايىن،- دەدى پرەزيدەنت.
الەكساندر كۆاسنيەۆسكي ەسىرتكىگە قارسى ساياساتتىڭ تيىمدىلىگىن ارتتىرۋعا باعىتتالعان جاڭا باعدارلامالار مەن شارالار تۋرالى ايتتى.
قاسىم-جومارت توقايەۆ پەن الەكساندر كۆاسنيەۆسكي ەسىرتكىگە تاۋەلدىلىكتىڭ الدىن الۋ جانە ەسىرتكىنى زاڭسىز تاراتۋعا قارسى كۇرەسۋ ءۇشىن بىرلەسكەن جۇمىستى جالعاستىرۋعا ۋاعدالاستى.