قازاقستان چەمپيونى اتانعان «قايرات» مەملەكەتتەن قانشا قاراجات الدى

الماتى. KAZINFORM - الماتىنىڭ «قايرات» فۋتبول كلۋبى كۇنى كەشە فۋتبولدان قازاقستان بىرىنشىلىگىنىڭ جەڭىمپازى اتاندى. وسى ورايدا Kazinform ءتىلشىسى الماتى قالاسىنىڭ سپورت باسقارماسىنا ساۋال جولداپ، ەل چەمپيونى اتانعان كلۋبقا بيىل قانشا قاراجات بەرىلگەنىن انىقتادى.

قالالىق سپورت باسقارماسى ءوز جاۋابىندا «قايرات» فۋتبول كلۋبى تولىقتاي جەكە مەنشىك يەلىگىندە ەكەنىن جانە باسقارماعا قاراستى ەمەس ەكەنىن حابارلادى. سونداي- اق باسقارما جەكە كلۋبتاردى كاسىبي سپورت تۇرلەرى بويىنشا تىكەلەي قارجىلاندىرمايتىنىن مالىمدەدى.

ۆەدومستۆو جاۋابىنا سايكەس، كاسىبي كلۋبتاردىڭ قىزمەتتەرىن ساتىپ الۋ باسەكەلەستىك ورتادا، مەملەكەتتىك ساتىپ الۋ پورتالىنداعى اشىق كونكۋرس ارقىلى جۇزەگە اسىرىلادى جانە وعان بارلىق الەۋەتتى قىزمەت كورسەتۋشى قاتىسا الادى.

بيىل اشىق كونكۋرسقا قاتىسۋ ارقىلى «قايرات» فۋتبول كلۋبى 750 ميلليون تەڭگە قاراجات العان.

- باسقارما مەملەكەتتىك ساتىپ الۋ پورتالىندا اشىق كونكۋرس ارقىلى ء«ارتۇرلى جاس ساناتتارىنداعى ءجاسوسپىرىم كوماندالاردى ۇيىمداستىرۋ جانە ولاردىڭ قازاقستان رەسپۋبليكاسى بىرىنشىلىگىنە قاتىسۋىن قامتاماسىز ەتۋ قىزمەتتەرى» اتتى قىزمەتتەرگە 750 ميلليون تەڭگە كولەمىندە اشىق كونكۋرس جاريالادى. كونكۋرس ناتيجەسىندە جەڭىمپاز بولىپ «قايرات» ف ك ج ش س انىقتالدى، - دەلىنگەن باسقارما جاۋابىندا.

ايتا كەتكەن ءجون، 1994 -جىلى قۇرىلعان الماتى فۋتبول فەدەراتسياسىنىڭ قۇرامىندا بۇگىنگى كۇنى قازاقستان پرەمەر- ليگاسىندا ونەر كورسەتەتىن «قايرات» فۋتبول كلۋبى، I ليگاداعى «قايرات- جاستار»، «حان تەنگري»، 2 ليگاداعى «اقاس»، «جاس قىران»، «قازاست» كلۋبتارى بار.

سونىمەن قاتار الماتى سپورت باسقارماسىنىڭ مالىمەتىنە سايكەس، مەگاپوليستە شاعىن فۋتبولدان ءتۇرلى ليگالار جۇمىس ىستەيدى جانە بارلىعى 90 مىڭنان استام الماتىلىق فۋتبول كلۋبتارىندا، كوماندالاردا، سەكتسيالاردا ويناپ، ءتۇرلى تۋرنيرلەر مەن جارىستارعا قاتىسادى. شاعىن فۋتبول ليگالارى: 6*6 «بەدەلدى فۋتبول ليگاسى» - 84 كوماندا، «فۋتبول اۋەسقويلارى ليگاسى» - 78 كوماندا، تۇنگى ليگا فورماتى 8*8 - 16 كوماندا، ايەلدەر ليگاسى - 8 كوماندا، فۋتزال ليگاسى - 10 كوماندا.

- قالا بويىنشا فۋتبولدى، ونىڭ ىشىندە بالالار فۋتبولىن دامىتۋ اياسىندا 5-18 جاس ارالالىعىنداعى بالالارعا ارنالعان «بالالار فۋتبول ليگاسى» اتتى جوبا 2022 -جىلدان بەرى ۇزدىكسىز ىسكە اسىرىلىپ كەلەدى. وسى جىلى اتالعان جوباعا 5-18 جاس ارالىعىنداعى 330 كوماندا نەمەسە 5200 بالا تىركەلدى. الماتىداعى بۇقارالىق سپورتتى دامىتۋ بويىنشا مەملەكەتتىك سپورتتىق جانە شىعارماشىلىق تاپسىرىستاردى ورىندايتىن «Damu Bala» پلاتفورماسى جۇمىس ىستەيدى. اتالاعان پلاتفورماعا بيىل 7,2 ميلليارد تەڭگە ءبولىندى. ونىڭ ىشىندە 79 فۋتبول سەكتسياسىندا 170 جاتتىقتىرۋشى 3660 بالانى فۋتبولعا باۋلىپ كەلەدى، - دەپ حابارلادى باسقارمادان.

ەسكە سالايىق، بۇعان دەيىن «قايرات» - فۋتبولدان 2024 -جىلعى قازاقستان چەمپيونى اتانعانىن جازعانبىز.