قازاقستان چەمپيوناتىندا گاندبولشى قىزدار توبەلەسىپ قالدى

استانا. قازاقپارات - 14-19-مامىر ارالىعىندا الماتى قالاسىندا ايەلدەر اراسىنداعى گاندبولدان قازاقستان چەمپيوناتىنىڭ 1-تۋر ويىندارى ءوتىپ جاتىر.

استانا مەن الماتى وبلىسىنىڭ كوماندالارى اراسىنداعى تارتىستى كەزدەسۋدە كۇتپەگەن جانجال شىقتى. كۋاگەرلەردىڭ ايتۋىنشا، استانالىق كوماندا نەگىزگى قۇرامداعى ءتورت ويىنشىنىڭ جوقتىعىنا قاراماستان ءبىرىنشى تايمدى ءبىر ۇپاي ايىرماشىلىعىمەن ءوز پايداسىنا اياقتاعان. ولاردىڭ ورنىن قوسالقى قۇرامداعى گاندبولشىلار تولىقتىرعان.

الايدا ەكىنشى تايمدا ويىن بارىسى وزگەرىپ، الماتى وبلىسىنىڭ كومانداسى العا شىعىپ، ەسەپتى 24:17 گە جەتكىزەدى. وسى ساتتە الاڭدا توبەلەس باستالىپ، استانا كومانداسىنىڭ كاپيتانى ازيزا قابىلوۆا قارسىلاس ويىنشى بالنۇر ەرمەكتى ۇرىپ جىبەرەدى.

كورەرمەندەردىڭ ايتۋىنشا، بالنۇر ەرمەك بىرنەشە رەت قابىلوۆانى ادەيى ارانداتىپ، ەموتسيالىق قىسىم كورسەتكەن. سونىمەن قاتار، الماتى وبلىسى كومانداسىنىڭ جانكۇيەرلەرى تورەشىلەردىڭ ادىلەتسىز شەشىمدەرىنە نارازىلىق ءبىلدىرىپ، ولاردى قارسىلاس كوماندانىڭ مۇددەسىن قورعادى دەپ ايىپتاعان.

ماتچقا قىزىلوردادان كەلگەن تورەشىلەر قىزمەت كورسەتتى. قابىلوۆا ءۇش ويىنعا ديسكۆاليفيكاتسيا السا، ەرمەك تەك وسى ماتچتىڭ سوڭىنا دەيىن الاڭنان قۋىلدى.