قازاقستان موڭعولياعا رەسەيمەن بىرلەسىپ جول سالۋى مۇمكىن

استانا. KAZINFORM - مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتيننىڭ قازاقستانعا جاساعان مەملەكەتتىك ساپارى اياسىندا وتكەن بريفينگىدە موڭعولياعا رەسەيمەن بىرلەسىپ جول سالۋ باستاماسى تۋرالى پىكىر ءبىلدىردى.

«ونەركاسىپ سالاسىنداعى بايلانىستاردا دا ايتارلىقتاي جەتىستىكتەرگە قول جەتكىزدىك. قۇنى 18 ميلليارد دوللاردان اساتىن 93 بىرلەسكەن جوبا ىسكە قوسىلدى. قازىرگى تاڭدا جالپى ينۆەستيتسياسى شامامەن 30 ميلليارد دوللار بولاتىن 49 جوبا ىسكە اسىرىلىپ جاتىر.

قازاقستاننىڭ ءبىرقاتار ءوڭىرىن گازداندىرۋ جونىندەگى اۋقىمدى باستامالار، رەسەيلىك ەنەرگيا رەسۋرستارىنىڭ وڭتۇستىك جانە شىعىس باعىتتارداعى ترانزيت كولەمىن ۇلعايتۋ جوبالارى دا ماڭىزدى»، - دەدى پرەزيدەنت.

قاسىم-جومارت توقايەۆ ەنەرگەتيكالىق باعىتتاعى باستامالارعا ەرەكشە توقتالدى.

«ەلىمىزدە ءىرى ەنەرگەتيكالىق نىساندار سالۋ جانە جاڭعىرتۋ، نەگىزگى كولىك دالىزدەرىن دامىتۋ ارقىلى ترانزيتتىك الەۋەتتى ارتتىرۋ باستامالارى دا ەرەكشە نازار اۋدارۋعا لايىق. سونداي-اق ءبىز موڭعولياعا اۆتوموبيل جولىن سالۋ، ترانساۋعان كولىك ءدالىزىن بەلسەندى پايدالانۋ جوبالارىنىڭ كەلەشەگىن تالقىلادىق. سولتۇستىك-وڭتۇستىك باعىتىنداعى بۇل باستامالاردىڭ ءبارىن تولىققاندى ىسكە اسىرۋ دوسپەيىل حالىقتارىمىزدىڭ تۇپكى مۇددەلەرىنە تولىق جاۋاپ بەرەتىنىنە سەنىمدىمىن»، - دەدى مەملەكەت باسشىسى.