قازاقستان Moody’s شكالاسىندا ەل تاريحىنداعى ەڭ جوعارى رەيتينگكە يە بولدى

استانا. قازاقپارات - Moody’s حالىقارالىق رەيتينگ اگەنتتىگى قازاقستاننىڭ ۇزاقمەرزىمدى رەيتينگىن Baa2-دەن Baa1-گە دەيىن كوتەردى، بولجام - «تۇراقتى». بەرىلگەن رەيتينگ - ەل تاۋەلسىزدىگى جىلدارىنداعى ەڭ جوعارى كورسەتكىش.

قازاقستاننىڭ كرەديت رەيتينگىنىڭ جوعارىلاۋى ەكونوميكانى ءارتاراپتاندىرۋدىڭ تۇراقتى قارقىنىمەن بىرگە ينستيتۋتسيونالدىق جانە ساياسي ورتانىڭ ۇزدىكسىز جاقسارۋىمەن بايلانىستى.

بۇل فاكتورلار ەكونوميكالىق تۇراقتىلىقتى نىعايتۋعا جانە كرەديتتىك تۇراقتىلىقتى جوعارى رەيتينگى بار ەلدەر دەڭگەيىنە دەيىن جاقسارتۋعا ىقپال ەتەدى.

اگەنتتىك مەملەكەتتىك باسقارۋ جانە سىبايلاس جەمقورلىققا قارسى كۇرەس سالاسىنداعى پروگرەستى اتاپ ءوتتى.

ساراپشىلاردىڭ پىكىرىنشە، جۇرگىزىلىپ جاتقان رەفورمالار ساياسي تۇراقتىلىققا، ازاماتتىق بەلسەندىلىككە جانە قابىلدانىپ جاتقان سىبايلاس جەمقورلىققا قارسى شارالاردىڭ اشىقتىعىنا وڭ اسەرىن تيىگىزەدى.

Moody’s قارىزدىڭ تومەن دەڭگەيىمەن جانە ونى تولەۋدىڭ جوعارى مۇمكىندىگىمەن سيپاتتالاتىن قازاقستاننىڭ سەنىمدى قارجىلىق كورسەتكىشتەرىنە، سونداي- اق بيۋدجەت تاپشىلىعىن ج ءى ءو-نىڭ %2,5-3 دەڭگەيىندە ۇستاپ تۇرۋ بويىنشا ۇكىمەتتىڭ سارابدال ساياساتىنا نازار اۋداردى.

جاڭا رەفورمالار، سونىڭ ىشىندە جاڭا بيۋدجەت جانە سالىق كودەكستەرىن ەنگىزۋ بيۋدجەت ساياساتىنىڭ تيىمدىلىگىن، قارجىلىق ەسەپتىلىكتى ءارى سالىق تۇسىمدەرىن ارتتىرۋى ءتيىس.

ەسەپتە ساراپشىلار قازاقستان ەكونوميكاسىنىڭ قۇرىلىمىنداعى مۇنايعا قاتىستى ەمەس سەكتور ۇلەسىنىڭ ۇلعايۋىن اتاپ ءوتتى، ول ەلدىڭ كومىرسۋتەكتەرگە تاۋەلدىلىگىن ازايتادى جانە مۇناي باعاسىمەن قاتار ءوندىرۋ دەڭگەيىنىڭ اۋىتقۋىمەن بايلانىستى تاۋەكەلدەردى ازايتادى.

Moody’s ساراپشىلارى ىسكەرلىك كليماتتى جاقسارتۋ مەن ينۆەستيسيالاردى تارتۋ، قولايلى بيزنەس ەكوجۇيەسىن قۇرۋ مەن بيۋروكراتيالىق كەدەرگىلەردى ازايتۋ بويىنشا قابىلدانعان شارالار نەگىزىندە جۇرگىزىلىپ جاتقان جۇمىستاردى وڭ باعالادى. ۇلتتىق ينفراقۇرىلىمدىق ينۆەستيسيالىق پلاتفورمانى ىسكە قوسۋ اكىمشىلىك پروتسەستەردى جەدەلدەتۋگە كومەكتەسەدى.

Moody’s ساراپشىلارى باسقا كومىرسۋتەكتەردى ءوندىرۋشى ەلدەرمەن سالىستىرعاندا قازاقستان ەكونوميكاسىنىڭ اناعۇرلىم كۇشتى پەرسپەكتيۆالارىن اتاپ ءوتتى. اگەنتتىكتىڭ پىكىرىنشە، جۇرگىزىلىپ جاتقان رەفورمالار ەلدىڭ باسەكەگە قابىلەتتىلىگىن نىعايتۋعا ىقپال ەتەدى.

سونىمەن قاتار، Moody’s ساراپشىلارىنىڭ پىكىرىنشە، كولىك-لوگيستيكالىق سەكتوردى دامىتۋ ترانسكاسپي حالىقارالىق ساۋدا باعىتى (ورتا ءدالىز) بويىنشا جۇك ترانزيتى سالاسىنداعى بەلسەندىلىكتىڭ جىلدام وسۋىنە بايلانىستى ءوسۋ مەن ءارتاراپتاندىرۋدىڭ نەگىزگى فاكتورلارىنىڭ ءبىرى بولىپ قالا بەرەدى.

ورتا ءدالىزدىڭ بولاشاعى شەتەلدىك ينۆەستورلاردى ەل ەكونوميكاسىنىڭ ءارتۇرلى مۇنايعا قاتىستى ەمەس سەكتورلارعا، سونىڭ ىشىندە اۆتوموبيل جاساۋ، فارماتسيەۆتيكا، تاماق ونەركاسىبى جانە قۇرىلىس ماتەريالدارى سالالارىنا شەتەلدىك ينۆەستورلاردى تارتۋعا مۇمكىندىك بەرەدى.

قازاقستاننىڭ كرەديتتىك رەيتينگىن ارتتىرۋ ەكونوميكالىق جانە قارجىلىق تۇراقتىلىقتى نىعايتۋعا، ەلدىڭ حالىقارالىق ارەناداعى بەدەلىن جاقسارتۋعا ىقپال ەتەدى.

سونداي-اق كاپيتال نارىقتارىنان ينۆەستيسيا تارتۋ شارتتارىنا ءارى ەكونوميكاعا تىكەلەي شەتەلدىك ينۆەستيتسيالار كولەمىن ۇلعايتۋعا وڭ اسەر ەتەدى.