قازاقستان مەن يزرايلدى مۇنايدان بولەك ءدىنارالىق ديالوگ بايلانىستىرىپ تۇر - سيمونا گالپەرين

يزرايل سىرتقى ىستەر مينيسترلىگى ەۋرازيا جانە بالقان ماسەلەلەرى جونىندەگى باس ديرەكتورىنىڭ ورىنباسارى سيمونا گالپەرين استاناداعى بيريفينگىدە قازاقستان مەن يزرايل اراسىنداعى بايلانىستىڭ باسىم باعىتتارىن اتادى، دەپ حابارلايدى Kazinform.

«مۇناي دەگەن اراداعى الىس-بەرىستىڭ ءبىر عانا كومپونەنتى. بايلانىس اياسى ودان دا ۇلكەن. تەحنولوگيالار بار، رۋحاني ارىپتەستىك تە بار. قازاقستان ءدىنارالىق ديالوگ جۇرگىزىپ كەلەدى. ءبىزدىڭ راۆۆيندەر بىرنەشە اي بۇرىن عانا قازاقستانعا كەلىپ كەتتى. بۇل ارىپتەستىك جالعاسىپ كەلەدى. ءارى قاراي كەڭەيە تۇسەدى دەپ ۇمىتتەنەمىز. ءبىزدىڭ وسىنداعى ەلشىمىز سول ءۇشىن وتە قارقىندى جۇمىس ىستەپ جاتىر»، - دەدى سيمونا گالپەرين.

ب ا ق وكىلدەرى ودان ەكى ەلدىڭ قورعانىس سالاسىنداعى ارىپتەستىگى مەن يزرايلدىڭ شپيوندىق تەحنولوگياسى قازاقستاننىڭ جوعارى لاۋازىمدى تۇلعالارىن اڭدۋعا پايدالانىلعانى تۋرالى دەرەككە بايلانىستى سۇراق قويدى. يزرايل س ءى م وكىلى بۇل ماسەلەلەر بويىنشا جاۋاپ بەرۋگە قۇزىرەتتى ەمەس ەكەنىن ايتتى.

ەسكە سالساق، گازا سەكتورىنداعى پالەستينالىق راديكالدار يزرايل اۋماعىنا زىمىران اتقىلاپ، يزرايلدىڭ ورتالىعى مەن وڭتۇستىگىندە ەرەكشە جاعداي ەنگىزىلگەن ەدى.

سوڭعى مالىمەتتەر بويىنشا، يزرايل اسكەرى گازانى تولىعىمەن قورشاپ، ەكىگە ءبولىپ تاستاعان. سىرتقى ىستەر مينيسترلىگىنىڭ مالىمەتى بويىنشا، گازا سەكتورىندا قازىر قازاقستاننىڭ 76 ازاماتى بار.

«ءبىزدىڭ دەرەكتەرىمىز بويىنشا گازا سەكتورىندا قازاقستان رەسپۋبليكاسىنىڭ 76 ازاماتى بار. وتباسى مۇشەلەرىمەن قوسا ەسەپتەگەندە ولاردىڭ سانى 161. سونىمەن قاتار شەتەلدىك ازاماتتاردىڭ شىعۋىنا بايلانىستى مىسىر جانە يزرايل تاراپىنان بەلگىلى تالاپتار بار. ولاردىڭ ۇشتەن ءبىرى ەۆاكۋاتسيالاۋعا كەلمەيدى. ولار كامەلەتكە تولعاندار، ەرلى-زايىپتىلار»، - دەدى مينيسترلىكتىڭ رەسمي وكىلى ايبەك سمادياروۆ مينيسترلىكتە وتكەن باسپا ءسوز ءماسليحاتىندا.