قازاقستان مەن وزبەكستان اراسىنداعى تاۋار اينالىمى 4 ميلليارد دوللاردان استى

بيىلعى 11 ايدىڭ قورىتىندىسى بويىنشا وزبەكستاننىڭ قازاقستانمەن سىرتقى ساۋدا اينالىمى 4 ميلليارد دوللاردان استى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ستاتيستيكا اگەنتتىگىنىڭ مالىمەتىنشە، بۇگىندە وزبەكستان الەمنىڭ 193 ەلىمەن ساۋدا-ساتتىق جاسايدى.

وسى جىلدىڭ قاڭتار-قاراشا ايلارى ارالىعىندا وزبەكستاننىڭ سىرتقى ساۋدا اينالىمى 57,3 ميلليارد دوللار بولدى. بۇل وتكەن جىلدىڭ سايكەس كەزەڭىمەن سالىستىرعاندا 26,2 پايىزعا كوپ. ونىڭ ىشىندە ەكسپورت 23,2 ميلليارد دوللار (ءوسىم 30,6 پايىز)، ال يمپورت 34,1 ميلليارد دوللاردى (ءوسىم 23,3 پايىز) قۇرادى.

ەلدىڭ باستى ساۋدا سەرىكتەستەرى كوشىن ءالى دە قىتاي باستاپ تۇر. ەكى ەل اراسىنداعى تاۋار اينالىمى - 12,2 ميلليارد دوللار (جالپى كولەمنىڭ 21,3 پايىز).

ەكىنشى ورىنعا رەسەي جايعاستى. وزبەكستاننىڭ بۇل مەملەكەتپەن ساۋدا- ساتتىعى 8,8 ميلليارد دوللارعا (جالپى كولەمنىڭ 15,5 پايىز) جەتتى.

سونىمەن قاتار ەڭ كوپ تاۋار اينالىمى بولعان ەلدەر ۇشتىگىن قازاقستان تۇيىندەپ تۇر. ياعني، ءبىزدىڭ ەلمەن وزبەكستان اراسىنداعى ساۋدا كولەمى 4 ميلليارد دوللاردان (جالپى كولەمنىڭ 7 پايىز) استى.