قازاقستان مەن وزبەكستان اراسىنداعى ستراتەگيالىق ارىپتەستىكتى جانە وداقتاستىقتى دامىتۋ باعدارلاماسى بەكىتىلەدى

استانا. KAZINFORM - اقوردادا قازاقستان-وزبەكستان جوعارى مەملەكەتارالىق كەڭەسىنىڭ ءبىرىنشى وتىرىسى ءوتىپ جاتىر. وتىرىسقا مەملەكەت باسشىسى قاسىم-جومارت توقايەۆ پەن وزبەكستان پرەزيدەنتى شاۆكات ميرزيەۆ قاتىستى.

«ەڭ الدىمەن مەنىڭ شاقىرۋىمدى قابىل الىپ، قازاقستانعا مەملەكەتتىك ساپارمەن كەلگەنىڭىز ءۇشىن پرەزيدەنت شاۆكات ميرزيەۆكە شىنايى ريزاشىلىعىمدى بىلدىرەمىن. تۋىسقان وزبەك حالقىنىڭ باسشىسىن قازاق جەرىندە قارسى الۋ ءبىز ءۇشىن ۇلكەن قۇرمەت، مارتەبە. وزبەكستان قازاق ەلىنە باۋىرلاس مەملەكەت، تاتۋ كورشى، ماڭىزدى ءارى سەنىمدى سەرىكتەس. حالىقتارىمىزدىڭ مىزعىماس دوستىعى ورتاق تاريحقا جانە قۇندىلىقتارعا نەگىزدەلگەن»، - دەدى وتىرىستى اشقان قازاقستان پرەزيدەنتى.

مەملەكەت باسشىسى قازاق- وزبەك قاتىناسى ستراتەگيالىق سەرىكتەستىك جانە وداستاستىق رۋحىندا تۇراقتى دامىپ كەلە جاتقانىن باسا ايتتى.

«ءبىز وزبەكستانمەن ىنتىماقتاستىقتى نىعايتا تۇسۋگە ايرىقشا كوڭىل بولەمىز. بىلتىر وداقتاستىق قاتىناستار تۋرالى تاريحي شارتقا قول قويدىق. بۇگىن الداعى 10 جىلعا ارنالعان ستراتەگيالىق ارىپتەستىكتى جانە وداقتاستىقتى دامىتۋ باعدارلاماسىن بەكىتەمىز. وسى ماڭىزدى قادامدار ەكى ەلدىڭ بايلانىسىن دامىتۋعا ايرىقشا سەرپىن بەرەدى دەپ سەنەمىز»، - دەدى قاسىم- جومارت توقايەۆ.

مىزعىماس دوستىق پەن باۋىرلاستىقتى بەكەمدەي ءتۇسۋ - قازاق- وزبەك ەلىنىڭ ورتاق ماقساتى.

«جاڭا عانا قۇرمەتتى شاۆكات ميرومونوۆيچ ميرزيەۆپەن شاعىن قۇرامدا كەلىسسوز وتكىزدىك. ءبىرقاتار ماڭىزدى ماسەلەنى تالقىلادىق. بۇل كەلىسسوزدەر اشىق ءارى ءوزارا قولداۋ رۋحىندا ءوتتى. ءبىز قارىم-قاتىناسىمىزدى ودان ءارى كەڭەيتۋگە مۇددەلى ەكەندىگىمىزدى تاعى دا راستادىق. ماقسات- مىندەتتەرىمىزدى ايقىندادىق»، - دەدى پرەزيدەنت.

قاسىم-جومارت توقايەۆ عاسىرلار بويى قالىپتاسقان مىزعىماس دوستىق پەن باۋىرلاستىقتى بەكەمدەي ءتۇسۋ، ءوزارا ءتيىمدى ىنتىماقتاستىقتى جاڭا بەلەسكە كوتەرۋ - ەكى ەلدىڭ ورتاق ماقساتى ەكەندىگىن باسا ايتتى.

«ەكىجاقتى ىقپالداستىقتى دامىتۋ ءۇشىن بۇگىنگى كەڭەستىڭ وتىرىسى وتە ماڭىزدى. قابىلداناتىن شەشىمدەردىڭ دە ستراتەگيالىق ءمانى بار. مەن جوعارى مەملەكەتارالىق كەڭەستىڭ جۇمىسى قازاق-وزبەك قاتىناستارىن دامىتۋعا تىڭ سەرپىن بەرەدى دەپ سەنەمىن»، - دەدى مەملەكەت باسشىسى.

اۆتور

مارلان جيەمباي