قازاقستان مەن وزبەكستان اراسىندا قاتىنايتىن العاشقى تۋريستىك پويىز تاشكەنتكە جەتتى
تاشكەنت. قاازاقپارات - 16-قاراشادا الماتىدان جولعا شىققان قازاقستان مەن وزبەكستان اراسىنداعى العاشقى تۋريستىك پويىز بۇگىن تاشكەنتكە جەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
العاشقى تۋريستىك پويىزدى وزبەكستان استاناسىندا قارسى الۋ سالتاناتى ءوتتى. ول «الماتى - تۇركىستان - تاشكەنت - الماتى» باعىتىندا جولعا شىققان.
اتالعان جوبانى ۇيىمداستىرۋعا قازاقستاندىق تاراپ باستاماشى بولدى. تيسىنشە، وعان ەلىمىزدىڭ تۋر كومپانيالارىمەن باۋىرلاس مەملەكەتتىڭ تۋريزم كوميتەتى سەرىكتەس قولداۋ كورسەتتى.
بۇعان دەيىن پويىز جولاۋشىلارى تۇركىستاندا ساياحات جاساپ، ارىستان- باب، قوجا- احمەت ياسساۋي كەسەنەلەرىن ارالاعان جانە وتىرار قالاشىعى مەن كەرۋەن ساراي كەشەنىن تاماشالاعان.
ەندى ولار 2 كۇن بويى وزبەكستان استاناسىنىڭ كورىكتى جەرلەرىن، اسەم تابيعاتى مەن تاريحي ورىندارىن ارالاپ جاتىر. جولاۋشىلارعا قالاداعى قوزعالىس ءۇشىن ارنايى تۋريستىك اۆتوبۋس بەرىلدى. جالپى پويىزداعى ساياحات 20-قاراشاعا دەيىن جالعاسادى.
ايتا كەتەيىك، «الماتى - تۇركىستان - تاشكەنت - الماتى» باعىتىنداعى رەيستىڭ العاشقىسى پيلوتتىق نەگىزدە ورىندالدى. الداعى ۋاقىتتا ول ايىنا 1-2 رەت قاتىناپ وتىرۋى مۇمكىن.
«وسى جوبا ارقىلى الداعى ۋاقىتتا ەلىمىز بويىنشا تولىق تۋريستىك باعىتتاردى اشقىمىز كەلەدى. ماسەلەن، استانادان الاكولگە، كەيىن الماتىعا ءارى قاراي تۇركىستاننان اقتاۋعا ءدال وسىنداي تۋريستىك پويىزداردى شىعارۋ جوسپارىمىز بار. قازىر زاماناۋي ۆاگونداردىڭ سانىن كوبەيتەمىز. وعان الەۋەتىمىز جەتەدى. ەگەر تۋريستىك اعىن ارتاتىن بولسا، قوسىمشا پويىزداردى شىعارامىز. ونىڭ ۇستىنە بىزگە 2025 -جىلى شۆەيتساريالىق جاڭا ۆاگوندار كەلە باستايدى. مۇنىڭ ءبارى ءبىزدىڭ مۇمكىندىگىمىزدى ارتتىرادى»، - دەدى «قازاقستان تەمىر جولى» ۇ ك» ا ق باسقارما ءتوراعاسىنىڭ ورىنباسارى ءانۋار احمەتجانوۆ.
«جىبەك جولى» پويىزىنىڭ قىزمەتىن تەك قازاقستاندىق ەمەس، سونىمەن بىرگە شەتەلدىك تۋريستەر دە پايدالانا الادى. بيلەت قۇنىنا ءۇش مەزگىل تاماقتانۋ، قالالاردى ارالاۋ جانە كاسىبي گيد قىزمەتى كىرەدى.
«وزبەكستان مەن قازاقستان تۋريستەرگە تاريحى تەرەڭدە جاتقان «جىبەك جولى» باعىتى ارقىلى قىزىق دەپ ويلايمىن. بۇل ازىرگە پيلوتتىق جوبا. الداعى ۋاقىتتا سۇرانىس ارتىپ، پويىز ءارى قاراي سامارقان، بۇقارا، حيۋاعا باراتىن بولسا دەگەن تىلەگىمىز بار»، - دەدى جولاۋشى جۇلدىز راقمەت.
پويىز قۇرامىنا قازاقستاندا شىعارىلعان، بۇرىن-سوڭدى باسقا باعىتتاردا قولدانىلماعان 5 جاڭا ۆاگون قوسىلدى. ولاردىڭ سىرتى مەملەكەتتىك ناقىشقا ساي بەزەندىرىلسە، ىشكى بولىگى ۇلتتىق ويۋ-ورنەكپەن كومكەرىلگەن.
ايتا كەتەيىك، پويىز بيلەتى تۋر كومپانيالار ارقىلى ساتىلىمعا شىعادى. جولاۋشىلاردىڭ ايتۋىنشا ونىڭ قۇنى شامامەن 150 مىڭ تەڭگە.
اۆتور
ءاليحان اسقار