قازاقستان مەن وڭتۇستىك كورەيا $1,5 ميللياردتىق 5 جاڭا ينۆەستيتسيالىق جوبانى بەلسەندى تۇردە پىسىقتاۋدا
ق ر- نىڭ پرەمەر- ءمينيسترى ءاليحان سمايىلوۆ پەن وڭتۇستىك كورەيانىڭ ساۋدا ءمينيسترى ان دوك گىن جاڭا بىرلەسكەن ينۆەستيتسيالىق جوبالاردى جۇزەگە اسىرۋ ماسەلەلەرىن تالقىلادى، دەپ حابارلايدى Kazinform ۇكىمەتتىڭ رەسمي سايتىنا سىلتەمە جاساپ.
كەزدەسۋ بارىسىندا پرەمەر- مينيستر قازاقستان رەسپۋبليكاسىنىڭ ۇكىمەتى وڭتۇستىك كورەيامەن ساۋدا- ەكونوميكالىق ىنتىماقتاستىقتى ودان ءارى دامىتۋدا ۇلكەن پەرسپەكتيۆالار كورەتىنىن اتاپ ءوتتى. اتاپ ايتقاندا، بۇعان تاۋار اينالىمىنىڭ سەرپىندى ءوسۋى دالەل: بىلتىر ول 2,3 ەسە ءوسىپ، $6,1 ميللياردتان استى، ال بيىلعى جىلدىڭ 8 ايىندا تاعى % 11- عا ارتتى.
«ءوزارا ساۋدا نومەنكلاتۋراسىن كەڭەيتۋ ءۇشىن بىرلەسە ءىس- ارەكەت ەتۋ كەرەك دەپ سانايمىن. بۇل جەردەگى ماڭىزدى قۇرال - قازاقستان- كورەيا ساۋدا- ەكونوميكالىق جانە عىلىمي- تەحنيكالىق ىنتىماقتاستىق جونىندەگى ۇكىمەتارالىق كوميسسيا. الداعى ۋاقىتتا ونىڭ جۇمىسىن جانداندىرىپ، كەزەكتى وتىرىسىن وتكىزۋ قاجەت دەپ ويلايمىن»، - دەدى ءاليحان سمايىلوۆ.
سونداي- اق ول وڭتۇستىك كورەيا ەلىمىزدىڭ ەكونوميكاسىنداعى ءىرى ينۆەستورلاردىڭ توپ-10-دىعىنىڭ قاتارىندا ەكەنىن اتاپ ءوتتى. اتاپ ايتقاندا، سوڭعى 18 جىلدا قازاقستانعا $9,2 ميللياردقا جۋىق ينۆەستيتسيا تارتىلعان. ال بىلتىر كورەيادان كەلگەن تىكەلەي ينۆەستيتسيانىڭ جالپى كولەمى % 85- عا ءوسىپ، جاڭا رەكوردتىق - $1,5 ميللياردقا جەتتى.
پرەمەر- ءمينيستردىڭ سوزىنشە، قازىرگى ۋاقىتتا ەلىمىزدە 700-دەن استام كورەيالىق كاسىپورىن جۇمىس ىستەيدى، ولاردىڭ ىشىندەگى ءىرى كومپانيالار - KIA، Hyundai, Samsung جانە LG.
«بۇگىندە جالپى قۇنى $1,5 ميلليارد بولاتىن 5 جوبا جۇزەگە اسىرۋعا دايىن جانە جالپى قۇنى شامامەن $500 ميلليوندىق تاعى 25 پەرسپەكتيۆالىق جوبا ازىرلەنۋدە. ايقىن مىسال رەتىندە، قوستانايداعى جىلىنا 70 مىڭ اۆتوكولىك وندىرۋگە قۋاتى بار، ينۆەستيتسيا كولەمى $190 ميلليون جاڭا ءىرى KIA زاۋىتىنىڭ قۇرىلىسىن اتاۋعا بولادى»، — دەدى ءاليحان سمايىلوۆ.
ول قازاقستان ۇكىمەتى الداعى ۋاقىتتا دا ينۆەستورلاردىڭ ەلىمىزدە جايلى جۇمىس ىستەۋى ءۇشىن بارلىق قاجەتتى جاعدايدى جاسايتىنىن ايتتى.
ءوز كەزەگىندە ان دوك گىن وڭتۇستىك كورەيا قازاقستانمەن ەكونوميكانىڭ ءارتۇرلى سالاسى بويىنشا بەلسەندى تەحنولوگيالىق ىنتىماقتاستىققا دايىن ەكەنىن اتاپ ءوتتى.
«قازاقستانداعى KIA زاۋىتى سياقتى جوبالاردىڭ ماڭىزى زور. ەگەر ول ءساتتى جۇزەگە اسىرىلسا، قازاقستاننىڭ اۆتوموبيل ونەركاسىبى ۇلگىگە اينالماق. بۇل باسقا دا وسىنداي زاۋىتتار مەن وندىرىستەردىڭ قۇرىلىسىنا ىقپال ەتەدى»، - دەدى وڭتۇستىك كورەيانىڭ ساۋدا ءمينيسترى.
اۆتور
ايدار وسپاناليەۆ