قازاقستان مەن تۇركى ەلدەرى دونورلاردىڭ ءبىرىڭعاي اقپاراتتىق جۇيەسىن قۇرادى

استانا. قازاقپارات - 8-قازان كۇنى ازەربايجاننىڭ شۋشا قالاسىندا تۇركىتىلدەس مەملەكەتتەر ۇيىمىنا مۇشە مەملەكەتتەر Türktransplant ءبىرىڭعاي اقپاراتتىق جۇيەسىن قۇرۋ تۋرالى حاتتاماعا قول قويدى.

ۇيىمعا مۇشە ەلدەردىڭ دەنساۋلىق ساقتاۋ مينيسترلەرى مەن بايقاۋشىلارىنىڭ IV وتىرىسىنىڭ قورىتىندىسى بويىنشا قابىلدانعان بىرلەسكەن دەكلاراتسيا شەڭبەرىندە ءتيىستى ۋاعدالاستىققا قول جەتكىزىلدى.

- Türktransplant قۇرۋدىڭ ماقساتى شامامەن 160 ميلليون حالقى بار گەوساياسي كەڭىستىكتەگى ازاماتتار ءۇشىن بەلگىلى ءبىر مەديتسينالىق قىزمەتتەرگە قولجەتىمدىلىكتى ارتتىرۋ، - دەپ اتاپ ءوتتى ازەربايجان دەنساۋلىق ساقتاۋ ءمينيسترى تەيمۋر مۇسايەۆ باسپا ءسوز بريفينگىندە.

ونىڭ ايتۋىنشا، باستاپقى كەزەڭدە بۇل ەۋروپاداعى ترانسپلانتولوگيا ينستيتۋتىنا ۇقساس «ءبىرىڭعاي اقپاراتتىق ورتالىق» بولۋى مۇمكىن.

- كەيىن ازاماتتار دەنساۋلىعىنىڭ ءبىرىڭعاي دەرەكتەر بازاسىن قۇرۋعا جاردەمدەسەتىن بولادى. ءتيىستى ساراپشىلار جينالىپ، وسى ستاندارتتاردى انىقتايدى، - دەپ قوستى مينيستر ت م ۇ-عا مۇشە ەلدەر اراسىنداعى اقپارات الماسۋ ۇدەرىسىنە تۇسىنىك بەرە وتىرىپ.

حاتتاما مۇشە ەلدەردىڭ جانە تمۇ باقىلاۋشىلارىنىڭ ۇلتتىق زاڭناماسىنا سايكەس ت م ۇ شەڭبەرىندە دەنساۋلىق ساقتاۋدىڭ ءبىرىڭعاي سيفرلىق ستاندارتتارىن ازىرلەۋ ارقىلى پاتسيەنتتەردىڭ دەنساۋلىعى تۋرالى مەديتسينالىق دەرەكتەرمەن الماسۋدى جەڭىلدەتەدى. ءبىر سوزبەن ايتقاندا، قۇجات ەلدەر اراسىنداعى دونورلىق ورگاندار مەن ترانسپلانتاتسيانى ۇيلەستىرۋگە كومەكتەسەدى.

ءبىرىڭعاي «Turktransplant» اقپاراتتىق جۇيەسىن قۇرۋ باستاماسى وتكەن جىلى سامارقاندتا ت م ۇ-ىنا مۇشە ەلدەردىڭ دەنساۋلىق ساقتاۋ مينيسترلەرىنىڭ وتىرىسىندا كوتەرىلگەن بولاتىن.

اۆتور
ەركەجان سماعۇلوۆا