قازاقستان مەن تايلاند اراسىندا اۋە رەيستەرىنىڭ سانى ارتادى

بانگكوك قالاسىندا قازاقستان مەن تايلاندتىڭ اۆياتسيا بيلىك ورگاندارى كەلىسسوز جۇرگىزدى، دەپ حابارلايدى Kazinform.

قازاقستان دەلەگاتسياسىن ازاماتتىق اۆياتسيا كوميتەتى ءتوراعاسىنىڭ ورىنباسارى تيمۋر تلەگەنوۆ، تايلاند كورولدىگىنىڭ دەلەگاتسياسىن - تايلاندتىڭ ازاماتتىق اۆياتسيا باسقارماسى باس ديرەكتورىنىڭ ورىنباسارى سارۋن بەندجانيرات باسقاردى.

تاراپتار اۋە قاتىناسى جونىندە جاڭا ۇكىمەتارالىق كەلىسىم جاساسۋ مۇمكىندىگىن جانە ەكى ەل اراسىنداعى اۋە تاسىمالىنا سۇرانىستىڭ ارتۋىنا بايلانىستى رەيس سانىنىڭ ودان ءارى ۇلعايۋىن تالقىلادى.

كەلىسسوز قورىتىندىسى بويىنشا ءوزارا تۇسىنىستىك تۋرالى مەموراندۋمعا قول قويىلدى.

مەموراندۋمعا سايكەس رۇقسات ەتىلگەن رەيستەردىڭ جالپى سانى - 5,4 (اپتاسىنا 402 دەن 544 كە دەيىن)، ونىڭ ىشىندە استانا، الماتى، قاراعاندى، شىمكەنت جانە بانگكوك، پۋحكەت، كرابي، ۋتاپاو قالالارى اراسىندا - اپتاسىنا 84 رەيس، ال قالعان شارتتىق باعىتتاردا - اپتاسىنا 10 عا دەيىن ارتادى.

قازاقستان مەن تايلاند اراسىندا رەيس سانىنىڭ ارتۋى ەلدەر اراسىنداعى تۋريستىك، مادەني، ينۆەستيتسيالىق جانە ىسكەرلىك ىنتىماقتاستىقتى دامىتۋدى جەدەلدەتۋگە مۇمكىندىك بەرەدى.

ايتا كەتەيىك، تايلاند كورولدىگىنىڭ ۇكىمەتى 25- قىركۇيەكتەن باستاپ 2024-جىلعى 29- اقپانعا دەيىن قازاقستان ازاماتتارى ءۇشىن ۋاقىتشا ۆيزاسىز رەجيم ەنگىزدى.

وسىلايشا قازاقستاندىقتار تايلاندتا 30 كۇنگە دەيىن ۆيزاسىز ءجۇرىپ-تۇرا الادى.

ۇزاق ساپارلارعا ءتيىستى ۆيزا قاجەت.