قازاقستان مەن رەسەي اراسىندا ەشقانداي كۇردەلى پروبلەما جوق - مەملەكەت باسشىسى

استانا. KAZINFORM - مەملەكەت باسشىسى قاسىم-جومارت توقايەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەڭەيتىلگەن قۇرامداعى كەلىسسوزدە ەكى ەلدىڭ ۇكىمەتتەرىنە ءبىرقاتار تاپسىرمالار بەرىلگەنىن ءمالىم ەتتى.

«مەملەكەتتىك ساپارمەن كەلۋ بارۋ تۋرالى شەشىم قابىلداعانىڭىز ءۇشىن تاعى دا ريزاشىلىعىمدى بىلدىرەمىن. بۇعان دەيىن ايتقانىمداي، بۇل ساپار ءبىزدىڭ ستراتەگيالىق ارىپتەستىگىمىزدى كەڭەيتىپ، تەرەڭدەتۋ تۇرعىسىنان وتە ماڭىزدى. جاڭا عانا شاعىن قۇرامداعى كەلىسسوزدە ءبىز كۇن تارتىبىندەگى ماسەلەلەردى ىسكەرلىك احۋالدا، وتە تىڭعىلىقتى تالقىلادىق»، - دەدى پرەزيدەنت.

مەملەكەت باسشىسى ەكى ەل ىنتىماقتاستىعىنىڭ كۇن ءتارتىبى كەڭ اۋقىمدى ەكەنىن اتاپ ءوتتى.

«ورتاق ماملەگە كەلىپ، ۇكىمەتكە ءتيىستى تاپسىرمالار بەردىك دەپ ويلايمىن. الدىمىزدا وتە ۇلكەن جۇمىس كۇتىپ تۇر. مەن پرەزيدەنت رەتىندە، بۇل جۇمىستىڭ ءبارىن باقىلاۋدا ۇستايمىن. ويتكەنى ءبىز رەسەي فەدەراتسياسىمەن ىنتىماقتاستىقتى دامىتۋعا باسىمدىق بەرەمىز. ءبىزدىڭ مەملەكەتتەرىمىزدىڭ اراسىندا ەشقانداي كۇردەلى پروبلەما جوق. باسقا ماسەلەلەردە دە سونداي. ىنتىماقتاستىق تىعىز دامىپ جاتقاندىقتان ارينە، مەملەكەت باسشىلارى مەن ۇكىمەت باسشىلارىنىڭ نازارىن قاجەت ەتەتىن ماسەلەلەر تۋىنداپ جاتادى. ول ءۇشىن بارلىق ماسەلەلەردى شەشۋگە باعىتتالعان وسىنداي ءىس- شارالار ىسكە اسىرىلادى»، - دەدى قاسىم-جومارت توقايەۆ.

قازاقستان- ءبىزدىڭ ستراتەگيالىق سەرىكتەسىمىز جانە سەنىمدى وداقتاسىمىز. بۇل تۋرالى اقوردادا ەلىمىزگە مەملەكەتتىك ساپارمەن كەلگەن رەسەي پرەزيدەنتى ۆلاديمير پۋتين مەملەكەت باسشىسى قاسىم-جومارت توقايەۆپەن كەڭەيتىلگەن قۇرامداعى كەلىسسوز بارىسىندا ايتتى.

«قاسىم-جومارت كەمەل ۇلى، شاقىرعانىڭىز ءۇشىن، وسىنداي جىلى قابىلداعانىڭىز ءۇشىن العىس ايتقىم كەلەدى. شىنىندا دا، قازاقستان - ءبىزدىڭ ستراتەگيالىق سەرىكتەسىمىز جانە سەنىمدى وداقتاسىمىز. ارينە، ءبىز قازىر شاعىن قۇرامداعى كەلىسسوزدە ءوزارا ءىس-قيمىلدىڭ بارلىق ماسەلەسىن تالقىلادىق، وسىنداي ۇلكەن ەكى جاقتى پروتسەستىڭ اياسىندا تۋىندايتىن ماسەلەلەرگە نازار اۋداردىق. كەيبىر ماسەلەلەر، ءسىز ايتقانداي، ءبىزدىڭ تاراپىمىزدان، رەسەيدەن نازار اۋدارۋدى تالاپ ەتەدى جانە ءسىز رەسەي تاراپىنان، رەسەيلىك سەرىكتەستەردەن بەلگىلى ءبىر شەشىمدەردى كۇتەسىز»، - دەدى ۆلاديمير پۋتين.

سونىمەن قاتار ول رەسەي تاراپىنان دا سۇراقتار تۋىندايتىندىعىن اتاپ ءوتتى.

«ءبىراق ەڭ باستىسى جانە بۇل قۇرامداعى كەلىسسوزدەر بارىسىندا بايقالعانى، وسى ماسەلەلەردىڭ بارلىعىنا جاۋاپ ىزدەۋگە دەگەن نيەت بار جانە ولار تابىلىپ تا جاتىر. ءبىز بىرلەسىپ شەشە الماعان بىردە-ءبىر ماسەلەنى بىلمەيمىن. وسىنداي ىڭعايمەن ۇلكەن جەتىستىكتەرگە جەتەمىز.

دەگەنمەن، قازاقستان بۇگىنگى تاڭدا ءسىزدىڭ باسشىلىعىڭىزبەن تاماشا جەتىستىكتەرگە جەتىپ جاتىر. بۇل ءبىزدى دە قۋانتادى. ويتكەنى، ىنتىماقتاستىق كولەمى ءوزارا ارتىپ كەلەدى. ول قازىردىڭ وزىندە 30 ميلليارد دوللارعا جەتىپ قالدى. بۇگىنگى كۇننىڭ بارلىق قيىندىعىنا قاراماستان ءوزارا ءىس-قيمىل تەك كەڭەيىپ، ەكى تاراپ ءۇشىن دە قىزىقتى جانە ءوزارا ءتيىمدى بولا ءتۇستى»، - دەدى رەسەي باسشىسى.

ۆ. پۋتين بۇگىن ونەركاسىپ پەن قارجىدان بولەك، وزگە دە وزەكتى ماسەلەلەر تالقىلانعانىن اتاپ ءوتتى. سونداي-اق ەرتەڭ ەلوردادا وتەتىن ۇ ق ش ۇ اياسىندا قاۋىپسىزدىك ماسەلەسى قوزعالاتىندىعىنا نازار اۋدارتتى.

اۆتور

مارلان جيەمباي