قازاقستان مەن قىتاي «نۇر جولى» بەكەتىنىڭ وتكىزۋ قابىلەتىن ارتتىرادى
استانا. KAZINFORM - قازاقستان مەن قىتاي كولىك مينيسترلەرى بىرلەسە «نۇر جولى» قازاقستان- قىتاي اۆتوكولىك وتكىزۋ بەكەتىنە بارىپ، ونىڭ جۇمىسىمەن تانىستى.
شەكارا ماڭىنداعى ينفراقۇرىلىمدى دامىتۋ - جۇك تاسىمالى كولەمىن ودان ءارى ارتتىرۋداعى باسىم مىندەتتەردىڭ ءبىرى.
- مينيسترلەر وتكىزۋ بەكەتىندە جۇك كولىكتەرى جۇرگىزۋشىلەرىمەن سويلەسىپ، تۇيتكىلدى ماسەلەلەردى تالقىلاپ، بەكەتتىڭ وتكىزۋ قابىلەتىن ودان ءارى ارتتىرۋ اياسىندا كەلىسىمگە كەلدى. كولىك ۆەدومستۆولارىنىڭ باسشىلارى ءترانزيتتىڭ ۇزدىكسىز ءوتۋى ءۇشىن اكىمشىلىك كەدەرگىلەردى جويۋ، شەكارالىق ينفراقۇرىلىمنىڭ الەۋەتىن ارتتىرۋ، سيفرلاندىرۋدى دامىتۋ سياقتى ءبىرقاتار ماسەلەنى قولعا الادى، - دەلىنگەن حابارلامادا.
مارات قارابايەۆ پەن ليۋ ۆەي ەكى مينيسترلىكتىڭ وكىلدەرىنەن تۇراتىن ارنايى تۇراقتى جۇمىس توبىن قۇرۋعا كەلىستى. مينيسترلەردىڭ قاتىسۋىمەن بولاتىن كەلەسى كەلىسسوز كەزەڭى ءبىر ايدان سوڭ وتەدى.
جۇمىس ساپارى بارىسىندا وتكەن شاراعا كەدەن جانە شەكارا قىزمەتىنىڭ وكىلدەرى دە قاتىستى.
بىلتىردان بەرى قازاقستان مەن قىتاي رۇقسات بەرۋ بلانكىلەرىن ەلەكتروندى فورماتتا الماستىرىپ كەلەدى. بيىل ەكى ەل 90 مىڭ ش ر ب الماستى.