قازاقستان مەن قىتاي شەكاراسىندا جولاۋشىلار اعىنى كۇرت ارتتى

استانا. قازاقپارات – 15-شىلدەدەگى جاعداي بويىنشا قىتايدىڭ شىنجاڭ-ۇيعىر اۆتونوميالىق اۋدانىنداعى جەمەنەي باقىلاۋ-وتكىزۋ پۋنكتى ارقىلى قازاقستانمەن شەكارادان وتكەن جانە كىرگەن جولاۋشىلار سانى 49 مىڭ ادامنان استى. بۇل تۋرالى شينحۋا اگەنتتىگى حابارلادى.

سول كەزەڭدە شەكارادان وتكەن كولىك سانى 12 مىڭعا جۋىقتاعان.

جەرگىلىكتى تۋريستىك اگەنتتىك وكىلى يان چۋننىڭ ايتۋىنشا، ترانسشەكارالىق تۋريستىك توپتار سانى ايتارلىقتاي وسكەن. ونىڭ اگەنتتىگى مامىر-ماۋسىم ايلارىندا ۇزاقتىعى 1 كۇننەن 30 كۇنگە دەيىنگى قازاقستانعا باعىتتالعان ءتۇرلى اۆتوتۋريستىك باعىتتار ۇيىمداستىرىپ، 28 كولىكپەن ساپار شەككەن تۋريستەرگە قىزمەت كورسەتكەن.

مۇنداي وسىمگە قىتاي مەن قازاقستان اراسىنداعى ءوزارا ۆيزاسىز رەجيمنىڭ ەنگىزىلۋى سەبەپ بولدى.

ەسكە سالايىق، ۆيزاسىز قاتىناس 2023-جىلدىڭ قاراشا ايىنان باستاپ كۇشىنە ەنگەن بولاتىن.

- ۆيزاسىز رەجيم ترانسشەكارالىق ساپارلاردى الدەقايدا ىڭعايلى ەتتى، - دەيدى الماتىدان كەلگەن تۋريست ايتوش ماحمەت. ول شىنجاڭداعى بۋىرشىن اۋدانى مەن ءۇرىمجى قالاسىنا جانە وزگە دە وڭىرلەرگە بارۋدى جوسپارلاپ وتىر.

بۋىرشىن ۋەزىنىڭ مادەنيەت، سپورت، راديو، تەلەۆيدەنيە جانە تۋريزم باسقارماسى وكىلى ليۋ شۋجۋننىڭ مالىمەتىنشە، ترانسشەكارالىق تۋريزم اياسىندا قىتاي مەن قازاقستاننىڭ تۋريستىك الەۋەتىن بىرىكتىرەتىن جاڭا باعىتتار ازىرلەنىپ جاتىر. بۇل شەتەلدىك تۋريستەرگە جەمەنەي بەكەتى ارقىلى قازاقستانعا وتۋگە مۇمكىندىك بەرەدى.