قازاقستان مەن قىتاي اراسىندا اۋە رەيستەرى كوبەيىپ جاتىر

ازاماتتىق اۆياتسيا كوميتەتى پرەزيدەنتتىڭ ەلدىڭ ترانزيتتىك الەۋەتىن ارتتىرۋ جونىندەگى تاپسىرماسىن ورىنداۋ ماقساتىندا، سونداي-اق قولدانىستاعى حالىقارالىق باعىتتا رەيس سانىن ارتتىرۋ بويىنشا تۇراقتى نەگىزدە جۇمىس جۇرگىزىپ كەلەدى، دەپ حابارلايدى Kazinform.

وسىلايشا ازاماتتىق اۆياتسيا كوميتەتى ءتوراعاسىنىڭ مىندەتىن اتقارۋشى تيمۋر تلەگەنوۆ قازاقستان رەسپۋبليكاسىنا تۇراقتى Air China, China Southern Airlines جانە Loong Airlines قىتايلىق اۋە كومپانيالارىنىڭ وكىلدەرىمەن كەزدەستى.

كەزدەسۋ بارىسىندا China Southern Airlines اۋەكومپانياسى 2024 -جىلعى 23-قاڭتاردان باستاپ اپتاسىنا 3 رەيس جيىلىگىمەن الماتى - بەيجىڭ باعىتى بويىنشا رەيستەر اشۋدى جوسپارلاپ وتىرعانىن حابارلادى.

سونىمەن قاتار سۇرانىس ارتقان كەزدە China Southern Airlines اۋەكومپانياسى الماتى قالاسىنان ءۇرىمشى جانە سيان قالالارىنا، سونداي-اق استانا قالاسىنان ءۇرىمجى قالاسىنا 2024 -جىلدىڭ كوكتەم- جاز ماۋسىمىنان باستاپ قولدانىستاعى باعىتتار بويىنشا رەيس سانىن ۇلعايتۋ مۇمكىندىگىن قاراستىرۋعا دايىن.

ءوز كەزەگىندە Loong Airlines اۋەكومپانياسى بيىل جەلتوقسان ايىندا الماتى - حاڭجوۋ باعىتى بويىنشا ورىندالاتىن رەيستەر سانىن اپتاسىنا 3 رەيستەن 4 رەيسكە دەيىن ارتتىرۋدى جوسپارلاپ وتىر.

كەلەسى جىلى جولاۋشىلار اعىنى ارتقان جاعدايدا اۋە كومپانياسى رەيستەر سانىن اپتاسىنا 7 گە دەيىن ارتتىرۋدى كوزدەپ وتىر.

سونداي-اق اۋەكومپانيا 2024 -جىلى استانا - حاڭجوۋ، استانا - چىڭدۋ جانە الماتى- چىڭدۋ اۋە باعىتتارى بويىنشا رەيستەردى اشۋ ماسەلەسىن پىسىقتاپ جاتىر.

Air China اۋەكومپانياسى دا استانا - شيان - بەيجىڭ باعىتى بويىنشا ورىندالاتىن رەيستەر سانىن اپتاسىنا 2 دەن 3 كە دەيىن ۇلعايتۋ ماسەلەسىن قاراستىرىپ جاتقانىن حابارلادى.

بۇل رەتتە اۋەكومپانيا شيان قالاسىنا قونباي، ەكى استانا اراسىندا اپتاسىنا ءۇشىنشى رەيستى تىكەلەي ورىنداۋ ماسەلەسىن دە قاراستىراتىن بولادى.

جالپى 2024 -جىلعى كوكتەم- جاز ناۆيگاتسيا كەزەڭىندە ەكى ەل اراسىنداعى رەيستەر سانى قولدانىستاعى جانە جاڭا اۋە باعىتتارى بويىنشا اپتاسىنا 30 رەيسكە دەيىن ارتادى.