قازاقستان مەن قىرعىزستاننىڭ اۆياتسيالىق ىزدەستىرۋ سالاسىندا ىنتىماقتاستىعى نىعايادى

استانا. KAZINFORM -بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ مينيسترلەر كابينەتى اراسىنداعى اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى.

«زاڭ 2022 -جىلعى 26-مامىردا بىشكەك قالاسىندا جاسالعان قازاقستان ۇكىمەتى مەن قىرعىزستان مينيسترلەر كابينەتى اراسىنداعى اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋعا باعىتتالعان. حالىقارالىق ازاماتتىق اۆياتسيا تۋرالى كونۆەنتسيانىڭ 12-قوسىمشاسىن ورىنداۋعا ارنالعان. كەلىسىمنىڭ ماقساتى - حالىقارالىق ازاماتتىق اۆياتسيا ۇيىمىنىڭ (ي ك ا و) ستاندارتتارى مەن ۇسىنىلاتىن پراكتيكاسىنا سايكەس اپاتتىق جاعدايداعى نەمەسە اپاتقا ۇشىراعان اۋە كەمەلەرىنىڭ جولاۋشىلارى مەن ەكيپاجدارىن ىزدەستىرۋ جانە قۇتقارۋ ءۇشىن مەملەكەتتەردىڭ ىزدەستىرۋ-قۇتقارۋ قىزمەتتەرى اراسىنداعى ىنتىماقتاستىقتى نىعايتۋ. وسى كەلىسىم شەكتەس مەملەكەتتەردىڭ اۋە كەمەلەرىن ىزدەستىرۋ جانە قۇتقارۋ سالاسىنداعى ءىس- قيمىلدارىن ۇيلەستىرۋگە ىقپال ەتەدى»، - دەدى سەناتور اليشەر ساتۆالديەۆ.

اتاپ ايتقاندا، كەلىسىمنىڭ ەرەجەلەرى كەلەسىدەي:

- اپاتقا ۇشىراعان اۋە كەمەلەرىنىڭ جولاۋشىلارى مەن ەكيپاجدارىن ىزدەستىرۋ. سونىمەن بىرگە، قۇتقارۋ جۇمىستارى ءۇشىن ەكى مەملەكەتتىڭ ىزدەستىرۋ-قۇتقارۋ قىزمەتتەرى اراسىنداعى ىنتىماقتاستىقتى نىعايتۋ؛

- اۆياتسيالىق وقيعالار تۋرالى ءوزارا حابارلاۋ. اپاتقا ۇشىراعان اۋە كەمەلەرىن، جولاۋشىلار مەن ەكيپاجداردى ىزدەستىرۋ بويىنشا شارالار قابىلداۋ؛

- ەكى تاراپتىڭ ىزدەستىرۋ-قۇتقارۋ قىزمەتتەرىنىڭ بىرلەسكەن وقۋ- جاتتىعۋلارىن وتكىزۋ، اقپارات جانە تاجىريبە الماسۋ.

«كەلىسىم اياسىندا ەكى جاق بىرلەسكەن ىزدەستىرۋ- قۇتقارۋ وپەراتسيالارىن جۇرگىزۋدىڭ نورماتيۆتىك نەگىزىن انىقتايدى جانە ىزدەستىرۋ جانە قۇتقارۋ اۋداندارىنىڭ شەكاراسىن ايقىندايدى. قۇجاتتا كەلىسىمدى ىسكە اسىرۋعا جاۋاپتى قۇزىرەتتى ورگاندار بەلگىلەنەدى. ءقازىر اۆياتسيالىق وقيعالار ءۇشىن «قازاەروناۆيگاتسيا» بازاسىندا 27 اۋەايلاق پەن قونۋ الاڭدارىندا تىكۇشاق كەزەكشىلىگى ۇيىمداستىرىلعان. قاجەت بولعاندا قۇتقارۋ جۇمىستارىنا قورعانىس مينيسترلىگىنىڭ تىكۇشاقتارى دا تارتىلۋى مۇمكىن. حالىقارالىق ستاندارتتار بويىنشا ءبىلىم العان قىزمەتكەرلەر جانە تاۋلىك بويى جۇمىس ىستەيتىن بايلانىس قۇرالدارى قاراستىرىلعان. سونىمەن قاتار، ىزدەستىرۋ- قۇتقارۋدى ۇيلەستىرۋ ورتالىعى قۇرىلدى. ىزدەستىر- قۇتقارۋ وپەراتسيالارىن ۇيىمداستىرۋ ءۇشىن قورعانىس مينيسترلىگىنىڭ پاراشيۋتتىق- ديسانتتىق توپتارى جانە توتەنشە جاعدايلار مينيسترلىگىنىڭ ىزدەستىرۋ- قۇتقارۋ كوماندالارى بىرلەسىپ جۇمىس اتقارۋعا ءازىر. كەلىسىمدى راتيفيكاتسيالاۋ قازاقستان مەن قىرعىزستان اۋماعىندا اۆياتسيالىق ىزدەستىرۋ جانە قۇتقارۋ جۇمىستارىن جەدەل ۇيىمداستىرۋعا، وسى سالاداعى ەكىجاقتى ىنتىماقتاستىقتى نىعايتۋعا ىقپال ەتەدى»، - دەدى دەپۋتات.