قازاقستان مەن قىرعىزستان اراسىندا بارلىق ماسەلە بويىنشا تۇسىنىستىك بار - ەرلان قارين

استانا. KAZINFORM - قىرعىز رەسپۋبليكاسىنىڭ پرەزيدەنتى سادىر جاپاروۆتىڭ ەلىمىزدەگى رەسمي ساپارى اياسىندا قازاق-قىرعىز زيالىلارى مەن شىعارماشىلىق وكىلدەرىنىڭ فورۋمى ءوتىپ جاتىر.

سول فورۋمنىڭ جالپى وتىرىسىنا قازاقستاننىڭ مەملەكەتتىك كەڭەسشىسى ەرلان قارين مەن قىرعىز رەسپۋبليكاسىنىڭ مەملەكەتتىك حاتشىسى سۋيۋنبەك كاسمامبەتوۆ قاتىستى.

ءىس-شارادا ءسوز العان ەرلان قارين قازاق-قىرعىز باۋىرلاستىعىنىڭ ءتۇپ تاريحىنا توقتالىپ، قوس حالىقتىڭ الىپ پەرزەنتتەرى اراسىنداعى دوستىقتىڭ وزىق ۇلگىلەرىنەن مىسال كەلتىردى.

«بۇل كەلەلى كەڭەسىمىز قىرعىز رەسپۋبليكاسىنىڭ پرەزيدەنتى قۇرمەتتى سادىر نۇرعوجا ۇلى ساپاروۆتىڭ ەلىمىزگە رەسمي ساپارى اياسىندا ۇيىمداستىرىلىپ وتىر. سونىمەن قاتار قازاقستانعا قىرعىز رەسپۋبليكاسىنىڭ اقساقالدارى مەن عالىمداردان، اقىن-جازۋشىلاردان قۇرالعان ۇلكەن دەلەگاتسيا كەلدى»، - دەدى ول.

مەملەكەتتىك كەڭەسشى قازاق-قىرعىز تۇتاستىعىنىڭ قانداي دەڭگەيدە دامىپ جاتقانىن ەلدەگى تاسقىن تاعى ءبىر كورسەتكەنىن ەسكە سالدى.

«وسى ءبىر جۇرەكتەن وتكىزىپ، سانامەن سەزەتىن ىقپالداستىق ەكى ەلدى ءاردايىم بىرلىكتە ۇستاپ كەلەدى. سونىڭ ارقاسىندا قازاق پەن قىرعىز تالاي قيىن-قىستاۋ شاقتا ءبىر-بىرىنە قول ۇشىن سوزىپ، جابىققاندا جۇباتىپ، تورىققاندا قولداۋ كورسەتەدى. ەلگە توتەننەن اپات كەلگەندە ءبىر-بىرىنە كومەگىن الا جۇگىرەتىن دە ەكى ەل. بۇرىنعى وتكەننىڭ ءبارىن سانامالاپ جاتپاي، سوڭعى ەكى جاعدايدى ايتساق تا، وعان انىق كوز جەتكىزەمىز. بىشكەكتە توتەنشە جاعداي بولىپ، جۇرتشىلىق جىلۋدان تارىققاندا قازاقستان العاشقىلاردىڭ ءبىرى بولىپ قولداۋ جاسادى. ال ەلىمىزدە تابيعي اپات بولىپ، قارعىن سۋ كەمەرىنەن اسقاندا قىرعىزستان ەڭ ءبىرىنشى بولىپ گۋمانيتارلىق كومەك جىبەردى. وسى قيىن-قىستاۋ كەزدە قول ۇشىن بەرىپ، نيەتتەرىڭىزدى كورسەتكەندەرىڭىزگە ءارقاشان ريزاشىلىعىمىزدى ايتامىز. بۇل دا باۋىرلاستىقتىڭ، بىرلىكتىڭ، جاناشىرلىقتىڭ ايقىن كورىنىسى. ەڭ باستىسى، قازاقستان مەن قىرعىزستان اراسىندا بارلىق ماسەلە بويىنشا تۇسىنىستىك بار. ساياسي-ەكونوميكالىق بايلانىستار قارقىندى دامىپ كەلەدى، مادەني-گۋمانيتارلىق قاتىناستار جوعارى دەڭگەيدە. بۇل ىنتىماقتاستىق الداعى ۋاقىتتا دا ءوز باعىتىنان اينىمايدى دەپ سەنەمىز. بۇگىنگى جيىن دا قوس حالىقتىڭ بىرلىگىن بەكەمدەۋگە سەپتىگىن تيگىزەتىنى ءسوزسىز»، - دەدى ەرلان قارين.

جيىن بارىسىندا ءسوز سويلەۋشىلەر قازاق پەن قىرعىزعا ورتاق مادەني قۇندىلىقتار مەن سالت-ءداستۇر تۋرالى كوپ ايتتى. سونىڭ ءبىر مىسالى رەتىندە ەكى جاقتىڭ سىيلى اقساقالدارىنا الما-كەزەك شاپان جابىلدى.