قازاقستان مەن قاتار 1,3 ميلليارد دوللاردى قۇرايتىن جوبالاردى پىسىقتاپ جاتىر
استانا. KAZINFORM - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قاتار ۇكىمەتى اراسىنداعى ينۆەستيتسيالاردى ءوزارا كوتەرمەلەۋ جانە قورعاۋ تۋرالى كەلىسىمدى راتيفيكاتسيالاۋ تۋرالى» زاڭ ماقۇلداندى.
كەلىسىمگە 2022 -جىلعى 12-قازاندا استانا قالاسىندا قول قويىلدى. زاڭدى قابىلداۋ ينۆەستيتسيالىق احۋالدى جاقسارتۋعا مۇمكىندىك بەرەدى، سونداي- اق ەلدەر اراسىنداعى ءوزارا ءتيىمدى ساۋدا-ەكونوميكالىق ىنتىماقتاستىقتى ودان ءارى دامىتۋعا ىقپال ەتەدى.
«قازاقستان ۇكىمەتى مەن قاتار ۇكىمەتى اراسىنداعى ينۆەستيتسيالاردى قولداۋ جانە ءوزارا قورعاۋ تۋرالى كەلىسىم ەلدەردىڭ ءوزارا ءادىل جانە تەڭ قۇقىلى ينۆەستيتسيالىق رەجيمىن ۇسىنۋعا باعىتتالعان. بۇل كەلىسىم ەكىجاقتىڭ تىعىز ەكونوميكالىق ىنتىماقتاستىقتى ارتتىرىپ، سونداي- اق كاسىپكەرلىك باستامالاردى ىنتالاندىرۋ ءارى ەكى مەملەكەتتىڭ دە ءال-اۋقاتىن جاقسارتۋ ءۇشىن قولايلى جاعدايلار تۋعىزادى. كەلىسىمنىڭ ماقساتى - ءار تاراپقا قولايلى جاعداي جاساپ، تەڭ قۇقىقتى رەجيمدى رەتتەپ، ۇلتتىق زاڭناماعا جانە حالىقارالىق قۇقىققا سايكەس قاۋىپسىزدىكتى قامتاماسىز ەتۋ»، - دەدى سەناتور بيبىگۇل جەكسەنباي.
ونىڭ ايتۋىنشا، كەيىنگى جىلدارى قاتارمەن ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىقتى ساپالى جاڭا دەڭگەيگە كوتەرىپ، مەملەكەت باسشىسىنىڭ باستامالارىن ىسكە اسىرۋ بويىنشا ماڭىزدى جۇمىستار اتقارىلىپ جاتىر. قازىرگى كەزدە ەكى ەلدىڭ ۇلتتىق كومپانيالارى مەن جەكە سەكتورلارى اراسىنداعى بايلانىس نىعايىپ، ەكونوميكانىڭ ءارتۇرلى سەكتورلارىندا ءبىرقاتار ماڭىزدى جوبالار جۇزەگە اسىپ جاتىر.
«قازىر قاتارلىق كومپانيالاردىڭ ينۆەستيتسيالىق جوبالار تىزىمىنە 1 ميلليارد 356 ميلليون ا ق ش دوللارىن قۇرايتىن 14 جوبا كىرەدى. ونىڭ ىشىندە 20 ميلليون دوللار قۇرايتىن 3 جوبا جۇزەگە اسىپ، 103 ميلليون دوللار سوماسىنداعى 2 جوبا قولعا الىندى. وسىنى ەسكەرە وتىرىپ، بۇل زاڭ ينۆەستيتسيالىق جاعدايدى ودان ءارى جاقسارتۋعا جانە ەكى ەل اراسىنداعى ءوزارا ءتيىمدى ساۋدا- ەكونوميكالىق ىنتىماقتاستىقتى دامىتۋعا ىقپال ەتەتىنىنە سەنىمدىمىن»، - دەدى دەپۋتات.
اۆتور
رۋسلان عابباسوۆ