قازاقستان مەن نيدەرلاند ۋنيۆەرسيتەتىنىڭ عالىمدارى بىرلەسىپ قاڭلى مۇراسىن زەرتتەپ جاتىر
شىمكەنت. KAZINFORM - وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنىڭ ارحەولوگيالىق ورتالىعى نيدەرلاندتىڭ لەيدەن ۋنيۆەرسيتەتى عالىمدارىمەن بىرلەسىپ قازبا جۇمىستارىن جۇرگىزدى.
بۇل تۋرالى عىلىم جانە جوعارى ءبىلىم مينيسترلىگى ءمالىم ەتتى.
ۆەدومستۆونىڭ مالىمەتىنشە، حالىقارالىق عىلىمي ىنتىماقتاستىق اياسىندا تۇركىستان وبلىسى، ورداباسى اۋدانى، قاراسپان اۋىلى ماڭىندا ورنالاسقان تولەبايتوبە-2 قورىمدارى زەرتتەلدى.
- قازبا جۇمىستارى بارىسىندا ب. ز. د. ى عاسىر مەن ب. ز. IV عاسىرىنا جاتاتىن قاڭلى كەزەڭىنە ءتان وبالار ارشىلدى. وبا ىشىنەن اقسۇيەك كوشپەندى جاۋىنگەردىڭ جەرلەنگەنى انىقتالدى. بۇل - قابىردەن تابىلعان جەبە ۇشتارى، تۇرمىستىق پىشاق، ات ابزەلدەرى (اۋىزدىق)، بەلدىك توعالارى مەن اشەكەي بۇيىمدار ارقىلى دالەلدەنىپ وتىر. ەرەكشە نازار اۋدارارلىعى - ۇلكەن حۇم ىدىسىنىڭ بولىكتەرى قابىر ىشىنە توسەلگەن جانە ءمايىت اعاش تابىتتىڭ ۇستىنە قويىلىپ جەرلەنگەن. اعاشتىڭ جاقسى ساقتالعان بولىكتەرى مەن جەبەلەردىڭ سابىنداعى ءجىپ ءىزى جەرلەۋ ءراسىمىنىڭ كۇردەلىلىگىن كورسەتەدى. الەباستر گيپستەن جاسالعان بويتۇمارلار سول زامانداعى نانىم- سەنىم بويىنشا زۇلىم كۇشتەردەن قورعاۋشى رەتىندە قويىلعان. سونداي-اق جىلقىنىڭ ازۋ ءتىسى، كەلەسى وبادان تومەن تەمپەراتۋرادا باعالى مەتاللداردى بالقىتۋعا ارنالعان، عىلىمي اينالىمدا «تيگەل» دەپ اتالاتىن سيرەك كەزدەسەتىن كەراميكالىق ىدىس تابىلدى. بۇل - سول كەزەڭدەگى مەتالل وڭدەۋ تەحنولوگياسىنا قاتىستى ماڭىزدى جاڭالىق، - دەلىنگەن حابارلامادا.
ايتا كەتەرلىگى، وبالار ەجەلگى داۋىردە بىرنەشە رەت تونالعانىنا قاراماستان بۇگىنگى قازبا جۇمىستارى ناتيجەسىندە ماڭىزدى دەرەكتەر مەن جادىگەرلەر تابىلىپ وتىر. زەرتتەۋ جۇمىستارىنا ارنايى مەموراندۋم اياسىندا «ورداباسى» ۇلتتىق تاريحي-مادەني قورىق-مۋزەيىنىڭ قىزمەتكەرلەرى دە قاتىستى.
لەيدەن ۋنيۆەرسيتەتىنىڭ انتروپولوگ جاس عالىمى پولينا كولموگوروۆا بۇل زەرتتەۋ جۇمىستارى قازاقستاننىڭ كونە تاريحىنىڭ اشىلۋىنا، قاڭلى كەزەڭىنىڭ مادەنيەتى مەن سالت-ءداستۇرىن تانۋعا ۇلەس قوساتىنىنا سەنىم ءبىلدىرىپ، ارحەولوگيالىق زەرتتەۋلەردى الداعى ۋاقىتتا دا جالعاستىرماق.
ەسكە سالا كەتەيىك، بۇعان دەيىن الماتىلىق ارحەولوگتەر ساق داۋىرىنە تيەسىلى التىن جۇزىك تاپقان ەدى.