- جالپى، ساپار بارىسىندا ءبىرقاتار ماڭىزدى قۇجاتقا قول قويىلدى. بۇگىن جاسالعان كەلىسىمدەر ەكى ەلدىڭ الىس-بەرىسىن جانداندىرا تۇسەتىنى ءسوزسىز. قازاقستان مەن موڭعوليا اراسىنداعى ساۋدا-ساتتىق كولەمى بىلتىر 130 ميلليون دوللار بولىپ، 7,7 پايىزعا ءوستى. ەلدەرىمىزدىڭ ەكونوميكالىق الەۋەتىن ەسكەرسەك، بۇل كورسەتكىشتى ارتتىرۋعا تولىق مۇمكىندىگىمىز بار. وسى ورايدا الداعى بىرنەشە جىلدا تاۋار اينالىمىن 500 ميلليون دوللارعا جەتكىزۋ جونىندە مەجە قويىپ وتىرمىز. ول ءۇشىن ەڭ الدىمەن ساۋدا- ساتتىقتاعى تاۋار ءتۇرىن كەڭەيتۋىمىز كەرەك. ەكونوميكالىق ىقپالداستىقتى تەجەيتىن كەدەرگىلەردى بارىنشا ازايتۋ قاجەت، - دەدى مەملەكەت باسشىسى.
پرەزيدەنت وسىدان 1 اي بۇرىن قازاقستاننىڭ ساۋدا ميسسياسى موڭعولياعا ارنايى ساپارمەن بارعانىن اتاپ ءوتتى.
- وندا ەكونوميكالىق بايلانىستاردى ءارتاراپتاندىرۋعا قاتىستى ماڭىزدى ۇسىنىستار جاسالدى. ءبىز بىلتىر ەۋرازيا ەكونوميكالىق وداعى مەن موڭعوليا اراسىنداعى ۋاقىتشا ساۋدا كەلىسىمىن ماقۇلدادىق، راتيفيكاتسيالادىق. بۇل قۇجات ەلدەرىمىز ءۇشىن كوپتەگەن تىڭ مۇمكىندىككە جول اشادى، - دەدى قاسىم-جومارت توقايەۆ.
بۇعان دەيىن قاسىم-جومارت توقايەۆ اقوردادا موڭعوليا پرەزيدەنتىن قارسى العانىن جازعان ەدىك.