قازاقستان مەن موڭعوليا اراسىندا سالىناتىن اۆتوجول قانداي باعىتتاردى قامتيدى

استانا. KAZINFORM - قازاقستان رەسپۋبليكاسى كولىك مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى ماقسات باياحمەت قازاقستان مەن موڭعوليا اراسىنداعى كولىك سالاسىنداعى ىنتىماقتاستىق تۋرالى كەلىسىمدى تالقىلاۋ جونىندەگى كەزدەسۋگە قاتىستى.

ق ر كولىك مينيسترلىگى باسپا ءسوز قىزمەتىنىڭ حابارلاۋىنشا، كەزدەسۋ اياسىندا اۆتوجول سالاسىنداعى ءوزارا ءىس-ارەكەتتىڭ نەگىزگى ماسەلەلەرى تالقىلانىپ، مەملەكەتتەر اراسىندا جاڭا اۆتوموبيل جولىن سالۋ جايىندا سۇراقتار پىسىقتالدى.

اۆتوجولدىڭ جاڭا باعىتى موڭعوليا شەكاراسىنا قاراي شىعاتىن وسكەمەن، ريددەر قالالارى جانە تۋەكتا (رەسەي فەدەراتسياسى) ەلدى مەكەنى ارقىلى وتپەك. بولجامدى جاڭا مارشرۋتتىڭ قازاقستاندىق ۋچاسكەسى - وسكەمەن قالاسىنان رەسەي فەدەراتسياسىنىڭ شەكاراسىنا دەيىنگى ارالىقتا سالىندى. ونىڭ جالپى ۇزىندىعى 189 شاقىرىم، 62 شاقىرىمدا كۇردەلى جانە ورتاشا جوندەۋ جۇمىستارى اتقارىلادى. مارشرۋتتىڭ باسىم بولىگى رەسەي فەدەراتسياسىنىڭ اۋماعىندا وتەدى، ەگەر رەسەي تاراپىنىڭ جول سالۋعا كەلىسىمى بولسا، مارشرۋت 837 شاقىرىمدى قۇرايدى.

ال قازىر قولدانىستاعى «وسكەمەن - رۋبتسوۆسك - بارناۋل - تۋەكتا اۆتوموبيل جولى - موڭعوليا شەكاراسى» تاسجولىنىڭ ۇزىندىعى 1604 شاقىرىمدى قۇرايدى.

جاڭا جولدىڭ قۇرىلىسى جول ءجۇرۋ ۋاقىتىن ەداۋىر قىسقارتىپ، قازاقستان مەن موڭعوليا اراسىنداعى كولىك بايلانىسىن جاقسارتىپ قانا قويماي، ەكونوميكالىق جانە مادەني بايلانىستاردى نىعايتۋداعى ماڭىزدى قادام بولماق.