قازاقستان مەن ۇلى بريتانيا اۋىل شارۋاشىلىعى سالاسىنداعى ىنتىماقتاستىقتى نىعايتپاق
استانا. KAZINFORM - اۋىل شارۋاشىلىعى سالاسىنداعى ىنتىماقتاستىقتىڭ وزەكتى ماسەلەلەرىن مينيستر ايداربەك ساپاروۆ ۇلى بريتانيانىڭ قازاقستانداعى ەلشىسى كەتي ليچپەن كەزدەسۋدە تالقىلادى.
بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
مينيستر اوك سالاسىنداعى ەكىجاقتى ىنتىماقتاستىقتى دامىتۋدىڭ جانە ەلدەر اراسىنداعى تاۋار اينالىمىنىڭ كولەمىن ۇلعايتۋدىڭ ماڭىزدىلىعىن اتاپ ءوتتى.
«ءبىز اۋىل شارۋاشىلىعى ونىمدەرىن، اتاپ ايتقاندا ءداندى داقىلداردى، كونديتەرلىك جانە ۇن ونىمدەرىن، ەت جانە ەت ونىمدەرىن، وسىمدىك مايىن جانە ت. ب. جەتكىزۋدى ۇلعايتۋعا مۇددەلىمىز، ەلدەرىمىز اراسىنداعى ساۋدانى ۇلعايتۋ، ونىڭ قۇرىلىمىن جاقسارتۋ، جەتكىزىلەتىن تاۋارلار نومەنكلاتۋراسىن كەڭەيتۋ جونىندەگى جۇمىستى جانداندىرۋدى ۇسىنامىز»، - دەپ اتاپ ءوتتى ايداربەك ساپاروۆ.
تاراپتار ۇلى بريتانياعا ءسۇت جانە ەت ونىمدەرىن، ونىڭ ىشىندە جىلقى ونىمدەرىن جەتكىزۋگە قويىلاتىن ۆەتەريناريالىق-سانيتاريالىق تالاپتاردى كەلىسۋ ماسەلەلەرىن تالقىلادى.
«قازاقستاننىڭ اگرارلىق سەكتوردا ۇلكەن تاجىريبەسى بار ەكەنىن ەسكەرە وتىرىپ، ءبىز سىزدەرمەن ىنتىماقتاستىقتى تەرەڭدەتىپ، اوك ونىمدەرىنىڭ تاۋار اينالىمىن ارتتىرۋ بويىنشا بىرلەسىپ جۇمىس ىستەگىمىز كەلەدى. اعىمداعى جىلى ءداندى داقىلداردىڭ مول ءونىمىن كۇتۋدەسىزدەر، مال شارۋاشىلىعى دا دامۋدا. وسى رەتتە، بىزدە كوپتەگەن ىنتىماقتاستىق ءۇشىن سەبەپتەر بار»، - دەدى كەتي ليچ ءوز كەزەگىندە.
قازاقستاندىق تاراپ سونىمەن قاتار اگرارلىق عىلىم سالاسىندا، اتاپ ايتقاندا قوي جانە جىلقى شارۋاشىلىعىندا سەلەكسيالىق-گەنەتيكالىق جۇمىس، تەحنولوگيالار ترانسفەرتى جانە مامانداردىڭ بىلىكتىلىگىن ارتتىرۋ سالاسىندا ىنتىماقتاستىق ورناتۋدى ۇسىندى.
سونىمەن قاتار، اۋىل شارۋاشىلىعى تەحنيكاسىن ءوندىرۋ، اۋىل شارۋاشىلىعى ونىمدەرىن قايتا وڭدەۋ بويىنشا بىرلەسكەن كاسىپورىندار قۇرۋ بويىنشا ينۆەستيتسيالىق ىنتىماقتاستىقتى جانداندىرۋ نيەتى بار.
كەزدەسۋ قورىتىندىسى بويىنشا جول كارتاسىنا قول قويۋ تۋرالى ۋاعدالاستىققا قول جەتكىزىلدى، ول ينۆەستيتسيالىق جوبالاردى ىسكە اسىرۋدىڭ ناقتى مەرزىمدەرىن، كەزەڭدەرىن جانە اۋىل شارۋاشىلىعى سالاسىنداعى ەلدەر اراسىنداعى تاۋار اينالىمىن ۇلعايتۋ جونىندەگى شارالاردى ايقىندايدى.