قازاقستان مەن كورەيا قانداي بىرلەسكەن مالىمدەمە قابىلدادى
استانا. قازاقپارات -11-13-ماۋسىمدا كورەيا رەسپۋبليكاسىنىڭ پرەزيدەنتى يۋن سوك ەل قازاقستان رەسپۋبليكاسىنىڭ پرەزيدەنتى قاسىم- جومارت توقايەۆتىڭ شاقىرۋىمەن قازاقستان رەسپۋبليكاسىنا مەملەكەتتىك ساپارمەن كەلدى.
2024 -جىلعى 12-ماۋسىمدا ەكى مەملەكەت باسشىلارى استانا قالاسىندا كەلىسسوز جۇرگىزدى.
دوستىق اتموسفەرادا وتكەن كەلىسسوزدەردىڭ بارىسىندا تاراپتار 1992 -جىلى ديپلوماتيالىق قاتىناستار ورناعان كەزدەن بەرى ەكىجاقتى قاتىناستاردىڭ دامۋ ديناميكاسىنا جوعارى باعا بەردى.
تاراپتار ءوزارا قىزىعۋشىلىق تۋدىراتىن حالىقارالىق جانە وڭىرلىك ماسەلەلەر بويىنشا پىكىر الماستى، سونداي- اق ەكىجاقتى پراكتيكالىق باعىتتاعى ىنتىماقتاستىقتى نىعايتۋ جولدارىن تالقىلادى.
ساياسي ىنتىماقتاستىق: ديالوگتى نىعايتۋ
1. قازاقستان رەسپۋبليكاسىنىڭ پرەزيدەنتى قاسىم- جومارت توقايەۆ 2024 -جىلعى ماۋسىمدا كورەيا رەسپۋبليكاسى جاريالاعان «K- Silk ROAD» كورەيا رەسپۋبليكاسىنىڭ ورتالىق ازيا ەلدەرىمەن ىنتىماقتاستىعى بويىنشا العاشقى ستراتەگياسىن قولدادى. وسى باستامانى ىسكە اسىرۋ بويىنشا تىعىز ىنتىماقتاستىق تۋرالى ۋاعدالاستىققا قول جەتكىزىلدى.
2. تاراپتار «ورتالىق ازيا - كورەيا رەسپۋبليكاسى» فورۋمى اياسىنداعى ىنتىماقتاستىقتىڭ وڭ ديناميكاسىن اتاپ ءوتتى. تاراپتار كورەيا رەسپۋبليكاسىنىڭ ورتالىق ازيا مەملەكەتتەرىمەن ەكىجاقتى جانە كوپجاقتى جوبالارىن ىلگەرىلەتۋ ءۇشىن سىندارلى ءوزارا ءىس- قيمىلدى جالعاستىرۋعا نيەتتى.
ەكى ەلدىڭ مەملەكەت باسشىلارى كەيىننەن «ورتالىق ازيا - كورەيا رەسپۋبليكاسى» ىنتىماقتاستىق فورۋمىن دامىتۋ بويىنشا بىرلەسىپ جۇمىس ىستەۋگە كەلىستى. پرەزيدەنت قاسىم- جومارت توقايەۆ پرەزيدەنت يۋن سوك ەلدىڭ 2025 -جىلى «ورتالىق ازيا - كورەيا رەسپۋبليكاسى» ءسامميتىن وتكىزۋ جونىندەگى ۇسىنىسىن قۇپتادى.
3. تاراپتار ەكى ەلدىڭ دە يادرولىق قارۋسىزدانۋعا، ونى تاراتپاۋعا، يادرولىق ەنەرگەتيكانى بەيبىت ماقساتتا پايدالانۋعا قوسقان ۇلەسىن اتاپ ءوتتى جانە ىنتىماقتاستىقتى ءارى قاراي نىعايتۋعا دايىن ەكەندىكتەرىن ءبىلدىردى.
تاراپتار اتوم قۋاتى حالىقارالىق اگەنتتىگى (بۇدان ءارى — ا ە ح ا) شەڭبەرىندە ەگەمەندى تەڭدىكتى تولىق قالپىنا كەلتىرۋ ءۇشىن بىرلەسىپ كۇش- جىگەر جۇمساۋعا كەلىستى. كورەيا رەسپۋبليكاسى قازاقستان رەسپۋبليكاسىنىڭ ا ە ح ا قيىر شىعىس توبىنا كىرۋى ونىڭ ا ە ح ا باسقارۋشىلار كەڭەسىندەگى مارتەبەسىنە جانە ونىمەن بايلانىستى مۇددەلەرىنە ىقپال ەتپەيتىن جاعدايلاردا، قازاقستان رەسپۋبليكاسىنىڭ ا ە ح ا قيىر شىعىس توبىنا كىرۋىنە قولداۋ ءبىلدىردى.
4. تاراپتار يادرولىق قارۋدى تاراتپاۋ تۋرالى شارتتى (NPT، Nuclear Nonproliferation Treaty)، بيولوگيالىق قارۋ تۋرالى كونۆەنتسيانى (BWC، Biological Weapons Convention) جانە حيميالىق قارۋ تۋرالى كونۆەنتسيانى (CWC، Chemical Weapons Convention) قوسا العاندا، حالىقارالىق يادرولىق قارۋدى تاراتپاۋ رەجيمىن نىعايتۋ ماقساتىندا ىنتىماقتاستىقتى جالعاستىرۋعا ۋاعدالاستى.
اتاپ ايتقاندا، قازاقستاننىڭ بيولوگيالىق قارۋ جونىندەگى كونۆەنتسيانى نىعايتۋ جانە ينستيتۋتسيونالداندىرۋ جونىندەگى ءارتۇرلى كۇش-جىگەرى باعالاندى.
5. تاراپتار وڭىردەگى بەيبىتشىلىكتى، تۇراقتىلىقتى جانە سەنىمدى نىعايتۋ ءۇشىن ازياداعى ءوزارا ءىس- قيمىل جانە سەنىم شارالارى بويىنشا كەڭەس (ا و س ش ك) شەڭبەرىندە سەنىم شارالارىن ىلگەرىلەتۋ بويىنشا بىرلەسىپ كۇش جۇمساۋدى جالعاستىرۋعا كەلىستى. قازاقستان تاراپى 2022 - 2024 -جىلدارى ا و س ش ك- گە قازاقستاننىڭ ءتوراعالىق ەتۋىنە قولداۋ بىلدىرگەنى ءۇشىن كورەي تاراپىنا العىسىن ءبىلدىردى.
6. تاراپتار سولتۇستىك كورەيانىڭ تولىق يادرولىق قارۋسىزدانۋى تەك كورەي تۇبەگىندە عانا ەمەس، سونىمەن قاتار بۇكىل الەمدەگى بەيبىتشىلىك پەن تۇراقتىلىققا ىقپال ەتەتىندىگىمەن كەلىستى.
تاراپتار سولتۇستىك كورەيانى حالىقارالىق بەيبىتشىلىك پەن قاۋىپسىزدىككە قاۋىپ توندىرەتىن كەز كەلگەن ارەكەتتى توقتاتۋعا جانە ب ۇ ۇ قاۋىپسىزدىك كەڭەسىنىڭ ءتيىستى قارارلارىنا سايكەس ءوز مىندەتتەمەلەرىن ورىنداۋعا شاقىردى.
قازاقستان رەسپۋبليكاسى يادرولىق قارۋسىز، بەيبىت جانە ءوسىپ-وركەندەگەن كورەي تۇبەگىن قۇرۋ جونىندەگى «كورەيا رەسپۋبليكاسى ۇكىمەتىنىڭ باتىل باستاماسىنا» جانە ەركىن، بەيبىت جانە ءبىرتۇتاس كورەي تۇبەگىن قۇرۋعا قولداۋ ءبىلدىردى. كورەي تاراپى قازاقستاننىڭ يادرولىق قارۋدان ازات بارلىق ايماقتاردىڭ اراسىنداعى ىنتىماقتاستىقتى نىعايتۋ جونىندەگى قىزمەتىنە جوعارى باعا بەردى.
7. تاراپتار دىندەر مەن مادەنيەتتەر اراسىنداعى جاھاندىق ديالوگتىڭ، ونىڭ ىشىندە تولەرانتتىلىق، ءوزارا سىيلاستىق جانە ءدىني توزىمدىلىك يدەيالارىن ىلگەرىلەتۋ ءۇشىن تۇعىرناما بولىپ تابىلاتىن الەمدىك جانە ءداستۇرلى دىندەر كوشباسشىلارىنىڭ سەزى شەڭبەرىندەگى ماڭىزدىلىعىن اتاپ ءوتتى.
8. قازاقستان رەسپۋبليكاسى كورەيا رەسپۋبليكاسىندا ورنالاسقان جاھاندىق جاسىل ءوسۋ ينستيتۋتى (GGGI)، ازيا ورمان سەكتورىنداعى ىنتىماقتاستىق ۇيىمى (AFoCO) جانە جاسىل كليمات قورى (GCF) سياقتى حالىقارالىق ۇيىمداردىڭ حالىقارالىق قاۋىمداستىقتىڭ كليماتتىڭ وزگەرۋىنە دەن قويۋداعى جانە جاسىل ءوسۋدى قامتاماسىز ەتۋدەگى ۇلەسىن جوعارى باعالايدى.
9. تاراپتار قازاقستان حالىقارالىق دامۋ اگەنتتىگى (KazAID) مەن كورەي حالىقارالىق ىنتىماقتاستىق اگەنتتىگى (KOICA) اراسىنداعى ورتالىق ازيا وڭىرىندە ءۇشجاقتى ىنتىماقتاستىققا جاردەمدەسۋ ارقىلى ەكونوميكالىق جانە الەۋمەتتىك دامۋعا جاردەمدەسۋگە ۋاعدالاستى.
ەكونوميكالىق سەرىكتەستىك: ءوزارا ءتيىمدى جوبالار
10. تاراپتار ساۋدا-ەكونوميكالىق، عىلىمي- تەحنيكالىق ىنتىماقتاستىق جونىندەگى بىرلەسكەن ۇكىمەتارالىق كوميسسيا (بۇدان ءارى - بىرلەسكەن كوميسسيا)، سونداي- اق ساۋدا مەن ينۆەستيتسيالارعا جاردەمدەسۋدىڭ نەگىزدەمەلىك باعدارلاماسىنىڭ (TIPF — Trade and Investment Promotion Framework) قابىلدانۋى ەكى ەل اراسىنداعى ساۋدا مەن ينۆەستيتسيالارعا جاردەمدەسۋدە ماڭىزدى ءرول اتقاراتىنىن اتاپ كورسەتتى. بىرلەسكەن كوميسسيا مەن TIPF كەزدەسۋلەرى ارقىلى ەكىجاقتى ساۋدا، ينۆەستيتسيالىق جانە پراكتيكالىق ىنتىماقتاستىقتى ودان ءارى نىعايتۋ تۋرالى ۋاعدالاستىققا قول جەتكىزىلدى.
11. ساۋدا-ەكونوميكالىق كووپەراتسيانىڭ پەرسپەكتيۆالىق باعىتتارىن ايقىنداۋ جانە بىرلەسكەن ينۆەستيتسيالىق جوبالاردى ىلگەرىلەتۋ ماقساتىندا ساۋدا-ەكونوميكالىق جانە عىلىمي-تەحنولوگيالىق ىنتىماقتاستىق جونىندەگى ۇكىمەتارالىق كوميسسيانىڭ وتىرىستارىن تۇراقتى تۇردە وتكىزۋدىڭ ماڭىزدىلىعى اتاپ ءوتىلدى.
12. تاراپتار 2024 -جىلعى 12-ماۋسىمدا استانا قالاسىندا ەكى ەلدىڭ ىسكەر توپتارىنىڭ قاتىسۋىمەن وتكىزىلگەن بيزنەس- فورۋمدى جوعارى باعالادى. كورەيا رەسپۋبليكاسىنىڭ پرەزيدەنتى يۋن سوك ەلدىڭ قازاقستان رەسپۋبليكاسىنا ساپارى شەڭبەرىندە قول قويىلعان كوممەرتسيالىق قۇجاتتار ەكى ەل اراسىنداعى ساۋدا- ەكونوميكالىق جانە ينۆەستيتسيالىق ىنتىماقتاستىقتى دامىتۋعا وڭ ۇلەس قوساتىنىنا ءۇمىت ءبىلدىردى.
13. تاراپتار قازاقستاندىق ۋراندى كورەيا رەسپۋبليكاسىنا جەتكىزۋدى ودان ءارى جالعاستىرۋعا جانە ونىڭ كولەمىن ۇلعايتۋ مۇمكىندىگىن قاراستىرۋعا كەلىستى.
«قازاتومونەركاسىپ» ۇ ا ك» ا ق تابيعي ۋران جەتكىزۋگە ۋاكىلەتتى كورەي ەنەرگەتيكالىق كومپانياسىنىڭ رەسمي سايتىندا تۇراقتى تۇردە جاريالاناتىن تەندەرلەرگە مونيتورينگ جۇرگىزەدى جانە مۇنداي حابارلاندىرۋ بولعان جاعدايدا تەندەرلەرگە قاتىسۋعا نيەتتى.
سونداي- اق، سەرىكتەستىك قاتىناستاردى قولداۋ ماقساتىندا «قازاتومونەركاسىپ» ۇ ا ك» ا ق ەكىجاقتى ىنتىماقتاستىق پەرسپەكتيۆالارىن تالقىلاۋ ءۇشىن ۋاكىلەتتى كورەي ەنەرگەتيكالىق كومپانياسىنىڭ وكىلدەرىمەن تۇراقتى تۇردە كەلىسسوزدەر جۇرگىزەدى.
قازاقستاننىڭ جىلۋ ەلەكتر ورتالىقتارىن كورەي كومپانيالارىنىڭ جاڭعىرتۋى كەزىندە كومىر ونەركاسىبىنىڭ ەكولوگيالىق وبەكتىلەرىن جاقسارتۋ ءۇشىن ەنەرگەتيكالىق ينفراقۇرىلىمنىڭ جاي-كۇيىن زەرتتەۋ جانە كورەي تەحنولوگيالارىن پايدالانۋ تۋرالى ۋاعدالاستىققا قول جەتكىزىلدى.
تاراپتار بالامالى ساۋدا جولدارىن پايدالانا وتىرىپ، كورەي كومپانيالارىنىڭ قازاقستاندىق شيكى مۇنايدى ساتىپ الۋداعى ءوزارا ءىس-قيمىلىن جالعاستىرۋدىڭ ماڭىزدىلىعىن اتاپ ءوتتى.
تاراپتار قازاقستان رەسپۋبليكاسىنىڭ ەنەرگەتيكا مينيسترلىگى مەن كورەيا رەسپۋبليكاسىنىڭ ساۋدا، ونەركاسىپ جانە ەنەرگەتيكا مينيسترلىگى اراسىنداعى ەلەكتر ەنەرگەتيكاسى سالاسىنداعى جان-جاقتى ىنتىماقتاستىق جونىندەگى ءوزارا تۇسىنىستىك تۋرالى مەموراندۋمعا قول قويۋدى قۇپتايدى.
تاراپتار نەگىزگى پايدالى قازبالار سالاسىنداعى جان-جاقتى ىنتىماقتاستىقتىڭ جانە ولاردى جەتكىزۋ تىزبەگىن قۇرۋدىڭ قاجەتتىگىن مويىندادى.
14. ەكولوگيا جانە كليماتتىڭ وزگەرۋىنىڭ سالدارىمەن قارسى كۇرەس سالالارىنداعى جوبالاردى ىسكە اسىرۋ بويىنشا بىرلەسىپ كۇش جۇمساۋ تۋرالى ۋاعدالاستىققا قول جەتكىزىلدى. تاراپتار 2024 — 2026 -جىلدارى قازاقستان ءتوراعالىق ەتەتىن حالىقارالىق ارالدى قۇتقارۋ قورىنىڭ (ح ا ق ق) جەلىسى بويىنشا جوبالاردى ىسكە اسىرۋ مۇمكىندىكتەرىن زەردەلەۋگە نيەتتى.
ورمان ورتتەرىنە قارسى كۇرەستە ىنتىماقتاستىقتى دامىتۋعا جانە جوعارى تەحنولوگيالاردى قولدانا وتىرىپ، قازاقستاننىڭ ورتكە قارسى جۇيەلەرىن جاڭعىرتۋعا كۇش جۇمساۋ قۇپتالادى.
15. تاراپتار قازاقستاننىڭ سۋمەن جابدىقتاۋ جۇيەسىن جاقسارتۋدى، سۋ ۇنەمدەۋ تەحنولوگيالارىن ەنگىزۋ ارقىلى سۋدى پايدالانۋ مۇمكىندىكتەرىن نىعايتۋدى، سۋ تاسقىنىنان قورعاۋ ينفراقۇرىلىمىن قۇرۋدى جانە جاساندى ينتەللەكتى مەن ا ك ت تەحنولوگيالارىن قولدانۋ ارقىلى سۋ تاسقىنىنا دەن قويۋ مۇمكىندىكتەرىن جاقسارتۋدى قوسا العاندا، سۋ رەسۋرستارى سالاسىنا كورەيلىك تەحنولوگيالار مەن كومپانيالاردىڭ قاتىسۋىنا جاردەمدەسۋگە ۋاعدالاستى.
16. تاراپتار جاسىل سۋتەگى ءوندىرىسىن قوسا العاندا، جاسىل ەنەرگەتيكا سالاسىنداعى جوبالاردى ىسكە اسىرۋ جونىندەگى ءوزارا قارىم- قاتىناستاردى دامىتۋ تۋرالى كەلىستى.
تاراپتار پاريج كەلىسىمىنىڭ 6-بابى نەگىزىندە قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى مەن كورەيا رەسپۋبليكاسىنىڭ قورشاعان ورتا مينيسترلىگى اراسىنداعى پاريج كەلىسىمنىڭ 6- بابى بويىنشا ىنتىماقتاستىق تۋرالى تۋرالى ءوزارا تۇسىنىستىك تۋرالى مەموراندۋمعا قول قويۋدى قۇپتايدى.
تاراپتار سونداي-اق كورەيالىق كومپانيالاردىڭ پارنيكتىك گازدار شىعارىندىلارىن ازايتۋ جونىندەگى جوبالارعا قاتىسۋىنىڭ وزەكتىلىگىن اتاپ ءوتتى.
17. تاراپتار قازاقستان رەسپۋبليكاسىنىڭ ۇلتتىق ەكونوميكا مينيسترلىگى مەن كورەيا رەسپۋبليكاسىنىڭ ەكونوميكا جانە قارجى مينيسترلىگى اراسىنداعى ءبىلىم الماسۋ جانە دامۋ سالاسىنداعى ىنتىماقتاستىق تۋرالى ءوزارا تۇسىنىستىك تۋرالى مەموراندۋمعا قول قويۋدى قۇپتايدى.
ءوزارا تۇسىنىستىك تۋرالى بۇل مەموراندۋم ەكى ەلدىڭ ورنىقتى ەكونوميكالىق دامۋى ءۇشىن ىنتىماقتاستىق قاتىناستارىن ورناتۋعا ىقپال ەتەتىن بولادى. تاراپتار ءوزارا تۇسىنىستىك تۋرالى مەموراندۋم نەگىزىندە ەكونوميكالىق ىنتىماقتاستىقتى نىعايتۋ يدەياسىن قۇپتايدى جانە قازاقستاننىڭ بولاشاقتاعى قاجەتتىلىكتەرىنە بايلانىستى بىرلەسىپ زەرتتەۋلەر جۇرگىزۋ جانە تەحنيكالىق-ەكونوميكالىق نەگىزدەمەلەردى قولداۋ سياقتى ءارتۇرلى تاسىلدەرمەن بىرلەسكەن جۇمىستى جۇزەگە اسىراتىن بولادى.
18. تاراپتار قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى مەن كورەيا رەسپۋبليكاسىنىڭ قارجىلىق قىزمەتتەر جونىندەگى كوميسسياسى جانە كورەيا رەسپۋبليكاسىنىڭ قارجىلىق قاداعالاۋ قىزمەتى اراسىنداعى بانكتەردى قاداعالاۋ سالاسىنداعى ءوزارا تۇسىنىستىك تۋرالى مەموراندۋمعا قول قويۋدىڭ ماڭىزدىلىعىن اتاپ ءوتتى.
قۇجات ءوزارا ۇيلەستىرۋدى نىعايتادى جانە قازاقستاندا كورەي قارجى ۇيىمدارىنىڭ بولۋىن كەڭەيتۋگە ىقپال ەتەدى.
19. تاراپتار «استانا» حالىقارالىق قارجى ورتالىعىنىڭ (ا ح ق و) قازاقستانعا كورەي ينۆەستيتسيالارىن تارتۋداعى ءرولىن اتاپ ءوتتى.
20. تاراپتار كليماتتىڭ وزگەرۋىنە قارسى كۇرەس جانە ازىق- تۇلىك قاۋىپسىزدىگىن نىعايتۋ شاراسى رەتىندە «اقىلدى فەرمالار» تەحنولوگيالارىن قولدانۋ مۇمكىندىگىن اتاپ ءوتتى، سونداي- اق «اقىلدى فەرمالارعا» ماماندانعان كورەي كومپانيالارىنىڭ قازاقستان نارىعىنا شىعۋىن كەڭەيتۋ جانە ەكى ەلدىڭ اقىلدى اۋىل شارۋاشىلىعىن دامىتۋ جونىندەگى ىنتىماقتاستىق تۋرالى ۋاعدالاستى.
ازاماتتار اراسىنداعى تىكەلەي بايلانىس - بەرىك دوستىقتىڭ نەگىزى
21. تاراپتار استانالار (استانا - سەۋل) اراسىنداعى تىكەلەي اۆيارەيستەردى قالپىنا كەلتىرۋ جانە الماتى - سەۋل باعىتى بويىنشا رەيستەردى ۇلعايتۋ ادامدار اراسىنداعى الماسۋلاردى جانداندىرۋعا ىقپال ەتەتىنىن باعالادى.
22. تاراپتار جوعارى ءبىلىم بەرۋ سالاسىنداعى ىنتىماقتاستىقتىڭ جاندانۋىن جوعارى باعالايدى. تاراپتار ستۋدەنتتەر مەن وقىتۋشىلاردىڭ اكادەميالىق ۇتقىرلىعىن قوسا العاندا، جان-جاقتى جانە تۇراقتى ىنتىماقتاستىقتى جانە الماسۋدى كەڭەيتۋدى كوتەرمەلەۋگە، سونداي- اق قازاقستان رەسپۋبليكاسىندا دا، كورەيا رەسپۋبليكاسىندا دا تەحنيكالىق باعىتتار بويىنشا جوعارى بىلىكتى مامانداردى دايارلاۋدا ءوزارا ءىس- قيمىلدى دامىتۋعا كەلىستى.
تاراپتار كورەيا رەسپۋبليكاسىندا قازاق ءتىلىن جانە قازاقستان رەسپۋبليكاسىندا كورەي ءتىلىن وقىتۋدى قولدايدى.
23. تاراپتار عىلىم مەن تەحنولوگيا سالاسىنداعى ىنتىماقتاستىقتى دامىتۋعا جانە وزىق زەرتتەۋلەر جۇرگىزۋگە، سونداي- اق جوعارى وقۋ ورىندارى مەن عىلىمي-تەحنولوگيالىق ينستيتۋتتار اراسىنداعى گۋمانيتارلىق الماسۋلاردى نىعايتۋعا كەلىستى.
تاراپتار قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن كورەيا رەسپۋبليكاسىنىڭ عىلىم جانە اقپاراتتىق- كوممۋنيكاتسيالىق تەحنولوگيالار مينيسترلىگى اراسىنداعى عىلىم جانە تەحنولوگيالار سالاسىنداعى ىنتىماقتاستىق جونىندەگى ءوزارا تۇسىنىستىك تۋرالى مەموراندۋمعا قول قويۋدى قۇپتايدى.
24. تاراپتار ەكى ەل تۋريستەرىنىڭ ءوزارا ساپار جاساۋلارىنداعى وڭ سەرپىندى جانە وسى سالاداعى ءوزارا ءىس-قيمىلدى دامىتۋدىڭ جوعارى الەۋەتىن قاناعاتتانۋشىلىقپەن اتاپ ءوتتى.
تاراپتار تۋريزم سالاسىنداعى ىنتىماقتاستىقتى نىعايتۋعا، سونداي- اق ەكى ەلدىڭ اۋماقتارىندا ۇيىمداستىرىلاتىن حالىقارالىق تۋريستىك ءىس-شارالارعا الماسىپ قاتىسۋدى جالعاستىرۋعا ۋاعدالاستى.
25. تاراپتار ەكى ەلدە وتكىزىلەتىن سپورتتىق ءىس-شارالارعا الماسۋ بويىنشا قاتىسۋدى جالعاستىرۋعا، سونداي-اق ەكى ەلدىڭ سپورت فەدەراتسيالارى اراسىنداعى ىنتىماقتاستىقتى جولعا قويۋ بويىنشا بەلسەندى جۇمىس ىستەۋگە ۋاعدالاستى.
26. كورەي تاراپى 1930 -جىلدارى كورەي قونىس اۋدارۋشىلارىن جىلى قابىلداعانى ءۇشىن قازاقستان حالقىنا العىسىن ءبىلدىردى. تاراپتار قازاقستاننىڭ ەتنوستىق كورەيلەرىنىڭ ەكى ەل اراسىنداعى ىسكەرلىك جانە مادەني بايلانىستاردى دامىتۋداعى ءرولىن جوعارى باعالادى.
27. تاراپتار جۇمىسپەن قامتۋ جانە ەڭبەك سالاسىنداعى ىنتىماقتاستىقتى نىعايتۋ بويىنشا جۇمىس ىستەۋگە ۋاعدالاستى.
تاراپتار قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى مەن كورەيا رەسپۋبليكاسىنىڭ جۇمىسپەن قامتۋ جانە ەڭبەك مينيسترلىگى اراسىنداعى جۇمىسپەن قامتۋ جانە ەڭبەك سالاسىنداعى جونىندەگى ءوزارا تۇسىنىستىك تۋرالى مەموراندۋمعا قول قويۋدى قۇپتايدى.
28. تاراپتار مەملەكەتتىك قىزمەتتى دامىتۋ سالاسىندا، سونداي-اق ەكى ەل ۇكىمەتتەرىنىڭ الەۋەتىن نىعايتۋ ماقساتىندا مەملەكەتتىك قىزمەتتەگى ادام رەسۋرستارىن باسقارۋعا بايلانىستى تاجىريبە جانە ءبىلىم الماسۋدا ىنتىماقتاسۋعا ۋاعدالاستى.
تاراپتار قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى مەن كورەيا رەسپۋبليكاسىنىڭ پەرسونالدى باسقارۋ مينيسترلىگى اراسىنداعى مەملەكەتتىك قىزمەتتەگى پەرسونالدى باسقارۋ تۋرالى ءوزارا تۇسىنىستىك تۋرالى مەموراندۋمعا قول قويۋدى قۇپتايدى.
بولاشاققا كوزقاراس
29. تاراپتار كورەيا رەسپۋبليكاسىنىڭ پرەزيدەنتى يۋن سوك ەلدىڭ مەملەكەتتىك ساپارىنىڭ قورىتىندىلارىنا قاناعاتتانۋشىلىق ءبىلدىرىپ، ەكى ەل اراسىنداعى دوستىق پەن ىنتىماقتاستىقتى نىعايتۋعا وڭ ۇلەس قوسقان وسى ساپارعا جوعارى باعا بەردى. پرەزيدەنت يۋن سوك ەل قازاقستان رەسپۋبليكاسىنىڭ ۇكىمەتى مەن حالقىنا دەلەگاتسياعا جىلى لەبىزىن ءبىلدىرىپ، قوناقجايلىلىق تانىتقانى ءۇشىن ريزاشىلىعىن ءبىلدىردى. ەكى ەلدىڭ باسشىلارى قازاقستان رەسپۋبليكاسى مەن كورەيا رەسپۋبليكاسى اراسىنداعى جوعارى دەڭگەيدەگى بايلانىستاردى جالعاستىرۋعا نيەتتى ەكەندىكتەرىن راستادى.
30. پرەزيدەنت يۋن سوك ەل قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتى وزىنە ىڭعايلى ۋاقىتتا كورەياعا ساپارمەن كەلۋگە شاقىردى. پرەزيدەنت قاسىم-جومارت توقايەۆ شاقىرۋدى ريزاشىلىقپەن قابىلدادى.
اۆتور
جانات قاپالبايەۆا